1 Ko 5 - Bible en langue Bulu

Mbia mboon éziñ e keké été

¹ Da jôban e be mia na, mbia mboon a ne e zañe jenan, avale mbia mboone te e nji boban, jaʼane e be meyoñe bikuu na: Wua ya be mia a bili nga ésaa.

² A mi ne njalan a mebun! A mi nji wôʼô mboon ôte abé , nalé ate nyô a bo avale jame te a ye kôlô e zañe jenan.

³ Mfaʼa wom, me kusa bo momo e minsôn, ve me ne a mia e nsisim , me maneya tyiʼi ajô môt ate, aval ane nge me mbe a mia:

⁴ a jôé Nti Yésus, a e ngule jé, éyoñe ya nsulaʼane wônan nye ate ma ye tabe a nsisim e zañe jenan,

⁵ môt avale te, a vebaʼane be Satan, asu ndamane minsône mié, nde nsisim wo ye nyiiban e môse Nti.

⁶ E jam mia nguane de e nji bo mvaé! Ye mi nji yeme na ôyôme mvusu, ô wôʼô vusu ngum ébañ?

⁷ Tunane miabebien mfaʼa nnôme mvusu ôte, nde mia ye bo mfefé ébañ, amu mi nji bi mvusu. Amu Krist, pak wongan, a nga wôéban.

⁸ Njemane ñhe abôk, saa a nnôme mvusu, nge mvusu mintañete a ézezam, ve a fembé é ne tee mvusu été, e mfuban été, a e benya mejôô été.

⁹ E kalate wom été, me nga tili mia na: Mi bo te fulane mam a bebo ébamba.

¹⁰ Me nji sôñe bebo ébamba bese ya si nyô, nge benyeʼe bidi, nge miñwuwup, nge bekañe bezambe befe, amu nalé a ye sili mia na mi kôlô si nyô.

¹¹ Momo, me nga tili mia na: Mi bo te fulane mam a nyôa beʼe jôé monyañ, ve a too ébamba, nyeʼe bidi, nkañe bezambe befe, ndamane bôte môé e zesé, nsoʼo bilam nge ñwuwup, a na te di di a avale môte te.

¹² Ye ma ma tyiʼi ba be ne atan ajô? Sa ba ya nda été mbe mi bili na mi tyiʼi ajô?

¹³ Zambe a ye tyiʼi ba ya atan ajô. Vaʼane mbia môt e zañe jenan.