1 Minkte 12 - Bible en langue Bulu

E bôte Mewosan be nga lat a David Saül a vee

¹ Melu David a nga solô Tiklag na a tube Saül e mone Kis, bôte be nga zu lat a nye. Be mbe biwôlô bezimbi be too nkômesane ya wosan ba be nye be too ngam;

² Be nga bili bilaé a betoloo; be mbe nguleya wua mekok , nge wua mekoñ mʼélaé, be belaʼane mbo ngal a mbo nnôm bebaane. Be nga so ayoñe Bényamin, bobenyañ be Saül.

³ Be mbe môé na: Ahiézer, évet a Yôas, e bone be Sema môte ya Gibéa; Yéziél a Pelét e bone be Azmavét; Beraka; Yéhu môte ya Anatôt;

⁴ Yismaéya môte ya Gabaoñ, éwôlô môt e bôte mewôm melal éte a too fe nlô ya bôte bete mewôm mela;

⁵ Yérémi, Yahaziél; Yôhanañ; Yôzabad môte ya Gedéra;

⁶ Eluzayi; Yérimôt; Bealia, Semaria; Sepatia môte ya Harôf;

⁷ Elkana, Yikya, Azarél, Yôézer a Yakôbeam, Koréite;

⁸ Yôéla a Zebadia e mone Yerkam môte ya Gedor.

⁹ Bôte befe be nga kôlô ayoñe Gad a ke koone David e vôm a nga solô e nkôte si. Be mbe fe biwôlô bi bôte ya mewosan bi bili abui ayéʼé asu bita, be yeme belan ében a akoñ. Be mbe ékowoñe fe vʼane bengbwengbwem a avôle mebo ane minkoʼo mi ne minkôle minkô.

¹⁰ Be mbe môé na: Ezér, évet; Abdias e môta baa; Eliab e nyô lale;

¹¹ Mikamana e nyô nyini; Yérémi e nyô tane;

¹² Atayi e nyô samane; Eliél e nyô zamgbwale;

¹³ Yôhanañ e nyô muame; Elzabad e nyô ébulu;

¹⁴ Yérémi e nyô awômô; Makbanayi e nyô awômô a wua

¹⁵ Be mbe e bone be Gad, bivete ya mewosan; môte wua yʼété, nyô a dañe tyôtyoé a mbe ane bôte ntet a nyô a dañ anen ane bôte toyini.

¹⁶ E ba be nga dañe Yordane le, e ngon ôsu, éyoñe mendim me nga yandane bekindiʼi bé bese, a mbe be nga bo na ba bese be nga too mimbiʼili be tup be kele mfaʼa jôp da tôô a mfaʼa jôp da dim.

¹⁷ Bone be Bényamin a Yuda fe be nga ke be David e vôm a nga solô.

¹⁸ David a nga zu tôbane be. Nde a nga nyoñe nkobô a jô be na: Nge mia zu be ma asu mvoʼé na mi volô ma, nleme wom wo ye lat a mia; ve nge mia zu na mi duʼu ma asu mfi besiñe bam, te na mbia nlem éziñ a ne be ma, Zambe ya bʼésaa bangan a yene jame te a tyiʼi ajô yʼété!

¹⁹ Eyoñe te Amasayi évete bôte mewôm mela a nga jaé a nsisim a Yôtane na: Bi ne a wo, bi ne e ngame jôé, a David e mon Izayi! Mvoʼé é ne asu dôé a asu bôt ba volô wo, amu Nti a volôya wo. Ane David a nga nyoñe be a telé be e bivete ya nsamba été.

²⁰ Bôte ya ayoñe Manasé fe be nga lat David éyoñ a nga ke late Befilisteñ asu ya wosane Saül. Ve David a e bôte bé be nji ke wosan e ngame Befilisteñ, amu bivete biap bi nga titane be; be nga simesan avale di na: David a ye beta lat a e nnôme masa wé Saül, a kuane bia be nye.

