1 Bb. 8 - Bible en langue Bulu

Mveane Zambe nda . Meyeʼelane Solômon Zambe a yené be nye éyoñe baa

¹ Ane njô bôte Solômon a nga sulane bemvendé yʼIsraél, bivete bise ya meyoñ , bi ya menda me bôte me bone bʼIsraél e fefele jé Yérusalém na, be vaa éwolo élate Nti Sioñ, tisone David.

² Ane bôte bese yʼIsraél be nga sulan e fefele njô bôte Solômon e ngone Etanim nje é ne ngone zamgbwale, éyoñ abôk é né.

³ Ane bemvendé bese yʼIsraél be nga sulan a betuni be nga beʼe éwolo.

⁴ Ane be nga nyoñ éwolo Nti, e nda éndelé bendôbaʼan, a biôm bise bi nʼétyi bi mbe nda éndelé. Betuni a Belévit mbe be nga kee bie.

⁵ Njô bôte Solômon, a ékôane bôt ése yʼIsraél a nga bañete e fefele jé, be nga tebe asu éwolo. Be nga tyiʼi mintômba a benyak abui teke alañé, nge ayemé tañ bi mbe.

⁶ Betuni be nga zuu éwolo élate Nti e vôme wé, e vôm a ne ntelan étyi e nda été, e vôm a dañ étyi, a kui mefabe Bekerubime si.

⁷ Amu Bekerubim be nga ndamé mefabe map e yôbe ya vôm éwolo élat é nga yiane bômbô. Bekerubim be nga buti éwolo a mimbôñe mié yôp.

⁸ Nté mimbôñ ô nga volô na be yen mekuʼu map ô tele vôm a nʼétyi, ve teke yené éyoñ ô tele atan. Mi ne valé a zu kui môse wu.

⁹ Teke jôm éfe é mbe éwolo été ve bifase mekoʼo bibaé ya Môze a nga bôé été e nkôle Oréb, éyoñe Nti a nga bo élat a bone bʼIsraél éyoñ be nga kôlô si yʼEjipte.

¹⁰ Eyoñe betuni be nga kôlô vôm a nʼétyi, nkut ô nga yandane Ndaa Nti.

¹¹ Betuni be nji fe bo ngule ya tabe été na, be bo ésaé, amu nkut abui, amu étôtoʼo Nti é nga jalé Ndaa Nti.

¹² Ane Solômon a nga jô na: Nti a nga jô na, a ye tabe e dibi été!

¹³ Eyoñe ji me lôñeya wo vôme ya tabe, e vôm wo ye tabe nnôm éto!

¹⁴ Ane njô bôt a nga kôñelan asu dé a botan ékôane bôte ése yʼIsraél. Ekôane bôt ése yʼIsraél é nga tele tetele.

¹⁵ Ndʼa nga jô na: Ébotan a Nti, Zamba Israél, Nyô a nga kobô Esaa wome David a anyu dé ebien, a nye a jalé jam a nga jô a ngule jé;

¹⁶ ataté môse me nga vaa Israél ayoñe dam Ejipte, me nji tabe tison éziñ ézezañe meyoñ mese yʼIsraél na, be lôñe nda été e vôme jôé dam da ye tabe, ve me nga tobe David na a bo ntebʼôsu ya ayoñe dam Israél.

¹⁷ Esaa wom David a nga bi nkômbane ya lôñe jôé Nti, e Zambe Israél nda .

¹⁸ Ve Nti a nga jô Esaa wome David na: Amu ô biya nkômbane ya lôñe jôé dame nda , ô nga bo mvaé ya bi jame te e nlem .

¹⁹ Ve jame da na, saa ke wo wo ye lôñe nda; nyô mon nyô a ye vame miñya miôé, nye a ye lôñe jôé dame nda .

²⁰ Nti a tôéya nkobô a nga kobô. Me tebeya éjian ésaa wome David, avale Nti a nga jô, a me lôñeya jôé Nti, e Zambe Israél nda .

²¹ Me baʼaleya ngume vôm été asu éwolo, e vôm élate Nti, élat a nga bo a bʼésaa bangan éyoñ a nga vaa be si yʼEjipte.

²² Ane Solômon a nga tebe tetele ôsu ataʼa metunaʼa Nti, a tele ékôane bôt ése yʼIsraél ôsu. A nga same mo yôp a jô na:

²³ A Nti, e Zambee Israél! Zambe mfe a nji bo ane wo, nge yôp mfaʼa ya yôp, nge si mfaʼa ya si; wo baʼale élat a mvam e be bebo bisaé bôé ba wulu vôm ô né a nlem ôse!

²⁴ Avale te nde ô baʼaleya mfaʼa mbo ésaé wôé, ésaa wom David, e jam ô nga jô nye, a e jam ô nga jô a anyu dôé, wo tôé de e môse wu a wo wôé.

