1 Ko 14 - Bible en langue Bulu

Mimfefé mi mam ajô mimveane mi Nsisim

¹ Jeñane nyeʼan, kômbaʼane mimveane mi Nsisim a dañe dañ, nkulane mejô.

² Amu nyô a kobô minkobô a nji kobô bôt, ve Zambe. Teke môt a wôʼô nye. A ngule Nsisim, a kobô minsolan mi mam.

³ Ve môt a kulu mejô a kobô bôt. A kômôtô, a lep, a ve ngule nlem .

⁴ E môt a kobô minkobô a kômôtô émien, ve môt a kulu mejô a kômôtô ékôane bôt.

⁵ Yaa, ma yi na, mia bese mi kobô minkobô , ve ma dañe kômbô na mi kulu mejô. Nyô a kulu mejô a dañe nyô a kobô minkobô , vengevenge ve a kôñelane mie, ane ékôane bôt ja ye nyoñe ngu.

⁶ A bobejañ, bi tame jô na, ma zu jome mia, a taté kobô mia minkobô . Me ne mia mfi e vé nge bifia biam bi nji liti mia: nkulane mam, nge ñyeman, nge nkulane mejô, nge ñyeʼelan?

⁷ Nalé ate bibômebômé mezik bi né, mfañ nge mvet: nge bi nji ve metyiñ me too nkandan, za a ye yeme tyiñe mfañ nge nyô mvet?

⁸ Nge toñ é nji wôʼé ne sañesañ, za a ye kômesane bita?

⁹ Avale te e be mia: nge ôyeme wônan ô nji kobô bifia bia wôʼé bôte melo, ba ye wôʼô jôm mia jô aya? Mia ye kobô e ñyem.

¹⁰ Me nji yem abime mevale bifia e nee si nyô, a teke jia é ne teke atinan.

¹¹ Amu nge ma dimi mfi ya éfia éziñ ma ye bo njin e be môt a kobô, a môt a kobô fe njin be ma.

¹² Nalé fe mia, jeñane na, Nsisim a kobô mia abim abui da yian, amu jame te da dutu mia; ve nalé a bobaʼan asu ya lôñ ékôane bôt.

¹³ Amu ajô te nyô a kobô minkobô , a yiane yeʼelane na, a bi mveane ya kôñelane mie.

¹⁴ Nge ma bo meyeʼelan e minkobô , Nsisim a belane ma, ve atyeñe dam e nji wume bibuma.

¹⁵ Nde ñhe me bo aya? Ma ye yeʼelan a ngule Nsisim ve ma ye fe yia bia ane bôt ba ye wôʼô jôme ma yia.

¹⁶ Nalé a ne na, nge wo ve akéva a Nsisim, e môt a too ézezañe zezé bevôʼôlô a ye jô amén aya e mvean akéva wôé, éyoñ a nji yem e jame wo jô?

¹⁷ E ne été na, mvean akéva wôé ô ne beta jam, ve môte mbok a nji nyoñe mvolan.

¹⁸ Ma ve Zambe akéva amu ma kobô minkobô a lôte mia bese.

¹⁹ Ve da, ésulan été, ma yene mvaé ya kobô bifia bitane bôt ba wôk, asu ya yeʼele be, a dañe bifia toyini awôm e minkobô mife.

²⁰ A bobejañ, te boone bongô mfaʼa mfasan; mfaʼa abé , yaa boʼone bongô; mfaʼa mfasan, boʼone benya bôtô.

²¹ E ne ntilan e metiñ été na: Ma ye kobô ayoñe bôte di, a bôte ba kobô nkobô ôfe, a biyaé beyeñ, jaʼane nalé, ba ye bo te vôʼôlô ma. Nalé Nti a jô.

²² Ajô te minkobô mi ne ndem, saa mfaʼa bebuni , ve mfaʼa betebuni. Nkulane mejô ñwô ô ne ndem, saa mfaʼa betebuni, ve mfaʼa bebuni .

²³ Nge keké ése é sulaneya, a bôte bese ba kobô minkobô , ye zesé bôt nge betebuni ba nyiin, ba ye bo te buni na mi ne mekut?

²⁴ Ve nge bôte bese ba kulu mejô, nyô a ne te buni, nge zesé môt ja nyiin été, ja nyoñe minkomekan mi bôte bese a tyiʼibane mejô e be bôte bese.

²⁵ Nsolane jame ya nleme wé ô kuiya atan; a ye ku si bubutu a kañe Zambe a a ye meme na, Zambe a ne foʼo e zañe jenan.

Ngômôtô e bisulan été a e keké été

²⁶ A bobejañ, bi bo aya? Eyoñe mi sulaneya, môt ase ya e be mia a ne yia jia éziñ, a ne ve nyeʼelan éziñ nge nlitan éziñ, a kobô minkobô , nge fase mejô me Zambe, mame mese me bobaʼan asu mvolane bôte bese.

²⁷ Ye ba kobô minkobô ? Bebaé be kobôʼô, nge a dañedañ, belaa, a wua éyoñe nyô mbok a maneya. A môt éziñ a kôñelaʼan.

²⁸ Nge môte ya fas a nji bo, monyoñ a kpwaʼa évô ésulan été, a kobôʼô émien a Zambe.

²⁹ Mfaʼa minkulane mejô, bôte bebaé nge belaa, be nyoñe nkobô, wôna e ba bevok be fasek.

³⁰ Nge môt a too a bi nlitan éziñ, e môt a kobô a tabeʼe évô.

³¹ Mi ne ngule ya kulu mejô bese, ve da môt ase éyoñe jé, ane bôte bese be ne yéʼé a vebane ngule minlem.

³² Nkulu mejô a ne njôô nsisime nkulane mejô wo fôʼô nye.

³³ Amu Zambe a nji bo Zambe nzametane mam, ve nyôô mvoʼé . Avale da boban e bekeké mimfufube bese,

³⁴ binga be tabeʼe bivô e bisulan été, be nji bi nkañesane ya kobô, ba yiane suu bebiene si ane metiñ ma jô.

³⁵ Nge ba kômbô yéʼé jam éziñ, be siliʼi beyôme bap e menda. E nji yiane mvaé na, minga a kobô bikôan été.

³⁶ Ye ajô Zambe e nga téé e be mia? Ye mia étam mi nga nyoñe de?

³⁷ Nge môt éziñ a buni na a ne nkulu mejô, nge wôʼôtane na, Nsisim a kobô nye a yeme na, e jame ma tili mia di e ne abendé Nti.

³⁸ Nge môt éziñ a bo te kañese nalé, Zambe fe a nji yeme nye.

³⁹ Nde a bobejañ, mi dañe kômbô mveane nkulane mejô, a te kamane na be kobô minkobô ,

⁴⁰ ve mam mese me bobaʼan ane da yian a ngômôtô.