1 Minkte 15 - Bible en langue Bulu

David a kômesane mbeʼan éwolo élat

¹ Ane David a nga lôñ émiene menda e tisone David; ane a nga kôm éwolo Zambe vôme ya bômbô a lame fe je nda éndelé.

² Eyoñe te David a nga jô na: Belévit étam ba yiane beʼe éwolo Zambe, amu Nti a nga tobe be na be beʼe éwolo Nti a bo ésaé yʼété melu mese.

³ Ane David a nga sulane Israél ase e Yérusalém na be bete éwolo Nti e vôm a nga mane kôme na ja ye bômbô.

⁴ Ane David a nga sulane bone bʼAron a Belévit;

⁵ Mfaʼa ya bone kehat: Uriel évet a bobenyañ, bôt ntet a mewôm mebaé.

⁶ Mfaʼa ya bone be Merari: Asaya évet a bobenyañ, bôte mintete mibaé a mewôm mebaé.

⁷ Mfaʼa bone be Gersom: Yoél évet a bobenyañ bôte ntet a mewôm mela.

⁸ Mfaʼa ya bone bʼElisafan: Semaéya évet a bobenyañ, bôte mintete mibaé.

⁹ Mfaʼa bone bʼEbroñ: Eliél évet a bobenyañ, bôte mewôme muam.

¹⁰ Mfaʼa bone be Uziél: Aminadab évet a bobenyañ, bôte ntet awôme da a bebaé.

¹¹ Ane David a nga loone betuni: Sadok a Abiatar a Belévit: Uriel, Asaya, Yoél, Semaéya, Eliél a Aminadab.

¹² Nde a nga jô be na: Mi ne bivete menda me bôte Belévit; ajô te tunane miabebien, mia a bobenyoñ a betane éwolo Nti, Zambe Israél, a bôé je vôm me nga kôme na ja ye bômbô.

¹³ Amu mi mbe momo éyoñ ôsu Nti, e Zambe wongan, a nga bibi bia; amu bi nji nyoñ éwolo te avalʼane metiñ me né.

¹⁴ Ane betuni a Belévit be nga tune bebiene na be bete éwolo Nti, Zambe Israél.

¹⁵ Nde bone be Lévi be nga beʼe éwolo Zambe e bitule biap a mimbôñ avale Môze a nga bendé, be tôñe nkobô Nti.

¹⁶ Ane David a nga jô bivete Belévit na be telé bobenyañ beyia bia e mevôm ba yiane tebe be bili bibômebômé: memvet, bingombé a biwoé, be bôme bie tyiñe yôp, ndeme mevak.

¹⁷ Ane Belévit be nga telé Héman, e mone Yoél e vôm a yiane tebe; e bobenyañe bé, be nga telé Asaf e mone Bérékiahu; e mfaʼa bone be Merari be ne bobenyañ be nga telé Etan e mone Kusaya:

¹⁸ be nga nyoñe fe bobenyañe ya nsamba baa, Belévit, a telé be e fefele jap be too môé na: Zakari, Ben, Yaaziél, Semiramôt, Yehiél, Uni, Eliab, Benayahu, Maaséyahu, Matitiahu, Eliféléhu, Miknéyahu, Obéd-Edom a Yeiel, bebaʼale mimbé.

¹⁹ Beyia bia Héman, Asaf a Etan be nga bili biwoé bi mvote na be bôme bie bi kobô.

²⁰ Zakari, Aziel, Semiramôt, Yehiel, Uni, Eliab, Maaséya a Benaya be mbe be bôme memvete tyiñ ônyam;

²¹ Matitiahu, Eliféléhu, Miknéyahu, Obéd-Edom, Yeiel a Azaéiahu be nga bili memvet me ne minsañe muam asu ya wulu bia.

²² Kenaniahu, évete Belévit asu mbeʼane mimbeʼe a nga wulu mam mese ya mbeʼane mimbeʼe amu a mbe a yemek ésaé.

²³ Bérékia a Elkana be mbe bebaʼale mimbé yʼéwolo.

²⁴ Sebaniahu, Yôsafat, Natanaél, Amasayi, Zakari, Benayahu a Eliézer, betuni, bese be mbe be loñe metoñ ôsu éwolo Zambe. Obéd-Edom a Yehiya be mbe bebaʼale mimbé mi éwolo Nti.

²⁵ Ane David, bemvendé ya Israél a bivete betoyini, be nga bet a ke nyoñ éwolo élate Nti e nda Obéd-Edom abui mevak été.

²⁶ Belévit be nga beʼe éwolo élate Nti amu Zambe a nga volô be; be nga tyiʼi beyôme benyak zamgbwa a beyôm mintômba zamgbwa.

²⁷ David a nga beʼe éfumulu alôʼô; avale te fe mfaʼa Belévit bese be nga beʼe éwolo élat, beyia bia, Kenania évet, bebeʼe mimbeʼe a beyia bia; David a nga beʼe fe éfumulu éfôd.

²⁸ Ane Israél ase a nga ke nyoñe éwolo yʼélate Nti a ayenga, tyiñe nlak, metoñ a mindiñ, memvet a biwoé.

²⁹ Eyoñ éwolo élate Nti é nga nyiine tisone David, Mikal, e ngone Saül, é mbe é fombôʼô e vundi. Ane a nga yene njô bôte David a kele a fôn a mevak. Nde a nga biasé nye e nleme wé été.