1 Jn 2 - Bible en langue Bulu

¹ Ayôme bone dam, ma tili mia jame te, amu na mi bo te bo abé . Ve nge da kui na, môt éziñ a bo abé , bi bili mvañ, e nyô émien a ne zôsôô e fefel Esaa, Yésus Krist.

² Amu émien a ne étyiʼa ya metunaʼa amu mam abé mangan, a saa ve émangan étam, ve nalé fe mfaʼa ma ya si ése.

Atiñe nyeʼan

³ A e jame di nde e ne ndeme na bia yeme nye: nge bia baʼale metiñe mé.

⁴ E nyô a jô na, ma yeme nye, ve te baʼale metiñe mé, a ne nlaa minsos, a a nji bo môte benya mejôô.

⁵ Ve môt a baʼale ajô dé e be émien, tekeʼe bisô na nyeʼan Zambe ô toébaneya e be nye, jame te étam nde bia yen na bi ne be nye.

⁶ E môt a kômbô jô na, a too e be nye a yiane ñhe wulu zen a nga wulu.

⁷ A bôt ma dañe nyeʼe, me nji tili mia mfefé atiñ , ve nnôm atiñ ñwô mi nga wôk a so atataʼa. Nnôm atiñ ôte ô ne ajô mi nga wôk aso atataʼa.

⁸ A kôsa bo nalé, a ne foʼo ve mfefé atiñ ñwô ma tili mia. E ne nalé mfaʼa wé a mfaʼa wônan éyoñ a ne na dibi e nga mam a nya éfufup ki a nga faé.

⁹ Nyô a veʼe feʼe na a nyiñ éfufup été; ve a vinii monyañ wé, a ngenan ve dibi été.

¹⁰ Nyô a nyeʼe monyañ wé, nye a too éfufup été a teke jame ya kolé ôbak e ne be nye na a ku.

¹¹ Ve nyô a vini monyañe wé a ne dibi été a te yeme vôm a ke, amu dibi e dibeya nye mis.

Enyiñ mbuni e si nyô

¹² Ma tili mia de, a ayôme bone dam, amu mam abé menan me jambaneya amu jôé Yésus.

¹³ Ma tili mia de a beésa amu mia yem nyô a too aso atataʼa. Ma tili mia de a bisoé bi bôt, amu mi dañeya mbia môt ate.

¹⁴ Ma tili mia a ayôme bone dam amu mia yem Esaa. Ma tili mia a be ésaa amu mia yem nyô a too aso atataʼa. Ma tili mia de a bisoé bi bôt, amu mi ne ngu, a Ajô Zambe e too e be mia, a mi ne bedañe mbia môt.

¹⁵ Te nyeʼane si nyô nge mam me ne été. Nge môt éziñ a nyeʼe si nyô, nyeʼan Esaa ô nji bo e be nye,

¹⁶ amu mam mese me ne si nyô aval ane: nkômbane ya minsôn, nkômban ya bi e mam ma yené a mis a ntabane mebun e be mame ya si nyô, bi nji so e be Esaa, ve si ndôn.

¹⁷ Amu si ndôn ja lôt, ébien a mbia nkômban ya été. Ve môt a bo nkômbane Zambe a tabe nnôm éto.

Besiñe Krist

¹⁸ A ayôme bone dam, awolo da suʼulan nde di. Mi nga wôʼô be jôʼô na nsiñe Krist a zu. Ve a taté éyoñ ébiene ji, besiñe Krist be nto. Amu jame di bia yeme na, asuʼulan e nto bebé.

¹⁹ Be nga too e be bia, ve be nji bo émbangan. Nge be nga ye bo émbangan, ve be nga ye tabe a bia. Ve be nga kôlô e be bia, nde da ye yené ne ngeññ na, teke wua ya e be be a mbe éñwongan.

²⁰ Ve mfaʼa wônan mi nga nyoñ Mfufup Nsisim, ñwoʼon wo so e be nyô a ne mfufup, a mia bese mi bili ñyeman.

²¹ Me nji tili mia amu na mia dimi benya mejôô, ve amu na, mia yeme me, a na, minsos mi nji bo e benya mejôô été.

²² Za a ne nlaa minsos? Nyô a sôane na, Yésus a ne Krist. Nsiñe Krist ñhe le, nyô a sôan Esaa a Mon.

²³ Nyô ase a sôane Mon, a nji bi Esaa. Ve nyô a meme Mon, nye a bili fe Esaa.

²⁴ Mfaʼa wônan, foé mi nga wôk a so atataʼa é too e be mia. A nge é too e be mia, foé mi nga wôk a so atataʼa, wôna mia fe mi too e be Mon a e be Esaa.

²⁵ Avale te ngakaʼa émien a nga bo bia é né. E ne na ényiñe ya melu mese.

²⁶ Jame te nde me nga tyiʼi na, me tili mia ajô ba ba jeñe zene ya zametane mia.

²⁷ Mfaʼa wônan, nyôñan mi nga nyoñ Mfufup Nsisim, ñwoʼon wo so e be émien ô too e be mia. A mi nji yi na be beta yeʼele mia mi too e be nye.

²⁸ Ajô te, a ayôme bone dam, tabaʼan e be nye. Nde éyoñ a ye yené, bia ye bo njalan a ndi minlem, teke wôʼôson e nsoone wé.

²⁹ Amu mia yeme na, a ne zôsôô , yemane na, e nyô a bo zôsôô a ne mbialane be nye.