²⁵ Eyoñe ji a Nti, e Zambee Israél, baʼaleʼe, asu mbo ésaé wôé, ésaa wome David, e jam ô nga jô nye na: Ôsu viam, wo ye bo te jembane môt a tyendé wo éto njôan yʼIsraél nnôm éto, ma yi ve na bone be wulu mezene mam été ane da yian, be wulu vôm me né avale ô nga wulu vôm me né.

²⁶ Eyoñe ji, a Zambee Israél, nkobô ô nga kobô mbo ésaé wôé, ésaa wome David, ô ntoo ñhe ve tôéban!

²⁷ Ve jé! Ye Zambe a ye foʼo tabe e si? Tame yen, môp a môbe ya môp me se nguleya yiane wo, ngumane ki nda me maneya lôñe nyô!

²⁸ Ve jame da na a Nti, e Zambe wom, tukaʼa vôʼôlô meyeʼelan me mbo ésaé wôé a minjaʼane mié, ñyôn a meyeʼelan mbo ésaé wôé a liti wo e môse wu.

²⁹ Tame kui e mise môé e nda nyô alu baa môs , e vôme womien ô nga jô na: Jôé dam da ye tabe valé! Vôʼôlôʼô meyeʼelane mbo ésaé wôé a bo e vôme nyô.

³⁰ Wo ye wôʼô minjaʼane mi mbo ésaé wôé a mi ayoñe dôé Israél, éyoñ ba ye yeʼelan e vôme nyô. Wo wo ye wôk, e vôm ô too, e yôb été; wo ye wôk a wo ye jamé!

³¹ Nge môt a bo môt a ne nye bebé abé , a ba tindi nye na a kane ngana, nge ngana ja boban ôsu ya ataʼa metunaʼa dôé, e nda nyô,

³² wo wo ye wôk, ô too yôb été, wo ye bo jam éziñ, a wo ye tyiʼi bebo bisaé bôé ajô a ve môt a ku étom mekua, a bulane mboone wé e nlô wé yôp, mfaʼa ya kale nyô a ne zôsôô a bo nye avalʼane zôsôô wé a né.

³³ Eyoñ ayoñe dôé Israél da ye yiteban ôsu besiñ, amu mboon abé be boya wo, nge ba bulane be wo a kañe jôé dôé, nge ba yeʼelane wo a sili wo mam e nda nyôna,

³⁴ wo wo ye wôk ô too yôp, wo ye jamé abé ya ayoñe dôé Israél a bulane zuu be e si ô nga ve bʼésaa bap!

³⁵ Eyoñe yôp da ye diban, mveñ te fe nnoñ, amu abé be ne nguleya bo wo, nge ba yeʼelan e vôme nyô, be kañe jôé dôé a jôʼé abé dap,

³⁶ amu nsamelan wo ye samele be, wo wo ye wôk ô too yôp, wo ye jamé abé bebo bisaé bôé a di ayoñe dôé Israél. Amu wo ye yeʼele be mbamba zen ba yiane wulu été, a wo ye noo mveñ e si ô nga ve bôte bôé ane ngap!

³⁷ Eyoñe mfumbale zaé a ye kui e si, éyoñe bim a ye kui, éyoñe mieñgele nkôtan bidi bia ye bo, éyoñe bitandak a bembaʼasane ba ye kui,

³⁸ éyoñe besiñ ba ye bômane bôte bôé e si jab été, e mimbé miap, éyoñe bibubua mevale mese a akon bia ye bo, meyeʼelan mese a minjaʼan mise avale môt ese e ne nguleya liti wo asu ayoñe dôé Israél, a môt ase a yeme meveñe ya nleme wé a a same mo e mfaʼa ya nda nyô,

³⁹ wo wo ye wôʼô nye e yôp, e vôm ô too; wo ye jamé, a bo ane wo yene mvaé, a bulane môt ase avalʼane mezene mé me né, amu wo étam wo yeme nleme bôte bese.

⁴⁰ Eyoñe te ba ye ko wo woñ, éyoñ ése ba ye nyiñ éfuse si ô nga ve bʼésaa bangan.

⁴¹ Avale te fe mfaʼa mone bikuu a nji bo môte ya ayoñe dôé Israél, éyoñ a ye so si é nʼôyap, amu jôé dôé,

⁴² amu ba ye yeme na jôé dôé e nʼanen, akule wo dôé ngu a wo wôé nsaman, éyoñ a ye zu yeʼelan e nda nyô,

⁴³ wo wo ye wôk e yôp, e vôm ô too, a wo ye ve nneñ e jôm ése a ye sili wo meyeʼelane mé été, nalé meyoñ mese ya si ma ye yeme jôé dôé a ko wo woñ, avalʼane ayoñe dôé Israél, a be yeme na ba loone jôé dôé e nda me maneya lôñe nyô!

⁴⁴ Eyoñe bôte bôé ba ye ke wosane besiñe bap, be tôñe e zen wo ye liti be, nge ba yeʼelan Nti be lôô e tison ô nga top, a nda me maneya lôñe jôé dôé,

⁴⁵ wo ye wôʼô meyeʼelane map ô too yôp, nalé fe minjaʼane miap, a kale ajô dap!

