1 Bb. 20 - Bible en langue Bulu

Akab a dañ Bén-Adad, njô bôte ya Siri

¹ Bén-Adad, njô bôte ya Siri, a nga sulan nkane bita wé ôse; a nga bili bejô bôte mewôm mela a bebaé ngame jé, nalé fe bikabela a bevagoñ bita. A nga bet a vule Samari minkan a wosane nye.

² Ane a nga lôme minlôman e tison, e be Akab, njô bôte ya Israél,

³ be kate nye na: Avale di Bén-Adad a jô na: Argent a or wôé bi ne émbian, binga bôé a bone ba dañ abeñ be ne émbam.

⁴ Njô bôte ya Israél a nga yalane na: A Nti njô bôt, ane wo jô, me ne éñwôé a jôm ése me bili.

⁵ Minlôman mi nga beta so a jô na: Avale di Bén-Adad a jô na: Me nga lôm be kate wo na: Wo ye ve ma argent a or wôé, binga bôé a bone bôé.

⁶ A akiti, aval awolo di, ma ye ñhe lôme bebo bisaé bame be wo; ba ye vune nda jôé a menda bebo bisaé bôé, ba ye futi mo e jôm ése é ne beta tañe mise môé a nyoñe je.

⁷ Ane njô bôte yʼIsraél a nga loone bemvendé bese ya si jé a jô be na: Yeman a yene na môte nyô a jeñe bia abé; amu a lômeya be sili ma binga bam, bone bam, argent wom a or wom, a me nji bene nye jôm éziñ!

⁸ Bemvendé bese a bôte bese be nga jô Akab na: Te wôʼô nye nge kañese jam a jô.

⁹ Eyoñe te a nga jô minlômane mi Bén-Adad na: Katane Nti wome njô bôte na: Ma ye bo jam ese wo te sili mbo ésaé wôé éyoñ ôsu; ve di wo jô ma le me se nguleya bo de. Ane minlôman mi nga ke a ke kate nye éyalan.

¹⁰ Nde Bén-Adad a nga lôme be kate Akab na: Bezambe be boʼo ma jame di, be beté fe dili, nge mbuluʼu ya Samari ô ne abime da yiane na ô jalé mekule me mo ya bôte bese ba tôñe ma!

¹¹ Ve njô bôte ya Israél a nga yalane na: Jôʼane nye na: Môt a jaé ében, a nji yiane vak ane môt a vaa je!

¹² Bén-Adad a nga wôʼô nkobô te, valé a nyaʼak baa be bejô bôt e menda bindelé été; éyoñe te a nga jô bebo bisaé bé na: Kelan, môt ase e vôme wé asu mewosan! Ane bese be nga tabe nkôman ya wosane tison.

¹³ Eyoñe te nkulu mejô éziñ a nga zu e be Akab, njô bôte ya Israél bebé a jô nye na: Ye ô lôô ézuʼu bôt ése ji? Den, ma zu ve je e mo môé a wo ye yeme na ma me ne Nti.

¹⁴ Akab a nga jô na: Wo ye ve ma je a za? A nga yalane na: Avale di Nti a kobô na: A bisoé bivete ya bia so mefan. Akab na: Za a ye taté mewosan? Nye na: Wo.

¹⁵ Ane a nga mane fombô bisoé bivete ya mefan, bi mbe mintete mibaé, mewôm mela a bibaé; amané ya balé, a nga fombô bôte bese, bone bʼIsraél bese, be mbe toyini zamgbwa.

¹⁶ Be nga kui atan e zañe môs . Bén-Adad a mbe a nyaʼak ane nsoʼo bilam, e menda bindelé si baa be bejô bôt, bejô bôte mewôm mela a bebaé, be nga zu volô nye.

¹⁷ Bisoé bivete ya mefan mbie bi nga taté kui atan. Bén-Adad a nga sili mimfefé mefoé, nde be nga kate nye na: Bôt be kuiya Samari atan.

¹⁸ A nga jô na: Nge ba kui asu mvoʼé , biane be bevevee nge asu mewosan, biane be bevevee!

¹⁹ Ba be nga kui tison atan, be mbe bisoé befam a nkane bita ô mbe ô tôñe be.

²⁰ Nde be nga bibi, môt ase môte wé, Besirieñ be nga tup, a Israél a nga tôñe be. Bén-Adad, njô bôte ya Siri, a nga tup a bete ékabela yôp baa be bebebe bikabela.

²¹ Ane njô bôte yʼIsraél a nga kui atan a bibi bikabela, bevagoñ, a a nga dañ Besirieñ beta ndañan.

²² Ane nkulu mejô a nga subu njô bôte yʼIsraél bebé a jô nye na: Kelek, boʼo ngule nlem , yemek a yen jam wo yiane bo; amu mbu wo zu, njô bôte ya Siri a ye zu wosane wo.

²³ Ane bebo bisaé be njô bôte ya Siri be nga jô nye na: Zambe wop a ne zambe ya minkôle yôp; ajô te be nga dañe bia ngu. Bia yiane wosane be njeʼese, bia ye yen, nge bia ye bo te dañe be ngu.

²⁴ Betaʼa bo jame di: Vaʼa njô bôt ase été jé ya mewosan, a tyendé be a bengovina.

