1 Ko 15 - Bible en langue Bulu

Nkañetane Mbamba foé minlôman ajô ñwômane miñwuan

¹ A bobejañ, ma vumelane mia Mbamba Foé me nga kañete mia, nye ate mi nga nyoñ, a mi kabetaneya nye,

² a nye mia ye nyiñe nye, nge mia baʼale nye, avale me nga kañete mia nye; nalé momo, wôna mi nga buni e zesé.

³ Me nga kalane mia e jame mamien me nga taté nyoñ: Krist a nga wu asu mam abé mangan, avale mintilan mia jô.

⁴ A nga jambe soñ, a nga wômô e môse lale, avale mintilan mia jô.

⁵ A nga yené e be Séfas a e be minlôman awôm a mibaé.

⁶ Wôna a nga yené e be bobejañ a lôte mintete mitan éyoñe jia; abui ya été e ngenan e vee, a bevok be wuya.

⁷ Wôna a nga yené e be Yakob, a e be minlômane mise.

⁸ A nga suʼulane fe yené e be ma, ma, nsolekane mon.

⁹ Amu me ne nlômane wo dañe tyôtyoé, e ma me nji yiane lobane na nlôman , amu me nga kpweʼele keké Zambe.

¹⁰ Ve jôme me né, me ne je amu mvame Zambe a e mvame jé é nji bo zesé mfaʼa wom. Amu me nga bo ésaé a lôte bese: saa ma, ve mvame Zambe é nee be ma.

¹¹ Tyiʼibi na, jaʼane ma, nge be, e jame bia kañete e nde le, a e jame mi nga buni e nde le.

¹² Nge ba kañete na Krist a nga wômô miñwuan, bevoʼo ya be mia ba jô aya na ñwômane miñwuan ô nji bo?

¹³ Nge ñwômane miñwuan ô nji bo, wôna Krist fe a nji wômô,

¹⁴ a nge Krist a nji wômô Nkatane Foé wongan ô ne ékôkoé, a mbunane wônane fe ô ne ékôkoé.

¹⁵ Da yené yené na, bi ne bengaa be Zambe be ne minsos, amu bi nga yemete jam e ne minsose na Zambe a nga wômôlô Krist, ve e too na, a nji wômôlô nye, nge e ne bebela na miñwuan mi nji wômô.

¹⁶ Nge miñwuan mi nji wômô, wôna Krist fe a nji wômô.

¹⁷ A nge Krist a nji wômô, mbunane wônan ô ne momo, mi ngenane mam abé menan été.

¹⁸ Ataté éyoñe te jaʼane ba be nga wu e be Krist be jañeya.

¹⁹ Nge bi nga telé ndi nleme jangan e be Krist vʼamu ényiñe ji étam, bi ne ba be ne éngôngo a dañe bôte bese.

Krist mbômô bewômô miñwuan

²⁰ Teke bebé; Krist a wômôya miñwuan, e mbômô ya ba be wuya.

²¹ Aval ane awu e nga zu a môte wua, ñwômane miñwuane fe wo so a môte wua:

²² avale bese ba wu e be Adam, e be Krist, bese ba ye nyoñ ényiñ.

²³ Ve môt ase e nsamba wé: ôsusua bembômô Krist, wôna e ba be ne ba be Krist, éyoñ a ye so;

²⁴ wôna asuʼulan da ye so, éyoñ a ye ve Zambe Esaa njôan, éyoñ a maneya tyam éjôé ése, a ngule njôan ése, a éwôlô ése.

²⁵ Amu a yiane jôô, akekui a mane futi besiñe bé bese e mebo méé si.

²⁶ Nsiñ a ye suʼulane bôé a ne awu,

²⁷ Ve éyoñ a ye jô na, biôme bise bi ntoo éjôé si, ô vaa ve Nyô a nga bo na, biôme bise bi tabe éjôé jé si.

²⁸ A éyoñe biôme bise bi maneya tabe éjôé jé si, éyoñe te mon émien a ye ke éjôé si ya be Nyô a nga telé biôme bise éjôé jé si; ndembene Zambe a ye bo jôm ése e be bese.

²⁹ Nge e nga ye bo aval afe, e bôte ba duban asu mimbim be nga ye bo aya? Nge toʼo jé nge jé, miñwuan mi nji wômô, ba duban asu dap amu jé?

³⁰ A bia bebien, bia tabe e be angôndô été amu jé?

