1 Bb. 4 - Bible en langue Bulu

Biwôlô bi bôte ya éjôé Solômon

¹ Njô bôte Solômon a mbe njôô yʼIsraél ase.

² Bivet baa be bie be nga saé mbie bi: Azariahu e mone Ntuni Sadok,

³ Elihôréf a Ahiya e bone be Sisa be mbe betilimam; Yôsafat e mone Ahilud, a mbe mbaʼale mintilan;

⁴ Benayahu e mone Yehoyada, a mbe mbaʼale nkane bita; Sadok a Abiatar be mbe betuni;

⁵ Azariahu e mona Natan a mbe évete bengovina; Zabud e mona Natan a mbe Ntuni, mvôé njô bôt;

⁶ Ahisar a mbe mbaʼale nda njô bôt; Adoniram, e mone Abda a mbe môt a fombô ane bisaé bia wulu.

⁷ Solômon a mbe a bili bengovina awôm a bebaé Israél ase. Be mbe be vaʼa biôm asu mbaʼalane nda njô bôt. Môt ase a mbe a vaʼa biôm tañe ngume ngon mbu ôse.

⁸ Biyôlé biap mbie bi: E mone Ur a nga bili minkôle yʼEfrayim.

⁹ E mone Déker a nga bili Makat, Saalbim, Bétsemék, Elôn a Bét-Anan.

¹⁰ E mone Eséd a nga bili Arubôt, Sôkô a si ése ya Séfer.

¹¹ E mone Abinadab a nga bili si ése ya Dor. Tapat ngone Solômon a mbe minga wé.

¹² Baana, e mone Ahilud, a nga bili Taanak a Mégidô, Bétséañ ase a ne bebé Tartan e Yizrél si, ataté Bétséañ a kui Abél-Mehôla, a kui fe Yakmeame yat.

¹³ E mone Géber e Ramôt ya Galad, a nga bili beta bitisone Yayir, e mone Manasé e Galad; a nga bili fe bifuse bi si ya Argôb a Basañ, beta bitison mewôm mesaman mbômaʼan a mimfine mekok mengôñ me too mvot.

¹⁴ Abinadab e mone Iddô e Manayim

¹⁵ Ahimaat e Néftali. Nye fe a nga luʼu ngone Solômon jôé na: Basmat.

¹⁶ Baana, e mone Usayi, e Azér a Béalôt.

¹⁷ Yosafat, e mone Parua e Isakar

¹⁸ Siméyi, e mone Ela e Bényamin.

¹⁹ Géber, e mona Uri, e si ya Galad; a nga bili afôla si ya Sihoñ, njô bôte Beamorééñ, a di Ôg njô bôte ya Basañ, ngovina a mbe ve wua si éte.

²⁰ Yuda a Israél be mbe abui ane nseleʼe ya nsaʼa mañ. Be nga di a nyu a bo mevak.