1 Minkte 10 - Bible en langue Bulu

Awu Saül

¹ Môs éziñ Befilisteñ be nga zu wosane bone bʼisraél e nkôle Gilbôa. Ane bone bʼIsraél be nga tup a abui é nga mane wu.

² Eyoñe te bone bʼIsraél be nga suane Saül a bone bé yôp. Be nga wôé Yônatan, Abinadab a Malkikua, bone be njô bôt.

³ Ataté éyoñe te nje adit ése ya bita e nga ku Saül yôp. Bewua bilaé be nga yene nye a Saül a nga ko jame te woñ.

⁴ Nde a nga jô môt a nga beʼe nye mengale na: Nyoñe nkpwaté mekône wôé a wôé ma amu me nji kômbô na Befilisteñ be ne te yeme Zambe bete mbe bebien be bo jame te a kpweʼele ma. Ve mbeʼe mengale wé a nga ben, amu a nga dañe ko woñ. Eyoñe te Saül a nga nyoñe nkpwaté mekône wé a jiban été yôp.

⁵ Eyoñe mbeʼe mengal a nga yene na masa wé a wuya, nye fe a nga jiban e nkpwaté mekône wé yôp a wôé émien;

⁶ Avale te nde Saül a bone bé belaa be nga wu; éyoñe te fe nda bôte njô bôt é nga man.

⁷ E bone bʼIsraél bese be nga too mbiʼili be nga wôʼô na nkane bita ya Israél ô maneya tup a na Saül a bone bé be maneya wu; nde be nga liʼi bitisone biap a tup; éyoñe te Befilisteñ be nga zu tabe bitison bite.

⁸ Tyé kpwaa nye Befilisteñ be nga fombô mimbu nde be nga koone mimbime Saül a bone bé e nkôle Gilbôa.

⁹ Be nga tyiʼi Saül nlô a kee wô, nalé fe mengale mé. Be nga ke ba wulu biôm bite e si jap asu ya mialane mbamba foé ate e be bengunemelane bap a e be bôte bap.

¹⁰ Nde be nga naane mengale me Saül e nda zambe wua ya bezambe bap, a bômôlô ékôkoé nlô jé e nda zambe wop a ne jôé na Dagon.

¹¹ Eyoñe tisone Yabés ése e Galad é nga wôʼô mam mese Befilisteñ be nga bo Saül,

¹² nde biwôlô bi bôte bese bi nga kôlô si a nyoñe mbime Saül a mi mi bone bé a kee mie e Yabés. Be nga jame bivese biap élé térébeñte si, e Yabés, a be nga tyi bidi melu zamgbwa.

¹³ Saül a nga wu amu melo a nga bo Nti. A nji ke baʼale nkobô Nti, ve éyoñ a nga kômbô yem nkômbane Nti, a nga viane ke yene bôt ba biʼi bekôn.

¹⁴ A nji ke sili Nti mam; ajô te Nti a nga bo na a wu, a kalane David e mone Izayi, éjôé.