1 Bb. 5 - Bible en langue Bulu

¹ Solômon a nga jôô meyoñ mese ataté ôsôé Efrat, si Befilisteñ, a kui nnéa Israél a Ejipte. Be nga yaʼane toya a saane Solômon nté ôse a nga vee.

² Bidi bi Solômon bi mbe môs ôse: avut e nji dañe nteʼan tôn ébu; avut é ne nteʼan abui tôn awôm a muam,

³ beyôm benyak be nʼavoñ awôm. Beyôm benyaʼa ya mbam: mewôm mebaé; mintômba ntet; te lañe minkok, bemvin, besô a bilolé bi nʼavoñ abui.

⁴ Amu a nga jôô mesi mese me nga bôman ôsôé Efrat, ataté Tifsa a kui Gaza, bejô bôte bese ya mesi ma bôman Efrat. Baa be mesi mese me nga bômane nye be mbe mvoʼé .

⁵ Yuda a Israél be nji bi jam da tyelé be minleme yôp, môt ase e ndiʼi woone wé a e figié wé si, ataté Dañ a kui Birséba, nté ôse Solômon a nga vee.

⁶ Solômon a nga bili bitabaʼa toyini mewôm menyin e vôme ya bikabela bia dutu bevagoñ bé bi ne tabe, nalé fe bewulu bikabela toyini awôm a ébaé.

⁷ Bengovina be nga ve biôm asu mbaʼalane njô bôte Solômon a bôte bese ba subu tawôlô njô bôte Solômon bebé, ngovina ase tañe ngone jia; be nji ke jôʼé jôm éziñ é jemban.

⁸ Be nga soo fe bidi asu bikabela e vôm ase njô bôt a nga too avale be nga sili môt ase.

Anen, duma a feʼe njô bôte Solômon

⁹ Ane Zambe a nga ve Solômon fek, atyeñ, a ñyemane mevale meva, ane nselek ô ne nsaʼa mañ.

¹⁰ Feʼe Solômon é nga lôte feʼe bone bese ya jôp da tôô a feʼe ése yʼEjipte.

¹¹ A nga dañe bôte bese fek, fek a dañ Etan ya Ezrahite, a dañ Eman, Alkol a Darda, bone be Mahol; meyoñ mese ma bômane Israél, me nga yeme jôé dé.

¹² A nga ku minkana toyini éla, a téé fe bia toyini jia a bia bitan.

¹³ Feʼe nkobô jé é nga nnambe bilé, ataté Sédre ya Libañ, a kui izôp a faa mimfin; a nga kobô ajô betit be beʼe mebo menyin, ajô anon, betit ba woñ a kos.

¹⁴ Bôt be nga wôʼô nkañete ya ajô feʼe Solômon be nga so be meyoñ mese a be bejô bôte bese ya si a zu wôʼô feʼe jé.

Solômon ba Iram, njô bôte ya Tir ba bo élat Ngômesane ya lôñe Zambe nda

¹⁵ Iram njô bôte ya Tir, a nga lôme bebo bisaé bé be Solômon, amu a nga wôʼô na be teléya nye njô bôt éjian ésaa; amu Iram a nga juʼu zu a bo mvôé David.

¹⁶ Nde Solômon a nga lôm be kate Iram na:

¹⁷ Wo yeme na David, ésaa wom, a nji kui na a lôñe nda asu jôé Nti, e Zambe wé, amu éndeñelaʼa besiñe bé be nga bômane nye, a bita, a nté ôse Nti a nji futi be akul abo dé si.

¹⁸ Vʼéyoñe ji, Nti, e Zambe wom, a veya ma awoʼon mimfaʼa mise, teke fe nsiñ nge bidim bia tyelé ma nleme yôp,

¹⁹ me bili nkômbane ya lôñe nda asu jôé Nti, e Zambe wom, avale Nti a nga jô David ésaa wom na: Mone wôé, nyô ma ye toé éjiane jôé, éto njôane jôé, nye a ye lôñe nda éte asu jôé dam.

²⁰ Ajô te éyoñe ji, vaʼa ngule na be tyiʼi ma besédre ya Libañ: bebo bisaé bam ba ye fulan a bebo bisaé bôé; ma ye ve wo maʼane bebo bisaé bôé, aval ese wo ye jô, amu wo yeme na teke môte ya be bia a yeme tyiʼi bilé ane Besidônieñ.

²¹ Nné ane Iram a nga wôʼô nkobô Solômon, a nga vak abui a jô na: Nti a te ve David monafam a ne feʼe naa a jôô ézuʼu bôte ji a boʼo ébotane den!

²² Iram a nga lôm be kate Solômon na: Me nyoñeya kalate wôé. Yaa, ma ye ve wo bilé bi Sédre a Sipré wo kômbô;

²³ bebo bisaé bam ba ye soo bie Libañ a kui mañ; ma ye kaʼa bie mimbom bi yeñ e mañe yôp a kui vôm wo ye liti na, nne ma ye kuli bie valé a wo, wo ye kee bie. Mfaʼa wôé, ma yi na, ô ve nda jame bidi.

²⁴ Ajô te Iram a nga ve Solômon bilé bi Sédre a bi bi Sipré abim ese a nga kômbô.

²⁵ A Solômon a nga ve Iram mbu ôse, tône blé ésaman a lita mbon ôliv wo dañe mvaé, toyini muam asu bidi ya nda jé.

²⁶ Nti a nga ve Solômon fek avale a nga jô nye. Mvoʼé é mbe e zañe Iram a Solômon, nde bese be nga bo élat.

²⁷ Njô bôte Solômon a nga telé bisaé bi étibelaʼa Israél ase été. Bôte toyini mewôm mela be nga ke été.

²⁸ A nga lôme be Libañ, ngon ése bôte toyini awôm be mbe be folaʼan, ngone jia e Libañ, ngon ébaé e menda map. Adoniram nye a mbe évete bisaé bite.

²⁹ Solômon a nga bili bebeʼe mekok toyini mewôme muam a bebôé mekok toyini mewôme muam;

³⁰ te lañe bivete bengovina be Solômon, be nga telé asu ésaé: befame toyini éla a mintete mila be nga jôô bôt ba bo ésaé.

³¹ Njô bôt a nga bendé na, be ke ba faʼa beta mekok , mekoʼo me ne mbaan asu mimbôkaʼa ya nda , mekoʼo me nʼanen.

³² Bebo bisaé be Solômon, e ba be Iram a ba be Gébal be nga ba, a kôme bilé a mekok asu nlôñane nda .