1 Bb. 6 - Bible en langue Bulu

Nlônane nda Zambe

¹ Mbu mintete minyin a mewôme muam, valé bone bʼIsraél be kôlôya si yʼEjipte, mbu nyini ya njôane Solômon a nga jôô Israél, e ngone baa ba loone Ziv, nje a nga lôñe Nti Nda.

² Nda njô bôte Solômon a nga lôñe Nti é mbe nté, menyiʼi me mo mewôm mesaman, ndam menyiʼi me mo mewôm mebaé, nté ya yôp menyiʼi me mo mewôm mela.

³ Mbé si ya zañ aba nda a atan, ô too nté, menyiʼi me mo mewôm mebaé, mveʼan mfaʼa ndame ya nda; ndame ki menyiʼi me mo awôm mfaʼa ñwôñelane nda .

⁴ Bevundi ya nda be nga bili mevote mʼétyé.

⁵ Be nga lôñe nda fe, é too bitage bilaa, é late a mimfine yʼatane ya beta aba a di e ne susuʼa.

⁶ Nda éte fe, mfaʼa ya si, ô mbe ndam méta ébaé a étun, étage ya ézezañ, ndam, méta éla, étage ya yôp, ndam, méta éla a étun. E mfine nda Zambe ya nseñ ô nji bo afib, avale da ane nté ya yôp ôse; ô mbe teke dañ afip nné ôse, ajô te nkpwase ya andil ô nji ke nyiin e mimfine ya nda Zambe si.

⁷ Asu ya lôñe Nda Zambe, be nga belane mekok avale me nga so e vôm be nga bôé me; ajô te nté be nga lôñe nda , be nji wôʼô toʼo éduñe vamak jia, nge ji ôfak nge ji évôl éfe é nʼétyé.

⁸ Eyoñ wo kômbô ke étage baa, be nga lôt e mbé ô mbe Nda Zambe mfaʼa ya nké. Nge ô kôlô mbé te éyoñ te wo nyoñe ôbet a ke kui étage baa, ô beta kôlô valé a kui étage lale.

⁹ Asu ya mane melôñ ya Nda Zambe be nga bo plafoñ a mimbôñ, nalé fe a mebam me Sédre.

¹⁰ E nda fe be nga lôñ é late a Nda Zambe, é mbe ôyabe yôp, méta ébaé a étun étage ése, a mimbôñ mi Sédre mi nga bete mimfine ya Nda Zambe yôp.

¹¹ Ane Nti a nga kobô Solômon a jô na:

¹² Wo lôñe Nda nyô! Ve nge wo wulu avalʼane metiñe mam me né, nge wo bo ane mefulu mam me né, a nge wo baʼale mebendé mam mese a wulu ane me né, éyoñe te ma ye tôé nkobô wom be wo, wu me nga kobô David ésoo.

¹³ A ma ye tabe ézezañe bone bʼIsraél a ma ye bo te vuan ayoñe dam Israél.

¹⁴ Ane Solômon a nga lôñe Nda a mane fe je.

¹⁵ Mimfine ya nda été mi mbe nlôñan a mebame me Sédre ataté si a kui mimbôñe ya yôp. Nda ése, mfaʼa yʼété, é too mboon a bilé. Si ya nda é mbe mebam me Sipré.

¹⁶ Mbômaʼane ya nda été, ataté si a kui yôp, ndam, menyiʼi me mo mewôm mebaé, a nga lôñe nye a mebam me Sédre. Mfaʼa yʼété, a nga bo étune nda é nʼétyi, e vôm a dañ étyi.

¹⁷ Aba nda e nʼanen e mbe menyiʼi me mo mewôm menyin.

¹⁸ Bilé bi Sédre bi mbe nda été bi mbe nkpwelan biveʼela bi sam é ne nkulan. Jôm ése é mbe mboon a Sédre, akok teke yené.

¹⁹ Ezezañe nda , mfaʼa yʼété, a nga kôm étune nda é nʼétyi asu ya bôé éwolo élate Nti.

²⁰ Ôsu ya étune nda é nʼétyi é too nté menyiʼi me mo mewôm mebaé, ndam menyiʼi me mo mewôm mebaé, nté ya yôp menyiʼi me mo mewôm mebaé a nje Solômon a nga mane yañe or, ataʼa metunaʼa e mbe valé, nde be nga mane dip a Sédre.

²¹ Nda, e mfaʼa yʼété, Solômon a nga mane dube je a or a ne mfuban , a tyelé minsanga mi or ôsu ya étune nda é nʼétyi, be nga mane fe dube or.

²² A nga mane dube nda ése or. Ataʼa metunaʼa e mbe étune nda é nʼétyi, a nga yañe de or.

²³ Etune nda é nʼétyi été, a nga kôme Bekerubim bebaé a élé ôlivié; be mbe nkôñe yôp tañe menyiʼi me mo awôm.

²⁴ Afabe da ya kérubim ôsu e mbe menyiʼi me mo metan; afab avok menyiʼi me mo metan; menyiʼi me mo awôm, ataté akuʼu ya afabe di a kui akuʼu ya afab avok.

²⁵ Menyiʼi me mo awôm asu kérubim baa; mebim a biyekaʼa, bi too avale da asu Bekerubim bebaane.

²⁶ Kérubim ôsu a mbe nkôñe yôp, tañe menyiʼi me mo awôm; nyô baa a mbe fe nkôñe yôp avale da.

²⁷ A nga telé Bekerubim e zañe nda été. Bekerubim be nga ndamé mefabe map: afabe kérubim ôsu e nga nnambe mfin, a afabe kérubim baa e nga nnambe mfin ôvok; mefabe map mebaé, ma me mbe mfaʼa ya zañe nda , me nga nnambane dina a di avok.

²⁸ A nga dube Bekerubim a or.

²⁹ Mbômaʼane mimfin, été a atan, be nga kpwelé Bekerubim, mebua melen a mesam me ne nkulan.

³⁰ A nga yañe si e nda été a atan.

³¹ Anyiine ya étune nda é nʼétyi, a nga bo bivine mimbé a élé ôlivié; mimbôʼô ya mbé yôp, a bilé bi beʼe évin bi nga di ngabe jia ya ngab étane ya mbé ôse.

³² A nga kpwele Bekerubim, mebua mʼalen a mesam me ne nkulan e bivine bibaé ya mbé , nde fe a nga dube be a or; a nga dube or e Bekerubim a e mebua melen.

³³ Avale te fe a nga bo anyiine beta aba nda; bilé bi ôlivié bi beʼe bivin bi nga di ngabe nyini ya ngume mbé ôse,

³⁴ a bivine bibaé, mboon a élé Sipré; bifase bilé bibaé bia fôʼôsan, asu évine mbé jia a bifase bilé bibaé bia fôʼôsan asu évine mbé évok.

³⁵ A nga kpwelé Bekerubim mebua melen a mesam me ne nkulan a dube me or, ve baʼé bie mbé ôte.

³⁶ Mvuse ya valé, a nga lôñe minseñe nda été: minnoñe mekoʼo me ne kpwelan mila a nnoñe mimbôñe mi Sédre.

³⁷ Mbu nyini, ngone Ziv, nde be nga bôé mimbôkaʼa ya Nda Nti.

³⁸ A mbu awôm a wua, ngone Bul é ne ngone muame, Nda é nga man ése mfaʼa ya mone jam ase a nga siliban. Solômon a nga lôñe je tañe mimbu zamgbwa.