1 Ko 13 - Bible en langue Bulu

Jia Nyeʼan

¹ Jaʼane me nga ye kobô minkobô mi bôt a mi beéngele, ve te bi nyeʼan, me ne ve ézan ja duñ, nge nkeñ wo kobô ne kañ kañ.

² Jaʼane me nga ye bi mveane ya kulu mejô, ñyemane minsolane mi mam mise, a ñyeman ôse; jaʼane me nga ye bi mbunan, e wu wo vaa minkô, nge nyeʼane wo jembane ma, me seke jôm.

³ Jaʼane me nga ye kabe biôme biame bise, e be bewôʼô zaé jaʼane ve nyôle jame na é dik, nge me nji bi nyeʼan, me nji bi maʼan mʼéziñ.

⁴ Nyeʼan vo jaé jibi, nyeʼan ô ne mvam , ô ne tee mesengan, tee ngunguan. O ne te bo mebun, ô ne te bo jam éziñ e ne abé . Ô ne te jeñe mfi wé ôbien,

⁵ Ô ne te yaa, ô ne te baʼale ôvitiʼi ziñ,

⁶ ô ne te vak a ékotekot, ve wo vak e benya mejôô été.

⁷ Wo jamé mam mese, wo buni mam mese. Wo tabe mame mese ndi nlem , wo jibi mame mese.

⁸ Nyeʼan ô nji man. Minkulane mejô mia ye bo momo. Minkobô mia ye man. Nyeman wo ye bo momo.

⁹ Amu ñyemane wongan ô bili nné, nalé fe nkulane mejô wongan.

¹⁰ Ve éyoñe jôm é ne ngum ja ye so, e jôm é bili nné ja ye bo momo.

¹¹ Eyoñe me mbe mongô, me nga kobô ane mongô, me nga simesan ane mongô. me nga fas ane mongô. Eyoñe me boya nya môtô, me jôʼéya mam me mongô.

¹² Eyoñe ji, bia yen e ngobé été, te tuʼa yemelan, ve éyoñe te ja ye bo bi lôane mesu. Eyoñe ji, ñyemane wom ô ne étun, éyoñe te ma ye yem ane me né.

¹³ Ajô te ñhe e mame mela mana me ne: mbunan, ndi nlem a nyeʼan, ve nyeʼan ñwô wo dañ anen.