1 Jn 4 - Bible en langue Bulu

Ñyemelane minsisim zene ya mbunan

¹ Ve mi veʼelan minsisim, mi yem, nge mi ne mi mi Zambe. Amu abui bekulu mejô meduʼan e maneya mialane si nyô.

² A e zene nyô mia ye yemelane Nsisime Zambe. Nsisim ôse wo meme Yésus, nyô a nga bialé e minsôn, ô ne wu Zambe.

³ A nsisim ôse wo bo te meme nye nalé, ô ne nsiñe Krist, nye mi nga wôʼô be jôʼô na a ye zu. A a taté éyoñe ji, a ntoo si nyô.

⁴ Ve mia, a ayôme bone dam mi ne be Zambe, mi ne bedañ bekulu mejô bete, amu nyô a ne zañe jenan, a dañ anen a lôte nyô ya si nyô.

⁵ Be ne ba ya si nyô a ba kobô nkobô ya si nyô. A si nyô ja vôʼôlô be si nyô,

⁶ ve bia bi ne ba be Zambe. Nyô a yeme Zambe a vôʼôlô bia. Nyô a nji bo nyô Zambe, a ne te vôʼôlô bia. Vôm ate bia yemelane nsisime benya mejôô a wu minsos.

Nyeʼan wo so e be Zambe a lat a mbunan

⁷ A bôt ma nyeʼe e nyeʼesané zañe jangan, amu nyeʼan wo so e be Zambe, a nyô ase a nyeʼe nye a nto mbialane be Zambe a akui vôme ya yeme Zambe.

⁸ Nyô a nji nyeʼe a nji yeme Zambe, amu Zambe a ne nyeʼan.

⁹ Avale di nde nyeʼane Zambe ô nga yené zañe jangan: Zambe a nga lôm atyiʼi Mone dé e si nyô, nde bia ye nyiñ amu nye.

¹⁰ E jôme ba loone nyeʼan é ne na: Saa bia bi nga nyeʼe Zambe. Ve nye a nga nyeʼe bia, a lôm atyii Mone dé, étyiʼa metunaʼa ya mam abé mangan.

¹¹ A émbame ma nyeʼe, nge Zambe a nga nyeʼe bia nalé, bia yiane fe nyeʼesane zañe jangan,

¹² Zambe a too e be bia. A nyeʼane wé ô jalébaneya e be bia.

¹³ E jame di bia yeme na bi too e be nye, nyeʼe ki e be bia. A nga ve bia Nsisime wé.

¹⁴ A bia, bia kañete amu bi yemeya nye, a na, Esaa a nge lôme Mone wé si nyô aval ane Nyii bôt ya si nyô.

¹⁵ E môt ase a meme na, Yésus a ne Mone Zambe, Zambe a too e be nye e be Zambe.

¹⁶ A bia yem, amu bi nga buni nyeʼane Zambe a nga liti zañe jangan. Zambe a ne nyeʼan. Nyô a too nyeʼan été a too e be Zambe, a Zambe a too e be nye.

¹⁷ E jame di nde nyeʼan wo jaléban e be bia; e ne na: Bi ne njalan a ndi minlem môse ntyiʼane mejô. Amu aval a né, avale te fe nde bi ne si nyô,

¹⁸ Woñ ô nji bo nyeʼan été. Ve nya nyeʼane a vaa woñ, amu woñ ô ne amu melep . A môt a ko woñ a nji bo njalan e nyeʼan été.

¹⁹ Bia nyeʼesan amu nye a nga taté nyeʼe bia.

²⁰ Nge môt éziñ a jô na: Ma nyeʼe Zambe! Ve a viniʼi monyañ wé, a ne nlaa minsos. Amu, e môt a ne te nyeʼe monyañ a lôô a mis, a se ngule ya nyeʼe Zambe a nji yen.

²¹ Atiñe di nde a nga ve bia. E môt a nyeʼe Zambe, a nyekeʼe fe monyañe wé.