1 Minkte 16 - Bible en langue Bulu

¹ Eyoñe be soya éwolo Zambe, be nga bôé je ézezañe nda éndelé nje David a nga lam asu dé, a be nga ve mimvean ba diʼi ngumba a metunaʼa ya nlatane ngbwa e mise me Zambe.

² Eyoñe David a maneya ve mimvean ba diʼi ngumba a metunaʼa ya nlatane ngbwa, nde a nga botane bôt a jôé Nti.

³ Eyoñe te fe a nga ve befam a binga bese yʼIsraél, môt ase éfuse belet, ôfuse tit ô ne nyañan a éwolo bibuma bi ndiʼi woon.

⁴ Nde a nga telé ôsu éwolo Nti, bevoʼo ya Belévit, mbe be mbe be bili ésaé ya yeʼelan, ya kañ a seʼe Nti, Zambe Israél.

⁵ Asaf nye a mbe évet, Zakari a tyaʼa nye mvus; wôna bana be nga tôñe valé: Yeiél, Semiramôt, Yehiel, Matitya, Eliah, Benayahu, Obéd-Edom a Yeiel. Be nga bili bibômebômé: memvet a biwoé; Asaf a mbe a beteʼe mindiñ tyiñ yôp.

⁶ Betuni be mbe na Benayahu a Yahaziél be mbe be loñe metoñ te jôʼé ôsu éwolo élate Zambe.

⁷ Môs ôte ñwô a nga taté ve Asaf a bobenyañ éyoñ ôsu na be kañe Nti.

⁸ Kañane Nti, loʼone jôé dé! Boʼone na be yem e beta mimboone mié e meyoñ me bôt été!

⁹ Yiʼane nye bia, yiʼane besam Asu duma dé! Fasane bitua bi mame bié bise!

¹⁰ Wumelaʼane miabebien amu jôé dé e ne étyi! E nleme ya ba ba jeñe Nti Ô tame ñhe vak!

¹¹ Jeñane Nti Jeñane fe ngule jé, Jeñan asu dé éyoñ ése!

¹² Mi simesaʼan bitua bi mam a nga bo, bitua bi mame bié a mintyiʼane mejô ya anyu dé,

¹³ a mvoñe bôt Israél, mbo ésaé wé, a bone be Yakob, mintobane mié!

¹⁴ Nye a ne Nti, e Zambe wongan; mintyiʼane mejô mié mia bo ésaé e si ése.

¹⁵ Mi simesaʼan élate jé nnôm éto, mi simesaʼane nkobô wé asu miaé bôte toyini,

¹⁶ Mi Simesaʼan élat a nga bo Abraham e ngana a nga kan Izak;

¹⁷ ngana éte a nga telé je ane mvinda asu Yakob, asu Israél, élate ya nnôm éto été.

¹⁸ A jôʼô na: Ma ye ve wo si ya Kanaan, é ntoo wo mvean.

¹⁹ Eyoñe te mi mbe bôte tyôtyoé, teke mimfañ mi bôt a mintabe si éte.

²⁰ Be nga ke ba kalan e meyoñ meyoñ, be kôlô éjôé ji a ke ji évok;

²¹ Ve a nji kañese na môt éziñ a tibili be. A nga komekane bejô bôt amu ajô dap nye na:

²² Te nambane bôte bam be ne ñwoʼone mbon, a te boone bekulu mejô bam abé !

²³ Si ése é yiʼa Nti bia! Kañetaʼan mbamba foé ya nyiane wé môs ane môs !

²⁴ Kañetaʼane duma dé e meyoñ été, a kañete bitua bi mame bié e bôte bese été!

²⁵ Amu Nti a ne anen, a dañe fe yian ékañaʼa, a ne Nyô ya ko woñ, a dañe bezambe bese;

²⁶ amu bezambe ya meyoñ mese be ne bivôlevôla bezambe, ve Nti Nye a nga bo yôp.

²⁷ Abeñ a étôtok bi ne nye asu, ngul a mevak bi ne e nda jé.

²⁸ A menda me bôte ya meyoñ vaʼane Nti, vaʼane Nti duma a ngu!

²⁹ Vaʼane jôé Nti duma! Zaʼane mimvean, zaʼane be Nye, Kutane meboñe si ôsu Nti, mi bili mbamba be biôm be nʼétyi!

³⁰ A si ése fôʼôbaʼan ôsu vié! Ya, émo ése é ne ne kpwé, émo é nji ke ndeñetan.

³¹ Yôp é vaʼak a si é fônôk! A be jôʼôk e meyoñ me bôt été na: Nti a jôô!

³² Mañ me duñuk a biôm bise bi nʼété!

³³ Bilé ya mefane ki bi kute mefas e mise me Nti! Amu a zu tyiʼi si nyô mejô.

³⁴ Kañane Nti amu a ne mvaé Amu mvame jé é too nnôm éto!

³⁵ Jôʼane na: Nyiʼi bia a Zambe ya nyiane wongan, Kôʼane bia a vaa bia ézezañe meyoñ me bôt, nalé bia ye kañe jôé dôé e nʼétyi, a nalé bia ye belane duma dangane na bi seʼe wo!

³⁶ Ebotan a Nti, Zambe Israél akekui nnôm éto! Eyoñe te bôte bese be nga jô na: Amen! A seʼe Nti!

³⁷ Ane David a nga liʼi Asaf ba be bobenyañ valé ôsu éwolo élate Nti na be bo ésaé éyoñ ése ôsu éwolo élat, avalʼane abendé ya môs ôse é né.

³⁸ Obéd-Edom e mone Yedutun a Hôsa, nalé fe bobenyañ bôte mewôm mesaman be nga liʼi ane bebaʼale mimbé;

³⁹ Ntuni Sadok a bobenyañe bevok be ne betuni be nga tele ôsu tabernakel Nti, éto ya ékôndôʼô yôp é ne Gabaoñ,

⁴⁰ na be ve Nti mimvean ba diʼi ngumba éyoñ ése, mametyé a mamengôʼé ataʼa metunaʼa ba diʼi ngumba yôp, a bo mam mese me ne ntilan e kalate metiñe Nti a nga bendé Israél.

⁴¹ Héman, Yedutun a bôte bevok be nga too be fefe, be nga toban a looban a biyôlé biabe na be kañe Nti. Amu mvame jé é too nnôm éto.

⁴² Héman a Yedutun be mbe fefele jap be bili metoñ a mindiñ asu ba ba bôme bie, be bili fe biôm ba bôme bie bia bi Zambe. Be nga lôme bone be Yedutun bebaʼale mimbé.

⁴³ Ane bôt bese be nga bulan, môt ase e nda jé, David fe a nga bulane na a botane nda jé.