1 Bb. 22 - Bible en langue Bulu

Akab a balé mbia mbalan ézezañe mewosan

¹ Mimbu mila mi nga lôt teke mewosan e zañe Siri a Israél.

² Mbu lale, Yôzafat, njô bôte ya Yuda a nga ke be njô bôte ya Israél.

³ Njô bôte ya Israél a nga jô bôte bé na: Ye mia yeme foʼo na Ramôt ya Galad a ne tisone jangan, ve da na bia siʼibi na bi bulane nyoñe je e mo me njô bôte ya Siri!

⁴ A nga jô Yôsafate na: Ye bia wo bia ye ke wosane Ramôt ya Galad? Yôzafat a nga yalane njô bôte ya Israél na: Yaa! Ma ane bôte bam ane bôte bôé, bikabela biam ane bikabela biôé.

⁵ Ane Yôzafat a nga jô njô bôte yʼIsraél na: Ma yeʼelane wo éyoñe jina na Ô tame sili nkômbane Nti.

⁶ Ane njô bôte yʼIsraél a nga sulane bekulu mejô bebé mintete minyin a jô be na: Ye ma yiane ke wosane Ramôt e Galad, ye me tame yange? Be nga yalane na: Kelek a Nti a ye ve nye e mo me njô bôt.

⁷ Ve Yôzafat a nga jô na: Ye nkulu mejôa Nti éziñ a nji fe bo va, nye bi ne nguleya yen?

⁸ Njô bôte ya Israél a nga yalane Yôzafat na: A liʼiya ve môte wua nye bi ne nguleya sili nkômbane Nti; ve ma vini nye amu a nji kulu jam éziñ é ne mvaé mfaʼa wom, vʼabé étam; Miké e mona Imla. Yôzafat a nga jô na: Njô bôt a boʼo te kobô nalé!

⁹ Eyoñe te njô bôte yʼIsraél a nga loone miak a jô na: Boʼo na Miké, e mona Imla a kui vana avôl avô.

¹⁰ Njô bôte yʼIsraél a Yôzafat, njô bôte ya Yuda be mbe be too môt ase éto njôane jé, be beʼe mengômesane bejô bôte map nseñ, anyiine mbé ya Samari, a bekulu mejô bese be kuluʼu mejô ôsu viap.

¹¹ Sédékias e mona Kenaan a nga bo émien minlaʼa bityé a jô na: Avale di nde Nti a kobô na: A minlaʼa mi wo ye jine Besirieñ a jiane be.

¹² Bekulu mejô bese be nga kulu mejô avale da be jôʼô na: Bete Ramôt e Galad! Wo ye dañ, a Nti a ye ve nye e mo me njô bôt.

¹³ Nlôman ô nga ke loone Miké ô nga kobô nye na: Ô lôô bekulu mejô bese be ne tyiñe jia, asu ya kobô njô bôte mvaé. Nkobô wôé wo yiane fe luʼan a éñwop; Ô kobôʼô mvaé!

¹⁴ Miké a nga yalane na: Ane Nti a vee! Jame Nti a ye jô ma nde ma ye kat.

¹⁵ Eyoñ a nga kui be njô bôt, njô bôt a nga sili nye na: A Miké ye bi ke wosane Ramôt e Galad ye momo? A nga yalane na: Kelek! Wo ye dañ, a Nti a ye ve nye e mo me njô bôt!

¹⁶ Ve njô bôt a nga jô nye na: Biyoñe tañ aya bia silibane mfaʼa wome na, me bo wo ô kane ngana ya kobô ma ve bebela a jôé Nti?

¹⁷ Nde Miké a nga yalane na: Me nga yen Israél ase mmialane minkô, avalʼane mintômba mi ne tee mbaʼale. A Nti a nga jô na: Bôte ba be nji bi bemasa, Ajô te môt ase a bulaʼane mvoʼé e nda jé.

¹⁸ Eyoñe te njô bôte yʼIsraél a nga jô Yôzafat na: Ngaa ma te jô wo na a ne teke kulu ma jam éziñ é ne mvaé, vʼabé étam?

¹⁹ Nde Miké a nga jô na: Yaa, vôʼôlôʼô nkobô Nti! Me nga yene Nti a too éto njôane jé, a nsamba mewosan ôse ya yôp ô tele nye fefel, mbo nnôm a mbo ngal.

²⁰ Ane Nti a nga jô na: Za a ye won Akab, nalé a ye bete Ramôt e Galad a ku? Be nga yalan, e môte nyô avale dé, môte mbok avale dé.

²¹ Eyoñe te nsisim éziñ ô nga vam, a tebe ôsu Nti a jô na: Ma ma ye wone nye. Nti a nga sili wô na: Aval avé?

²² Ô nga yalane na: Ma ye kui a veñesane nsisime minsos anyu bekulu mejô bé bese. Nti a nga jô na: Wo ye wone nye a wo ye kui foʼo na ô wone nye: kelek a bo nalé!

²³ Mi lôô, éyoñe ji, Nti a futiya nsisime minsos anyu bekulu mejô bese ba; A Nti a maneya tyiʼi mbia jam mfaʼa wôé.

²⁴ Eyoñe te Sédékias mona kenaana a nga subu a bibi Miké abaé amañ, a jô na: Nsisime Nti wo te kui atane vé be ma na ô kobô wo?

²⁵ Miké a nga yalane na: Wo ye tuʼa yene de, e môs wo ye kôlô étune nda ji a ke ji évoʼo na ô sobô.

²⁶ Njô bôte ya Israél a nga jô na: Nyoñe Miké a kee nye be Amon évete ya tison, a e be Yôas mona njô bôt.

