1 Ko 10 - Bible en langue Bulu

Eveʼela Beyude e nkôte si

¹ A bobejañ, me nji kômbô mi dimi de na: Bʼésa bangan be nga to bese e nkute si, bese be nga tulane mañ.

² A bese be nga duban e be Môze e nkut été, a e mañ été.

³ Bese be nga di avale bidi ya nsisime da,

⁴ a bese be nga nyu avale menyu da ya Nsisim; amu be nga nyu mendim me soʼo akoʼo nsisim , e mbe e tôñe be: akoʼo te e mbe Krist.

⁵ Akôsa bo nalé, abui ya be be e nji yené mvaé e mise me Zambe, amu mimbime miab mi mbe abui e nkôte si.

⁶ Mam mete me nga kui ane biveʼela mfaʼa wongan, ane bia ye bo te nyamete abé avale be nga nyamete de.

⁷ Te boone bekañe bengunemelan, ane bevoʼo ya be be, ane e ne ntilane na: Bôt be nga tabe si, a di, a nyu, wôna be nga kôlô si a vôman.

⁸ Nalé fe e mboʼone te ve biabebien ébamba avale bevoʼo ya be be be nga bo: môse wua wua, be nga wu toyini mewôm mebaé a éla.

⁹ Mboʼone fe te bôbôlô Nti, avale bevoʼo ya be be be nga bo: ane benyo be nga jiane be.

¹⁰ Nalé fe te kobane menyiñ, aval ane bevoʼo ya be be be nga bo: njiane bôt a nga jiane be.

¹¹ Mam mete me nga kui e be be ane biveʼela, a tilibane asu ya yeʼele bia, e bia bete bi kuiya asuʼulane biyoñ.

¹² Ajô te, môt a simesane na a tele, a tabeʼe ntyele ya ku!

¹³ Teke meveʼele me nga kui e be mia, me too tee nkôñe môt. Zambe a ne nyô ya buni; a ye bo te kañese na, mi tôbane mebôbela ma lôte mia nkôñ. Ve awolo mebôbelaʼa , a ye ve mia zene ya tulan a ngule ya jibi me.

Teke mfulaʼan éziñ a mimbia minsisim

¹⁴ Ajô te, a bôte bam ma dañe nyeʼe, mataʼane nkañane bezambe befe.

¹⁵ Ma kobô mia ane bôte be ne mimfefek; miabebien tyiʼane jam ma jô.

¹⁶ Elaé bibotan bia botan, ye é nji bo fufulu nlatan a metyi me Krist? E fembé bia bek, ye é nji bo fufulu nlatan a nyôle Krist!

¹⁷ Amu fembé é ne jia, bia bese bi ne nyôle jia: amu bia bese bia kabane fembé jia éte.

¹⁸ Fombaʼane bone be Israél e minsôn: e ba ba di mimbim betit ba ve bityiʼa , ye be nji bo nlatan a ataʼa metunaʼa?

¹⁹ Ma kômbô jô aya? Ye na e tite ja veban e be ngunemelan nge na ngunemelan be ne jôm éziñ e be bebien?

²⁰ Momo, ve na: Amu bityiʼa biap bia vebane e be mimbia minsisim, saa Zambe, me nji kômbô na mi fulan a mimbia minsisim.

²¹ Mi se ngule ya nyu élaé Nti, a nyu fe élaé mimbia minsisim; mi se ngule ya bo benyoñe ngap be tawôlô Nti, a nyô mimbia minsisim.

²² Nge na, ye bia soñ abane Nti? Ye bia dañe nye ngul?

Mam mese ve asu Duma Zambe

²³ Mam mese me ne nkañesane ya boban, ve mese me nji yiane boban. Mame mese me ne nkañesane ya boban, ve mese me nji lôñ.

²⁴ Môt éziñ a boʼo te jeñe mvaé jé émien, ve nyô môte mbok.

²⁵ E jôm ése ba kuan éwônga, jaʼane je tee nsili amu ajô mone môte ya nlem .

²⁶ Amu si nyô, a biôme bise bi nee été, bi ne biôme bi Nti.

²⁷ Nge nyô a ne te buni a bañete mia a kañese na mia ke, jaʼane jôm ése ba ve mia teke sili nsili, amu ajô mone môte ya nlem .

²⁸ Ve nge môt éziñ a jô mia na: Tit é nga veban étyiʼa e be bengunemelan nje le, te dian, amu ajô nyô a te kate mia, a ajô mone môte ya nlem .

²⁹ Ma kobô, saa ajô mone môte ya minleme mienan, ve ajô éñwé. Amu na, éto fili jam ja tyiʼiban ajô aya a mone môte ya éza nlem ?

³⁰ Nge ma di bidi a mveane akéva, amu jé me ne nyoñe minkomekan mfaʼa jôm ma vee je akéva?

³¹ Ajô te, jaʼane mia di, nge nyu, nge bo jé, boʼone mame mese asu duma Zambe.

³² Te boon ékolé ôbak mfaʼa môt éziñ, nge mfaʼa mone Beyude, nge mfaʼa mone Begrék, nge mfaʼa keké Zambe.

³³ Ajô te mamien, ma ve ngule ya yené mvaé e be bôte bese a e mam mese, teke jeñe mvaé jam mamien, ve nyô ngabe bôt ja dañ abui nde ba ye nyiiban.