1 Bb. 3 - Bible en langue Bulu

Nti a yené be Solômon

¹ Ane Solômon a nga bo nnôme ngon Faraoñ, njô bôte yʼEjipte; a nga luʼu ngone Faraoñ a tabe e tisone David akekui a nga mane lôñe nda jé émien, e nyôô Nti a e mfine mekok wo bômane Yérusalém.

² Ve da bôt be nga ke ôsu a ve bityiʼa e bito bikôndôʼô yôp amu, a kui melu mete valé be ngenane te lôñe nda asu jôé Nti.

³ Solômon a nga nyeʼe Nti abui, ajô te a nga wulu avale David ésaa wé a nga lebe nye; vʼa nga ve bityiʼa a diʼi meyemete bilé ma nyume mvaé e bito bikôndôʼô yôp.

⁴ Ane njô bôt a nga ke Gabaoñ na a ve bityiʼa amu e nne éto yʼékôndôk ja dañ anen é mbe wé. Solômon a nga ve mimvean mia diʼibane ngumba toyini ataʼa metunaʼa te yôp.

⁵ E Gabaoñ, Nti a nga yené be Solômon a alu e biyeyem; Zambe a nga jô nye na: Siliʼi jôm wo kômbô na me ve wo.

⁶ Solômon a nga yalane na: Ô litiya abui mvam e be mbo ésaé wôé David ésaa wom, amu a nga wulu vôm ô né e bebela été, e nya ntyiʼane mejôô été a e zôsôô ya nlem été mfaʼa wôé; ô nga baʼale nyeʼane te e zañe mia nye, a kui vôme ya ve nye monafam, nye a too éto njôane jé e môse wu.

⁷ Eyoñe ji a Nti, e Zambe wom, wo wo ve mbo ésaé wôé éjôé, éjiane David ésaa wom, ma, me ne foʼo vʼôyôm ésoé ndôman, me nji yem ane ba jôô bôt.

⁸ Mbo ésaé wôé a too ézezañe ya bôte bôé, ba ô nga top, e jama bôt a ne te alañé nge ayemé tañ, amu étua abui.

⁹ Wo yiane ve mbo ésaé wôé nlem wo yeme yemelane mam asu ya jôô bôt, asu ya kandé mvaé ba abé; za a ne nguleya jôô ayoñe bôte dôé, ayoñe bôt e ne avalʼanene di?

¹⁰ Nti a nga yene nsili Solômon a nga sili mvaé.

¹¹ Nde Zambe a nga jô nye na: Amu wo te sili jame te, teke sili ayab ényiñ asu dôé womien, nge sili akum asu dôé, nge sili awu ya besiñe bôé, ve viane sili fek asu ya jôô bôt zôsôô ,

¹² tame yen ma bo ane wo te jô: ma ve wo nlem ô ne fek ô yeme fe fas a môt éziñ a nji bo wo ôsu nge mvuse jôé a too ane wo.

¹³ Nalé fe na, ma ve wo jôm ô nji sili: akum a duma; e bejô bôt été, teke môt a ye bo ane wo nté ôse wo ye nyiñ.

¹⁴ Nge wo wulu mezene mam été, ô baʼaleʼe metiñe mam a mebendé mam ane David ésoo, ma ye limiti ényiñe jôé.

¹⁵ Ane Solômon a nga vee: e nne biyeyeme bié bi mbe avale te. A nga bulan e Yérusalém a tebe ôsu éwolo élate Nti. A nga ve mimvean mi ne ngumba a mimvean asu mvoʼé , a a nga bo beta dina asu bebo bisaé bé bese.

Solômon ntyiʼi mejô

¹⁶ Binga bʼébamba bebaé be nga zu tebe njô bôt ôsu.

¹⁷ Wua a nga jô na: A masa ma yeʼelane wo; bia binga nyô bi too nda jia, éyoñ ma te biaé a too fe nda valé.

¹⁸ Melu melale me lôteya, nde nye fe a te biaé éyoñe jé. Bia too vôme wua teke môte mfe nda été ve bia bebaé.

¹⁹ E mone minga nyô a wuya a alu amu nyia a te bômbô nye yôp.

²⁰ A kôlôya si e zañ alu, a nyoñe mone wom a bôô ma fefel, mbo ésaé wôé ki me bôô vʼôyo, éyoñe te a bôôé mon ate e fefele jé, a nyoñe ke mbime mone wé a bôôé me wô fefel.

²¹ Eyoñ ma kôlô si mametyé na me nyaa e mone wom, a koé na a wuya. Eyoñe môs ô saéya, me tuʼa fombô mon, a yene na a nji bo mone wom me nga biaé.

²² E minga mboʼo nye na: Momo! E mone wom nye a vee, a éñwôé nye a ne ñwuan; ve minga ôsu a nga ke ôsu a jô na: Momo! E mone wôé nye a ne ñwuan, éñwome ki nye a vee. Nne be nga kobô nalé ôsu njô bôt.

²³ Ane njô bôt a nga jô na: Minga nyô a jô na: E mone wom nye a vee, éñwôé ki nye a ne ñwuan; wôna minga mbok nye ki a jô na: Momo! E mone wôé nye a ne ñwuan, éñwome ki nye a vee.

²⁴ Njô bôte na: Zaʼane ma nkpwaté mekôn! Eyoñe te be nga soo nkpwaté mekôn ôsu njô bôt.

²⁵ Njô bôt nye na: Tyiʼane mon a vee zañ mi kee minga wua éfase jia a minga mbok éfase jia.

²⁶ E minga mon a nga vee, amu a nga wôʼô miñya mi boʼok ane mia tyiʼi nye abum été, a nga jô njô bôte na: Éngôngo a masa! Vaʼa nye e mon a vee, ve te wôé nye! Ve minga mbok a mbe a jôʼô na: Tyiʼik bia bese bi sup!

²⁷ Nde njô bôt a nga jô na: Keʼane minga ôsu e mon a vee, te wôane nye; nye a ne nyia.

²⁸ Eyoñ Israél ase a nga wôʼô ntyiʼan ajô njô bôt be nga ko nye woñ, amu be nga yene na feʼe Zambe é ne be nye mfaʼa ya tyiʼi mejô.