1 Jn 3 - Bible en langue Bulu

Bone be Zambe

¹ Yenan abime nyeʼan Nti a nga nyeʼe bia ane bia lobane na bone be Zambe! A bi ne nalé. Amu ajô te si ndôn é se ngule ya yeme bia, é nji yeme Zambe.

² A bôt ma nyeʼe, a taté éyoñe ji, bi ne bone be Zambe. Ve avale bia ye bo nde e ngenane te tuʼa yemeleban éyoñe ji. Ve bia yeme na éyoñ a ye yené, bia ye funane nye, amu bia ye yene nye aval a né.

³ A e môt ase a telé avale ndi nleme te e be nye a telé émien étyi, amu a ne étyi.

⁴ E môt ase a bo abé a tyame memvinda. Amu abé e ne ntyamane memvinda.

⁵ Ve mia yeme na, a nga zu amu na, a vaa abé . Abé e nji bo be nye.

⁶ E môt a too e be nye a nji fe bo abé . E nyô a bo abé a nji yene nye nge yeme nye.

⁷ A ayôme bone dam, môt a boʼo te duʼu mia. E môt a bo zôsôô , a ne zôsôô aval ane a ne zôsôô .

⁸ E nyô a bo abé a ne nyô Satan, amu Satan a ne mbo abé a so atataʼa. Amu ajô te Mone Zambe a nga yené amu a tyame bisaé bi Satan.

⁹ E nyô a nto mbialan e be Zambe a nji bo abé , amu e mvoñe jé é béé be nye, a voʼo fe bo abé amu a nto mbialane be Zambe.

¹⁰ A zen éte, ba yemelane bone be Zambe a bone be Satan. Nyô ase a nji wulu zôsôô a nji bo mone Zambe. Avale te fe nyô a ne te nyeʼe monyañe wé.

Mboone mvam ane Mone Zambe

¹¹ Amu foé été nje mi nga wôk a so atataʼa na, bi nyeʼesan, wua a nyô mbok.

¹² Saa aval ane Kaéñ, amu a mbe nyô mbia môt, a nga tyiʼi monyañe wé tyiñ . A nga tyiʼi nye tyiñ amu jé? Amu mimboone mié mi mbe abé , e mi mi monyañ ke mvaé.

¹³ Te seman, a bobejañ nge si nyô ja siñe mia.

¹⁴ Mfaʼa wongan bia yeme na bi kôlô ya awu a kui ényiñ ve nné ane bia nyeʼe bobejañ. E nyô a ne te nyeʼe a too awu été.

¹⁵ Nyô a vini monyañ a ne ñwôé bôt. A mia yeme de na, teke ñwôé bôt a bili ngap ényiñe ya nnôm éto é too e be nye,

¹⁶ Amu jame di, a taté éyoñe ji, bia yen nyeʼan Yésus Krist a nga ve ényiñe jé amu ajô dangan. Bia fe bia yiane ve ényiñ jangan ajô bobejañ.

¹⁷ Nge môt éziñ a bili akume ya si nyô a lôô monyañe wé e mebua été, a bo te mvamane nye, nyeʼane Zambe ô too e be nye aya?

¹⁸ A ayôme bone dam e mboʼone te nyeʼe a nkobô ya biyaé, ve a mimboon a benya mejôô.

¹⁹ Amu jame te bia yeme na, bi ne ba benya mejôô, a bia ye volôbane minlem asu dé.

²⁰ Amu nge minleme miangan mia ve bia bijô, Zambe a dañe minleme miangan, a a yeme mame mese.

²¹ A ba ma dañe nyeʼe, nge minleme miangan mi nji ve bia bijô, bia kobô Zambe a ndi minlem ése.

²² A e jôm ése bia sili, bia ye nyoñe je e be nye, amu bia baʼale metiñe mé a bo mam a nyeʼe.

²³ A dina e ne atiñe dé. Bi buni mone wé Yésus Krist a nyeʼesan bia bia aval a nga ve bia atiñ .

²⁴ Nyô a baʼale metiñe me Zambe a too e be Zambe a Zambe a too e be nye. Jame te nde bia yeme na a too e be bia amu Nsisim a nga ve bia akap.