1 Ko 12 - Bible en langue Bulu

Mimveane mi Nsisim

¹ Mfaʼa mimveane mi Nsisim, a bobejañ, me nji kômbô na, mi tabe ndiman été.

² Mia yeme na, éyoñe mi nga too bedimi Zambe, mi nga dutuban teke vañ, e be mimvumvuʼu bengunemelan.

³ Ajô te nde ma kate mia na: Teke môt éziñ a kobô a ngule Nsisime Zambe a ne jô na: Biyoʼé bi boʼo e be Yésus, a môt a se ngule ya jô na, Yésus a ne Nti, ve a ngule Mfufube Nsisim.

⁴ Mimveane mi mvam mi ne mevale meva, ve Nsisime wua.

⁵ Bisaé mevale meva, ve Nti a ne wua;

⁶ mimboon mevale meva, ve Zambe wua, nye a bo mam mese, e be bôte bese.

⁷ Ñyenan Nsisim wo veban e be môt ase asu mvaé bôte bese.

⁸ Nsisim a ve wua nkobô fek, a nyô mbok nkobô ñyemane mam.

⁹ Nsisim ate wua a beta ve môte mfe mbunan e Nsisime wua été a ve mfe mimveane ya saé bôt;

¹⁰ e be nyô mbok ngule ya bo bitua bi mam, e be mfe, nkulane mejô, e be nyô mbok ngule ya yemelane minsisim, mfe, mveane ya kobô minkobô; asuʼulan e be mfe ñyenane ya kalane mejô.

¹¹ Ve mame mete mese, Nsisim ate wua a étam nye a bo mame mese, a vaʼa môt ase mimveane mié mevale meva, ane a kômbô.

Bibuʼa mevale meva a nlatane nyôle jia

¹² E ne été na, nyôl é ne jia, ve é bili bibuʼa abui: ve bibuʼa bise ya nyôl, akôsa bo tañe jap, bia bo ve nyôle jia: avale te Krist a né.

¹³ Amu bia bese bi nga duban e Nsisime wua été, asu ya bo nyôle jia, Beyude nge Begrék, belo nge beti, a bia bese bi nga nyu e Nsisime wua été.

¹⁴ Nyôl é nji bo ébuʼa jia, ve abui.

¹⁵ Nge abo e nga ye jô na: Amu me nji bo akule wo, me nji bo ébuʼa ya nyôl, ye e nga ye bo te bo jôme ya nyôl amu nalé?

¹⁶ Nge alo e nga ye jô na: Amu me nji bo dis, me nji bo ébuʼa ya nyôl, ye e nga ye bo te bo jôme ya nyôl amu nalé?

¹⁷ Nge ngume nyôl ô nga ye bo dis, ñwôʼan ô nga ye bo vé? Nge bise bi nga ye bo alo, nyumelan ô nga ye bo vé?

¹⁸ Ve Zambe a nga tooé ébuʼa ése ya nyôl aval ane nkômbane wé ô né.

¹⁹ Nge nyôl ése é nga ye bo ve ébuʼa jia, nyôl é nga ye bo vé?

²⁰ Ajô te bibuʼa bi ne abui, ve nyôl é ne jia.

²¹ Dis e se ngule ya jô akule wo na: Me nji kômbô wo, nge nlô e jôô mekule mebo na, me nji kômbô mia.

²² Ve da dañe na, bibuʼa bi nyôle bia dañe yené atek, mbie bi bili beta mvolan,

²³ a bibuʼa bi nyôle bia nyoñ ane nge bi nji bi ésemé, mbie bia dañe wumulu, abime bi ne tee ésemé abime te fe bia belane bie a ésemé

²⁴ bi bi bili ésemé bi nji yi na be nyoñe bie abui njuk. Ve Zambe a nga taʼa nyôl, a ve abui duma e be ébuʼa é nji de bi,

²⁵ nalé nkandane mengam wo ye bo te yené e nyôl, ve na bibuʼa bi bômbô évevé mfaʼa ya jame da, bina a bi bivok.

²⁶ Nge ébuʼa jia ja kon bibuʼa bise bia yiane kabane mintaé mié; nge ébuʼa jia ja wum, e bi bivok bia kabane mevaʼa mé.

²⁷ Amu mi ne nyôle Krist, a mi ne bibuʼa bié, môt ase asu ngabe jé.

²⁸ A, e ba Zambe a nga telé e keké été be ne: ôsusua minlôman, nsamba baa, bekulu mejô, e wu lale beyeʼele wôna mveane ya bo bitua bi mam, wôna wu ya saé bôt, wu ya volô bôt, wu ya jôô, mveane ya kobô minkobô .

²⁹ Ye bese be ne minlôman? Ye bese be ne bekulu mejô? Ye bese be ne beyeʼele? Ye bese ba bo bitua bi mam?

³⁰ Ye bese be bili mveane ya saé bôt? Ye bese ba kobô minkobô ? Ye bese ba fase mejô me Zambe?

³¹ Mi dañeʼe kômbô mimveane mia dañe mvaé. A ma ye beta liti mia e zene ja dañ abeñ.