1 Ko 6 - Bible en langue Bulu

Mejô e zañe bobenyañ

¹ Eyoñe mi bili ajô e zañe jenan, mia kañese na bikuu bi tyiʼi de aya, a lôte na mimfufup mi tyiʼi de?

² Ye mi nji yeme na mimfufup mia ye tyiʼi si nyô mejô? A nge mia mia ye tyiʼi si nyô mejô, ye mi se ngule ya tyiʼi ayôme mejô denan?

³ Ye mi nji yeme na, bia ye tyiʼi be éngele mejô? Abim avé mejô ya ényiñe ji?

⁴ Nde éyoñe mi bili avale mejô te, mia telé e ba keké ja biasé betyiʼi mejô?

⁵ Ma kobô nalé, amu mi wôʼôson. Ye teke môt éziñe ya zañe jenan a ne fek, a ne tyiʼi mejô e zañe bobenyañ?

⁶ Monyañ a bili ajô, a kee de e be bete buni!

⁷ Jaʼane nalé, e ne ndem ateʼe na, mi bi mejô e zañe jenan. Amu jé mi se ngule ya jôʼé ékotekot? Amu jé mi se ngule ya jôé na be nyoñe mia biôme mbia nyoñan?

⁸ Ve mia mia bo ékotekot, a nyoñe ba bevoʼo biôm mbia nyoñan. A be ne bobenyoñ!

⁹ Ye mi nji yeme na: Bikotekote bi bôt bia ye bo te nyoñe ngab éjôé Zambe? Te duʼuban! Teke bebo ébamba, nge bekañe bezambe befe, nge bebo mejian , nge befam ba kômbô veñesane binga, nge ba ba bômbô befam bevok,

¹⁰ nge miñwuwup, nge bewôlé bôte biôm, nge besoʼo bilam, nge bendamane bôte môé e zesé, nge benyoñ abet, ba ye nyoñe ngab éjôé Zambe.

¹¹ Avale te mi mbe, mia bevok. Ve mi nga sôban, mi nga tuneban a kaleban a jôé Nti Yésus Krist, a Nsisime Zambe wongan.

Mame mese me ne nkañesan ya boban

¹² Me bili nkañesane ya bo mam mese, ve saa mese ma yiane boban. Me bili nkañesane ya bo mam mese, ve ma ye bo te kañese bo ôlo ya jam éziñ.

¹³ Bidi bi ne asu abum, a abum e ne asu bidi, a Zambe a ye bo abum bidi na bi bo momo. Ve nyôl é nji bo asu ébamba, é ne asu Nti, a Nti a ne asu nyôl.

¹⁴ A Zambe, nyô a nga wômôlô Nti miñwuan, a ye fe wômôlô bia a ngule jé.

¹⁵ Ye mi nji yeme na, menyôle menan me ne bibuʼa bi Krist? Ye ma ye nyoñe bibuʼa bi Krist a bo bie bi minga ébamba? Teke bebé!

¹⁶ Ye mi nji yeme na, e môt a fulane minga ébamba, baa nye be ntoo nyôle jia? Amu e ne njôane na: Bebaane, ba ye bo nsône wua.

¹⁷ Ve môt a lat a Nti, baa nye ba bo nsisime wua.

¹⁸ Mataʼan ébamba. Abé afe ese môt a bo, e ne atane ya nyôle jé. Ve mbo ébamba a bo abé da wosane nyôle jé émien.

¹⁹ Nge na, ye mi nji yeme na, nyôle jenan é ne nda Mfufube Nsisim a ntoo be mia, a nye a so mia be Zambe, a na, mi nji bo jôme jenan miabebien?

²⁰ Môt éziñ a nga yaʼane tañe ya ngôtô jenan. Wumulaʼane ñhe Zambe a menyôle menan.