⁴⁶ Eyoñ ba ye bo wo abé , amu teke môt a ne te bo abé , éyoñe wo ye yaa be a kalane be e mo besiñ, éyoñe ba ba ye bi be minkôm ba ye kee be minkôm e si besiñ, é too ôyap nge bebé,

⁴⁷ nge ba bulan e be bebien be too e si be nga kee be minkôm, nge ba bulane be wo, nge ba sili wo mam be too e si ba be nga kee be minkôm a jô na: Bi maneya bo abé , bi bili minkoban, bi boya jam e nʼabé!

⁴⁸ Nge ba bulane be wo a nleme wob ôse, a ényiñe jab ése; be too e si besiñ be nga kee be minkôm, nge ba yeʼelane wo mesu me lôô mfaʼa si ô nga ve bʼésaa, e tison ô nga top, e nda me maneya lôñe jôé dôé,

⁴⁹ wo ye wôʼô yôp, e vôm ô too, meyeʼelane map a minjaʼane miap, a wo ye ve be mekabe.

⁵⁰ Wo ye jamé bôte bôé abé dap be boya wo a mbia be mam bese be boya; wo ye bo na, bôt be bili be minkôm be nyoñe jame te ane jame ya ko be éngôngo, a ba ye ko be éngôngo.

⁵¹ Amu be ne bôte bôé a ngabe jôé, ba ô nga vaa Ejipte, ézezañe mbeʼe nduan étyé!

⁵² Tame kuʼi mise môé, e minjaʼan mi mbo ésaé wôé a mi ayoñe dôé Israél, a wôʼô be éyoñ ése ba ye loone wo!

⁵³ Amu wo ô nga kandé be a meyoñ mevoʼo mese ya si, a bo be ngabe jôé, aval ô nga jô e be mbo ésaé wôé Môze, éyoñ ô nga vaa bʼésaa bangan Ejipte, a Nti a too nnôm éto!

⁵⁴ Eyoñe Solômon a nga mane tote meyeʼelan mese ma a minjaʼane mi, a nga kôlô si, ôsu ya ataʼa metunaʼa, e vôm a nga kute meboñe si, mo me same mfaʼa ya yôp.

⁵⁵ A tele tetele, ane a nga botan ékôane bôt ése yʼIsraél tyiñe yôp a jô na:

⁵⁶ Ebotan a Nti, nyô a veya ayoñe dé Israél awoʼon, avalʼane jam ese a nga jô e né! Mbamba mejô mese a nga kobô be Môze mbo ésaé wé, teke ajô da e liʼiya te tôéban.

⁵⁷ Nti, e Zambe wongan, a tabeʼe be bia avale a nga too be bʼésaa bangan,

⁵⁸ a boʼo te liʼi bia nge vuane bia, ve a dutuʼu minleme miangane be nye, nalé bia ye wulu mezene mé mese été a baʼale mebendé mé, minjôane mié a memvinda mé mbie a nga ve bʼésaa bangan.

⁵⁹ Mejô me maneya kobô ane meyeʼelan be Nti, me tabeʼe Nti, e Zambe wongane bebé môs baa alu, a a vaʼa mbo ésaé wé a ayoñe dé Israél mekabe môs ane môs .

⁶⁰ Nalé meyoñ mese ya si ma ye yeme na, Nti nye a ne Zambe a mfe a nji bo.

⁶¹ Vaʼane nleme wônan ôse be Nti, e Zambe wongan, aval e ne môse wu, asu ya wulu avalʼane miñyeʼelane mié mi né a baʼale mebendé mé.

⁶² Ane njô bôt a Israél ase be nga ve bityiʼa asu be Nti.

⁶³ Ane Solômon a nga ve étyiʼa, étyiʼa ya nlatane ngbwa nje a nga ve Nti: benyak toyini mewôm mebaé a ébaé, mintômba toyini ntet a mewôm mebaé. Eyoñe te njôô a bôte bese yʼIsraél be nga dii ndaa Nti

⁶⁴ môs ôte, njô bôt a nga telé ézezañe ya nseñ ô ne ôsu ya ndaa Nti étyi; amu be nga ve bityiʼa bi ne ngumba, mimvean mi avut, a mevoñ, bityiʼa ya nlatane ngbwa.

⁶⁵ Solômon a nga jem abôk éyoñe te baa Israél ase. Beta ékôane bôt be soʼo anyiin Anat, a kui ôtôñe yʼEjipte, be nga tele asu be Nti, e Zambe wongan, tañe melu zamgbwa a melu mefe zamgbwa, mese melu awôm a menyin.

⁶⁶ E môse muame, nde a nga suu bôt. Be nga botane njô bôt a bulan e menda bindelé map; be nga bo mefôn, nlem njalan a mevak, amu mvaé ése Nti a nga bo mbo ésaé wé David a Israél ayoñe dé.