²⁵ Kôme womiene nkane bita, ô too ane wu ô nga mane dimili, ékabela asu ékabela, vagoñ asu vagoñ. Eyoñe te bia ye wosane be e njeʼese, bia ye yen nge bia ye bo te dañe be ngu. A nga wôʼô be a bo nalé.

²⁶ Mbu ô nga tôñe valé, Bén-Adad a nga fombô Besirieñ bese a ke mfaʼa yʼAfék na a wosan Israél.

²⁷ Be nga fombô fe bone bʼIsraél, be nga nyoñe bidi a ke tôbane bôt ya Siri. Bone bʼIsraél be nga vulu minkan baa be be be lôane mesu, be too ane bone mimbame bikela bebaé, ve Besirieñ be nga yiane si.

²⁸ Ane môta Zambe a nga zu bebé a jô njô bôte yʼIsraél na: Avale di Nti a jô na: Amu Besirieñ be jôya na: Nti a ne Zambe ya minkô sake nyô ya mimbiʼili, ajô te ma ye ve ézuʼu bôte jina e mo môé, a mia ye yeme na me ne Nti.

²⁹ Be nga vule minkan melu zamgbwa, bana be lôô ba bevok. E môse zamgbwale, mewosan me nga taté; bone bʼIsraél be nga wôé Besirieñ e bôte ba wulu a mebo môse wua toyini ntet.

³⁰ Abim e nga buk e nga tup e tison Afék; mfin ô nga ku e bôte toyini mewôm mebaé a zamgbwa be nga liʼi yôp. Bén-Adad a nga tup; a nga kui e tison, a kôlô étune nda ji a nyiine ji.

³¹ Ane Bebo bisaé bé be nga jô nye na: Bi nga wôʼô na bejô bôte ya ndaa Israél be ne bejô bôte be ne njalan a mvam; bia zu jaé minkuta a tiñeti minkole minlô, a bia ye ke be njô bôte yʼIsraél, éyoñ éziñe na a ye jôʼé bia bi nyiñ.

³² Nde be nga jaé minkuta a tiñeti minkole minlô, be zule be njô bôte ya Israél a jô na: Mbo ésaé wôé Bén-Adad a jô na: Jôkéʼé ma me nyiñ! Akab a nga yalane na: Ye a ngenan a vee? A ne mojañ.

³³ Bôte bete be nga yene jame te ane mbamba ndem; be nga jiʼa tyiʼi nye nkobô a jô na: Bén-Adad a ne monyoñ! Nye na kelan a zuu nye. Ane Bén-Adad a nga ke be nye a Akab a nga daa nye e vagoñe njô bôte yôp.

³⁴ Bén-Adad a nga jô nye na: Ma ye bulane wo bitisone ésaa wom a nga nyoñ ésoo; a wo ye bi mevôme ya bo makit e Damas, avalʼésaa wom a nga bili e Samari. Akab a nga beta jô na: Ma ye jôʼé wo ô bulan, ô bili élat. Ane a nga bo élat a nye a suu nye a ke.

³⁵ Ane wua ya nsamba bekulu mejô a nga jô môte baa nye be mbe nsamba na: A njôane Nti, ma yeʼelane wo na bibiʼi ma. Ve môt ate a nga bene bibi nye.

³⁶ Nde a nga jô nye na: Amu ô nji bo tyiñe Nti mewôk, tame yen, éyoñ wo ye kandane ma, ngbwengbwem ja ye wôé wo. A nga bo na, éyoñ a nga kandane nye, ngbwengbwem é nga bi nye a wôé nye.

³⁷ A nga koone môte mbok a jô na: Bibiʼi ñhe ma! Ane môt ate a nga bibi nye; a nga bibi nye a balé nye aveñ.

³⁸ Ane nkulu mejô a nga ke tebe zene njô bôt. A nga solé émien a ntiñetan éfus éndelé mis.

³⁹ Eyoñe njô bôt a nga lôt, a nga yôtan a jô na: Mbo ésaé wôé a mbe mboone bita zañ; ateme na môt ve kôlô a tebe fefel a zuu ma môt a jôʼô na: Baʼaleʼe môte nyô; nge a jemban, ényiñe jôé ja ye yalan ajô yʼényiñe jé, a wo ye yaʼane talañ argent wua!

⁴⁰ Nté mbo ésaé wôé a mbe a fôʼôsaʼane li a li, ane môt a nga jañ. Njô bôte yʼIsraél a nga jô nye na: Ntyiʼan ajô wôé ñwô le; womien ô toteya wô.

⁴¹ Eyoñe te ébien nje nkulu mejô a nga vaa éyañese é nga tii nye mis a njô bôte yʼIsraél a nga yeme nye ane wua ya bekulu mejô.

⁴² Nde a nga jô njô bôte na: Avale di nde Nti a jô na: Amu môt me nga tyiʼi na a yiane jañ wo te suu nye wo wôé a ke, ényiñe jôé ja ye yalan ajô yʼényiñe jé a bôte bôé ajô ya bôte bé.

⁴³ Ane njô bôte yʼIsraél a nga ke nda jé éyôé a ayoʼo nlem , nde a nga kui Samari.