1 Ko 3 - Bible en langue Bulu

Esaé bebo bisaé be Zambe

¹ Mfaʼa wom, a bobejañ, me mbe te ngule ya kobô mia ane bôte be Nsisim, ve aval ane bôte minsôn, aval ane minkeñelé mi bon e be Krist.

² Menyañ mme me nga nyuu mia, saa benya bidii: mi mbe tee ngule ya jibi bie. Toʼo den, mi nji bo ngule ya jibi bie,

³ amu mi ngenane minsôn. Eyoñe mesengan a ntañete bi nee be mia, ye mi nji bo ba minsôn, a ye mi nji nyiñ ane bôt?

⁴ Eyoñe wua a jô na: Me ne môta Paul, nyô mboʼo ke na me ne môt Apôlôs, ye mi nji bo bôt? Nde za a ne Apôlôs? Za a ne Paul? Ve bebo

⁵ bisaé be nga kee mia e mbunan été. Môt ase ya be be a nga bo aval ane mimveane Zambe a nga ve nye mi né.

⁶ Ma me nga bé, a Apôlôs a nga sôé mendim, ve Zambe nye a nga yale.

⁷ Nde, nyô a bé a nji bo jôm, a nyô a sôé mendim a nji bo jôm, Zambe étam nye ba lañ amu nye a yale.

⁸ Nyô a bé, a nyô a sôé mendim be ne avale da, a môt ase a ye nyoñe maʼane mé abim ane ésaé jé é né.

⁹ Bi ne foʼo beébe bebo bisaé be Zambe, a mi ne afube Zambe, nda , nje éte a lôñ.

¹⁰ Aval ane mvam é nga vebane be ma, aval ane mbamba nlôñe menda. Me nga bôôé mbôkaʼa, môte mfe a lôñ été yôp. Ve môt ase a tabeʼe ntyel a avale nlôñan a lôñ.

¹¹ Mfaʼa mbôkaʼa, teke môt a ne bôôé ôfe, ve wu ô mbôô: Yésus Krist.

¹² Nge ba lôñ a or, a argent, a mekoʼo me ne édima, a bilé, a bikumbaʼa, nge a ôsôé,

¹³ ésaé môt ase ja ye veʼeleban. Môse ntyiʼane mejô, wo ye liti je, amu ja litiban a nduan, a nduan ja ye veʼele jôm ésaé môt ase é né.

¹⁴ Nyô ésaé jé ja ye tabe, a ye nyoñe maʼan.

¹⁵ Nyô ésaé jé ja ye dik, a ye sube maʼan. Emien a ye nyiñ, vʼaval ane môt a tulan e nduane zañ.

¹⁶ Ye mi nji yeme na, mi ne nda Zambe, a na, Nsisime Zambe a too e be mia?

¹⁷ Nge môt éziñ a tyame nda Zambe, Zambe a ye tyame nye. Amu nda Zambe é ne étyi, a nda Zambe éte é ne mia.

Nya ndi nleme e be Zambe

¹⁸ Môt a boʼo te duʼu émien: nge môt éziñe ya be mia a buni na a ne fek e si ndôn, a boʼo akut, nde a ye bo fek.

¹⁹ Amu feʼe ya si nyô é ne akut e be Zambe. E ne ntilane na: a bi mimfefek e meduʼane map été.

²⁰ A na, Nti a yem asimesane mimfefek A yeme na e ne momo.

²¹ Môt a boʼo te telé ndi nleme jé e be bôt, amu mame mese me ne émenan:

²² Paul, Apôlôs, nge Séfas, si nyô, ényiñ, nge awu, nge mame ya éyoñe ji, mame ya melu ôsu, mese me ne émenan.

²³ Ve mi ne ba be Krist, a Krist a ne nyô Zambe.