1 Ko 16 - Bible en langue Bulu

Mimvean asu keké ya Yérusalém

¹ Mfaʼa mimvean asu mimfufup, mia fe mia ye tôñ e miñyeʼelan me nga ve bekeké ya Galati.

² E môse ôsu ya Sabat ase, môt ase a ye naan e nda jé, e jôm a ye bi ngule ya baʼale nde mia ye bo te yange nsoone wome na, mi nyoñe mimvean.

³ Eyoñe ma ye tabe wé, ma ye lôme ba mia ye top a ve be bekalate mo na be ke liti mimveane mienan e Yérusalém.

⁴ Nge da yiane na mamiene me ke, bia be be bia ye ke.

⁵ Ma ye zu be mia a tyii Masédôan; ma ye foʼo lôt été,

⁶ é ne kui na, me tabe nté éziñ nge lôte ke lôt ôyône be mia na mi ve ma mezene ya kee dulu dam ôsu.

⁷ Eyoñe ji, me nji kômbô yene mia ve mesu me lôtôk, ve ma buni na ma ye tabe bia be mia abe melu, nge Nti a kañese.

⁸ Ve ma ye tabe Eféze, a kui e Pañtekôt,

⁹ amu beta mbé a yombôya ma été mfaʼa ésaé jam, a besiñ be ne abui.

¹⁰ Nge Timôté a zu, jeñane zen ése na a tabe e be mia teke woñ éziñ, amu a bo ésaé Nti, aval ane ma.

¹¹ Nde môt éziñ a boʼo ñhe te biasé nye. Vaʼane nye mam ma yiane na a bulane mvoʼé e vôme me né, amu bia be bobejañ bia yange nye.

¹² Ve mfaʼa mojañ Apôlôs, me nga ve ngul ése na a zu be mia baa be bobejañ; ve a nji foʼo kômbô zu éyoñe ji; a ye zu éyoñ a ye bi éyoñ.

Mebendé ma suʼulan

¹³ Mombaʼan, yemane ngul e mbunan été boʼone benya bôtô, boʼone ngu,

¹⁴ boʼone mam mese a nyeʼan.

¹⁵ Abendé afe di a bobejañ: mia yeme na Stéfanas a nda bôte jé be ne bembômô bibuma Akayi; be nga ve bebien asu ya saane mimfufup.

¹⁶ Vaʼane ñhe avale bôte te mewôk, a môt ase a nyoñe ngabe ya bisaé biap a njuʼu wop.

¹⁷ Ma vak a nsoone Stéfanas, Fortunatus a Akaikus; be nga volô éyoñe mi mbe momo.

¹⁸ Amu be nga bôôé me nleme si a éñwônane fe. Yenan avale bôte te mvaé.

¹⁹ Bekeké ya Azi ba batane mia. Akilas a Priska ba batane mia mbamba mebatan e be Nti a e keké é wôʼô sulan e nda jap.

²⁰ Bobejañe bese ba batane mia. Mi bataʼan wua a nyô mbok a nlatane menyu ô ne mfuban .

²¹ Mebatan me ne ma me wo wom, ma Paul.

²² Nge môt éziñ a nji nyeʼe Nti, a kôlôʼô nsamba. Nti wongan a zaʼak.

²³ Mvame Nti Yésus é tabeʼe be mia.

²⁴ Ma nyeʼe mia bese e be Yésus Krist.