²¹ Eyoñe David a nga bulan e Tiklag nje bôte ya Manasé be nga ke fubu nsamba wé; bôte bete be mbe na: Adna, Yôzabad, Yediaél, Mikaél, Yôzabad, Elihu a Siletayi bejôô ya minkane bita Manasé.

²² Bese be mbe biwôlô bi bôte mewosan a be nga zu ve nsamba David mvolan. Be nga suʼulane bo bivete ya nsamba mewosane wé.

²³ Môs ane môs , bôt be nga zu fubu nsamba David na be volô nye ajô te nsamba mewosane wé ô nga suʼulane bo anen.

E bôte mewosan be nga ke Ebroñ na be telé David njô bôt be soʼo meyoñ awôm a mebaé

²⁴ Tañe bôt be ne nguleya wosan, mbe be nga ke lat a David Ebroñ na be kalane nye éjôé Saül, aval abendé Nti é mbe:

²⁵ Bone be Yuda, be beʼe ében a akoñ, bôte toyini ésaman a mintete muam, be bili biben a mekoñ.

²⁶ Bone be Siméoñ, biwôlô bezimbi toyini zamgbwa a ntete wua.

²⁷ Bone be Lévi bôte toyini ényin a mintete misaman

²⁸ ô laté a Yôyada, évete ya abume bôt Aron, ba be bôte toyini éla a mintete zamgbwa be too nsamba;

²⁹ Esoé ndôman Sadok fe é mbe été a too éwôlô mone-bezimbi a bivete mewôm mebaé a bibaé ya nda bôte jé émien.

³⁰ Bone be Bényamin, bobenyañ be Saül bôte toyini éla, amu a kui éyoñe ji, beta ngabe ya be be a nga liʼi nlatan a nda Saül.

³¹ Bone bʼEfrayim, biwôlô bezimbi toyini mewôm mebaé a mintete muam, bese be too bôte ya duma e menda me bôte map été.

³² Bone bʼéfas ayoñe Manasé ya jôp da dim, bôte toyini awôm a muam, mbe be nga toban foʼo vʼasu ya ke yôtane David njô bôt.

³³ Bone bʼIsakar, atyeñ mfaʼa yemelane biyoñ a liti e jam Israél a yiane bo, bivete mintete mibaé a e bobenyañ bese be ne éjôé jabe si.

³⁴ Bone be Zabuloñ bezimbi toyini mewôm metan, be bili mbamba ayéʼé e mame ya bita, be too fe nkôman ya tebe nnoñ ya wosan, be bili mevale mengale mese bese be boʼo ve ésaé avale da.

³⁵ Bone be Néftali bivete bezimbi toyini a zesé bezimbi toyini mewôm mela a zamgbwa, be bili biben a benyamele mekoñ.

³⁶ Bone be Dan bezimbi toyini mewôm mebaé a muam a mintete misaman, be too nkômesane ya tebe nnoñ asu mewosan.

³⁷ Bone bʼAzér, bezimbi toyini mewôm menyin, be bili mbamba ayéʼé ya mam bita, be too fe nkômesane ya tebe nnoñ asu mewosan.

³⁸ Bôt be nga so e meyoñ me too e Yordan mfaʼa jôp da tôô: Ruben, Gad a éfas ayoñe Manasé, bôte toyini ntet a mewôm mebaé, be bili mengale mevale mese.

³⁹ Bezimbi bete bese, nkômesane ya tebe asu mewosan be nga zu Ebroñ a telé David njô bôte ya Israél ase a nlem ôse. Bone bʼIsraél bevoʼo bese be nga kañese ve nye éjôé te.

⁴⁰ Ba be David be nga tabe melu mela be jaʼak a nyu biôme bôte mevok be nga kômesan asu dap.

⁴¹ Nalé fe na bôte ya mefôla me ne bebé a Ebroñ, toʼo Isakar, Zabuloñ a Néftali, be nga soo abui bidi e mvuse bijakas, bekamel, bemulé a benyak; be nga soo fe avut, biwôlé bi fig, bisanté bibuma bi ndiʼi woon bi ne nkôt, mbon; be nga soo jaʼana benyak a mintômba. Si ése é nga too mevak été.