1 Ko 2 - Bible en langue Bulu

Nkatane Mbamba Foé Paul e Korént

¹ Mamien, a bobejañ, éyoñe me nga zu e be mia na me kate mia ndimba jame Zambe, me nji zu a atyeñe nkobô nge fek.

² Amu me nga tyiʼi na, me bo te yeme jam e zañe jenan, vengevenge ve Yésus Krist, Yésus Krist ntyeléban e krôa yôp.

³ Ajô te, me nga too atek e be mia a woñ, me fôʼôbaʼan.

⁴ Nkobô wom a nkañetane foé wom, bi nji bo atyeñe fek da dutu minlem mi bôt, ve bi bia liti e ngule Nsisim ô bili,

⁵ nalé ate mbunane wônan wo ye bo te bi mbôkaʼa e feʼe bôt, ve e ngule Zambe yôp.

E feʼe Zambe

⁶ Ve e too na, bia yeʼele foʼo bekristen be ntoo benya bôtô fek, nyô é nji bo nyô ya si nyô, nge nyô bejôô ya si nyô, mbe ba ye tyamban.

⁷ Bia yeʼele feʼe Zambe, ndimba jam a di e nga too nsolan, e nje Zambe a nga baʼale, te yene biyoñe bi za boʼok, asu duma dangan.

⁸ Teke wua ya bejôô ya si nyô a nga yeme je, amu nge be too ye yeme je, ve be nji tyelé Nti a ne étôtok e krôa yôp.

⁹ Ve aval ane e ne ntilane na: E jame dis e nji yen, a alo teke wôk, e jam e nji nyiine nleme môt, mam mese Zambe a nga kôm asu ba ba nyeʼe nye.

¹⁰ Yaa, bia Zambe a nga kulane de a zene ya Nsisim. Amu Nsisim wo biʼili mame mese, jaʼane bidoʼo bi mam bi Zambe.

¹¹ Za ya be bôt a yeme mame me nee be môt, ye saa nsisime ô ne be nye. Avale te fe mame me nee be Zambe, teke môt a yeme me, vengevenge ve Nsisime Zambe.

¹² Mfaʼa wongan, bi nji nyoñe Nsisime ya si nyô, ve Nsisime wo so e be Zambe, nde bia ye yeme mimveane mi mvame Zambe.

¹³ A bi nji kobô mame mete a e nkobô feʼe bôt ja yeʼele, ve a nyô Nsisim wo yeʼele, bi kobôʼô mame ya nsisim a bifia bi nsisim .

¹⁴ E môt a ne éyekaʼa môte jé été, a nji kañese mame ma so e be Nsisime Zambe. Me ne akut e mfaʼa wé, a voʼo ke me yem, amu ba yemelane me a nsisim .

¹⁵ Ve môt a bili Nsisim a yemelane mame mese, ve émien, teke môt a yemelane nye.

¹⁶ Amu za a nga yem asimesane Nti naa a yeʼele nye? Ve bia bi bili ôsimesane Krist.