²⁷ Wo ye jô na: Avale di nde njô bôt a jô na: Futaʼan e môte nyô mimbôk teke ve nye ôfufus adi nge mendim, akekui me soya mvoʼé .

²⁸ Miké a nga jô na: Nge ô bulane foʼo mvoʼé , yeme na Nti a nji kobô a anyu dam; mia bôte bese vôʼôlaʼan!

²⁹ Ane njô bôte yʼIsraél a Yôzafat, njô bôte ya Yuda, be nga bete Ramôt e Galad.

³⁰ Ane njô bôte ya Israél a nga jô Yôsafate na a zu tyendé émiene mimbote na be bo te yeme nye éyoñe te émien a ye ke wosan; vʼa nga jô njô bôte Yosafat na: Ve wo jaék mengômesane me njô bôt. Eyoñe te njô bôte ya Israél a nga tyendé mimbote na a ke wosan.

³¹ Njô bôte ya Siri a nga ve abendé e be bivete mewôm mela a bibaé ya bevagoñe bé na: Mia ye bo te wosane mone môt nge beta môt, ve njô bôte ya Israél étam.

³² Eyoñe bivete bevagoñ bi nga yene Yôzafat be nga jô na: Ye njô bôte ya Israél foʼo nyô; be nga ke vôm a mbe na be wosane nye. Ve Yôzafat a nga loone bôt be zu volô nye.

³³ Eyoñe bivete bevagoñ be yeneya na sake njô bôte ya Israél le, be nga ke nye ôyap.

³⁴ Eyoñe te môt éziñ a nga wua élaé ñyeme ñyeme nalé, je ve lume njô bôte ya Israél e zañe bitune ya ngômesane bityé jé. Eyoñe te njô bôt a nga jô môt a dutu vagoñe wé na: Bulaʼane mvus a kee ma e nkane bita atan amu ma wôʼô mintaé abui, amu me baléya.

³⁵ Mewosan me mbe ngul abui môs ôte. Njô bôt a mbe ntindane ya tebe tetele e vagoñe wé été a lôô Besirieñ a a nga wu mamengôʼé. Metyi ya aveñ me nga len e vagoñ été.

³⁶ Eyoñe jôp da dim, ñyôtane wu ô nga mialane minkane na: Môt ase e tisone jé a môt ase e si jé!

³⁷ Avale di nde njô bôt a nga wu a be nga bulane nye e Samari.

³⁸ Eyoñ be nga sôbe vagoñ étame mendime ya Samari, bemvu be nga nyiane metyi mʼAkab a binga bʼébamba be nga woban été aval ane nkobô Nti a nga kobô ô mbe.

³⁹ Mimboon Akab mivok, jam ése a nga bo, nda mimbañ a nga lôñ, a bitisone bise a nga lôñ, mam mete me ne ntilan e kalate minkañete bejô bôte yʼIsraél.

⁴⁰ Akab ba bʼésaa be nga bômbô vôme wua A Akazia, e mone wé, a nga jôô éjiane jé.

Yôzafat, njô bôte ya Yuda

⁴¹ Yôzafat, e mon Asa a nga tebe njô bôte ya Yuda, e mbu nyini Akab a mbe njôô Israél.

⁴² Yôzafat a mbe mimbu mewôm mela a mitan éyoñ a nga tebe njô bôt, a nga jôô mimbu mewôm mebaé a mitan e Yérusalém. Nyia a mbe jôé na Azuba ngone Sili.

⁴³ A nga wulu e zen ésaa Asa ése, teke yale fefe, a boʼo mam me ne mvaé e mise me Nti.

⁴⁴ Ve bito ya bikôndôʼô yôp bi nji man; bôt be nga ke ôsu a ve bityiʼa a mimbon mi ne mbamba menyum e bito ya bikôndôʼô yôp.

⁴⁵ Yôzafat a nga too mvoʼé e zañe baa njô bôte ya Israél.

⁴⁶ Mimboone mi Yôzafat mivok, éwôlô jé ya mimboon a mewosan, mam mete me ne ntilan e kalate minkañete bejô bôte ya Yuda.

⁴⁷ A nga sondô mane vose bebo mfufub ébamba be nga liʼi, mbe be nga too ataté melu mʼésaa Asa.

⁴⁸ Njô bôt a mbe momo Edom, ve môt a ne señe njô bôt.

⁴⁹ Yôzafat a nga kôme besitima ya Tarsis asu ya ke Ofir na be nyoñe or; ve be nji ke wé, amu besitima be nga bôlé e Etsion-Géber.

⁵⁰ Eyoñe te Akazia, e mone Akab, a nga jô Yôzafat na: Bebo bisaé bam baa bʼémbôé be kelek e besitima! Ve Yôzafat a nji kañese.

⁵¹ Ane Yôzafat baa bʼésaa be nga bômbô vôme wua, baa bʼésaa be nga jambe e tisone David ésaa wé. Yôram, mone wé, a nga jôô éjiane jé.

Akazia, njô bôte ya Israél

⁵² Akazia e mona Akab a nga jôô Israél e Samari, mbu awôm a zamgbwale Yôzafat, njô bôte ya Yuda a nga jôô. A nga jôô Israél mimbu mibaé.

⁵³ A nga bo mam me nʼabé e mise me Nti, a wulu e zen ésaa, e zene nyia, a e zene Yérôbôam mone Nébat a nga dutu Israél na a bo abé .

⁵⁴ A nga kañe baal a kute nye meboñe si; A nga bo Nti, e Zamba Israél na a yaa aval ésaa a nga bo.