³¹ Mimôse mise, ma wu, avale fe e ne bebela a bobejañe na mi ne jame ma nguane de e be Yésus Krist Nti wongan.

³² E nga ye volô me jé na me wosane betit ya Eféze, nge me too ye timbi a asimesane bôt? Nge miñwuan mi nji wômô, a ntoo bia di a nyu, amu akiti, bia ye wu.

³³ Te duʼuban, mbia mewoso ma ndamane mbamba mefulu.

³⁴ Betaʼa bulane bi fek, a te boon abé ! Amu bôte bevoʼo ya be mia be nji yeme Zambe. Ma jô jame te na mi wôʼô ôson.

Menyôle bewômô miñwuan

³⁵ Ve môt éziñ a ye jô na miñwuan mia wômô aya? Ba so, be beʼe za nyôle?

³⁶ A wo akute môt! Jôme wo bé é ne bi ényiñ ve ja taté wu.

³⁷ A jôme wo bé é nji bo élé ja ye faa, ve nsoé fese nlisi nge mvoñe fe éziñ.

³⁸ A Zambe a ve je nyôl aval a nyeʼe, a mvoñ ése avale dé.

³⁹ Nsôn éziñ ô nji bo ane wu ôvok: nkandan ô ne e zañe nsône môt, wu betit, e wu anon, a wu bekos.

⁴⁰ Menyôle ya yôp me ne, a ma ya si; a me nji faé avale da.

⁴¹ Mfaéan éziñ ô ne wu jôp, ôfe e wu ngon, e wu ôvok e wu ateté; ôteté wo kandane wu ôvok e mfaéan.

⁴² Avale te ñwômane miñwuan ô né. Nyôle ja béban é too nyô ja ndaman. Ve ja wômô é too nyô é nji ndaman.

⁴³ Ja béban é too jôme ba biasé, ve ja wômô njalan a étôtok; ja béban ateʼe été, ve ja wômô njalan a ngu;

⁴⁴ Ja béban nyôle tit, ve ja wômô nyôle nsisim . Nge nyôle tit é ne, nyôle nsisim é ne fe.

⁴⁵ Ajô te nde e ne ntilane na: E môt ôsu, Adam, a mbe tit é bili ényiñ. Adame mvua, a ne nsisim wo ve ényiñ.

⁴⁶ Ve jôm é ne ji ya ôsu é ne tit, saa nsisim; wo zu zu mvus.

⁴⁷ E môt ôsu nyoñane metek, a ne metek. E môte baa nye a so yôp.

⁴⁸ Aval ane môt a so metek a nga too, avale te fe ba metek be né. Avale nyô a so yôp a né, avale te fe ba ya yôp ba ye bo.

⁴⁹ Avale bi nga too éveʼela môte a so metek, bia ye fe bo éveʼela môt a so yôp.

⁵⁰ E jame ma yemete, nde di, a bobejañ: minsôn a metyi bi se nguleya nyoñe ngap éjôé Zambe, nge jôme ja ndaman e nyoñe ngabe jôm é ne te ndaman.

Ntyendan a ndañan bia suʼulan

⁵¹ Ma zu bo na mi yeme nsolane jam. Bia ye bo te wu bese, ve bia bese bia ye veñesan,

⁵² été été, ane nkabeke dis, a tyiñe toñe ja suʼulan. Amu toñe ja ye kobô, miñwuan mia ye wômô te fe ndaman, a bia bia ye veñesan.

⁵³ Da yiane na, nyôle ja ndamane nyô, é jaé nyô é ne te ndaman, a na, nyôle ja wu nyô, é jaé nyô é ne te wu.

⁵⁴ Wôna éyoñe nyôle ja ndaman é maneya jaé nyô é ne te ndaman, éyoñe te éfia mintilan ja ye tôébane na: Awu e nga mineban e ndañan été.

⁵⁵ A awu, ndañane wôé ô ne vé? A awu, nlôbane wôé ô ne vé?

⁵⁶ Nlôban awu ô ne abé . A ngul abé é ne metiñ.

⁵⁷ E mvaʼane Zambe akéva, nye a ve bia ndañan, amu Nti wongan Yésus Krist.

⁵⁸ Ajô te, a bobejañe ma nyeʼe, yemane ngu, te afôʼôsan, kelan ôsu éyoñ ése ésaé Nti été, mi yeme na, njuʼu wônan ô nji bo zesé e be Nti.