1 Jn 5 - Bible en langue Bulu

Ndi ya mvam ô ne mbunan ya buni Mone Zambe

¹ E môt ase a buni na Yésus a ne Krist, a bialéya e be Zambe. A nyô ase a nyeʼe Zambe a ne mbiaé, a nyeʼe fe nyô a ne mbilane be Zambe.

² E jame di bia yeme de na bia nyeʼe bone be Zambe, nge bia nyeʼe Zambe a jalé metiñe mé.

³ Amu nyeʼan Zambe vôme nyô ô ne na: Bi baʼale metiñe mé. A metiñe mé me nji bo adit,

⁴ éyoñ e ne na e nyô ase ane mbialane be Zambe a dañe si nyô. A ndañane si nyô ô ne mbunane wongan.

⁵ Zʼane ndañe si nyô, nge a nji bo na nyô a buni na Yésus a ne Mone Zambe?

⁶ Nye a nga zu a mendim a metyi, Yésus Krist. A saa ve a mendim étam, ve a mendim a metyi. A Nsisim nye a ne ngaa, amu Nsisim a ne nyô benya mejôô.

⁷ Belaa be ne bengaa e yôb été: Esaa, Ajôô a Mfufube Nsisim. A belaa be ne jôme jia.

⁸ A belaa be ne bengaa e si nyô: Nsisim, mendim a metyi, a belale ba kobô ve ajô da.

⁹ Nge bia kañese ngaa bôt, ngaa Zambe a dañ. Amu ngaa Zambe nye nyô: A ne ngaa ajô Mone wé.

¹⁰ Nyô a buni Mone Zambe a bili ngaa ate e be émien. Nyô a bo te buni Zambe a nyoñe nye ane nlaa minsos, amu a nji buni ngaa Zambe a nga bo ajô Mone wé.

¹¹ Ngaa ate nye nyô: Zambe a nga ve bia ényiñe ya melu mese, a ényiñ éte é ne be Mone wé.

¹² Nyô a bili Mon, nye a bili ényiñ: nyô a nji bi Mone Zambe, a nji bi ényiñ.

¹³ Me nga tili mame mete mese, amu mi yeme na mi bili ényiñe ya melu mese, mia mia buni a jôé mone Zambe.

Ndi minlem bi bili be nye

¹⁴ Ndi minlem bi bili e be nye nje nyô: nge bia jaʼé nye jôm, aval ane nkômbane wé ô né, a wôʼô bia.

¹⁵ Ajô te, amu bia yeme na a wôʼô bia éyoñ bia sili nye jam éziñ, bi too ndi na bi mbili jôm bi nga sili nye.

¹⁶ Nge môt éziñ a yene monyañ a bo abé , avale abé e ne te kui awu, a yeʼelaʼan, a Zambe a ye ve nye ényiñ, nge abé te e ne foʼo di e nji kui awu. Abé da kui awu e ne. Saa ajô mbo abé avale te nde ma jôô de na be yeʼelan ajô dé.

¹⁷ Mbia mboon ase a ne abé , ve abé ese e nji kui awu.

¹⁸ Bia yeme na, e nyô ase a nto mbialane be Zambe a nji fe bo abé . Ve Mone Zambe a baʼale nye, a mbia môt a nji fe bi ngule ya jôô nye.

¹⁹ Bia yeme na, bi ne ba be Zambe, ve si nyô ése e ne éjôé mbia môte si.

²⁰ Bia yeme na Mone Zambe a nga so. A nga ve bia atyeñe ya yeme nyô a ne Nyaa, a Bebela! Bi ne be Nyô ane Nyaa e be Mone wé Yésus Krist. E nye a ne bebela Zambe a ényiñe ya melu mese.

²¹ A ayôme bone dam, mataʼane bengunemelan.