1 Bb. 18 - Bible en langue Bulu

Elie baa Akab, Elie a bekulu mejô be Baal

¹ Abui melu é lôteya, ajô Nti é nga zu be Elie mbu lale ya beta mfume na: Kele yené be Akab; ma zu noo mveñ si nyô.

² Ane Elie a nga ke yené be Akab. Mfumbale zaé a mbe angôndô e Samari melu mete.

³ Ane Akab a nga loone Obadiahu nyô a mbe évete ya nda njô bôt. Obadiahu a mbe môt a nga ko Nti woñ.

⁴ Eyoñe Yézabél a nga mane wôé bekulu mejô be Nti, Obadiahu a nga nyoñe ntete yʼété, a solé be e mimbase mekoʼo mibaé été, mbas ôse bekulu mejô mewôm metan, a vaʼa be bidi a mendim.

⁵ Akab a nga jô Obadiahu na: Kele wo wulu si, mfaʼa menjeñe mendim mese me né, a mimbiʼili, ndôʼôtô na bia ye yen ôbut asu ya baʼale bikabela a bemulé na bi nyiñ, éyoñe te bia ye bo te wôé éfase betit.

⁶ Ane be nga kabane si ba yiane wulu. Akab a nga ke étam zene jia, Obadiahu ke étam e zene fok.

⁷ Obadiahu a ngenane zen , éyoñe te Elie a nga zu tôbane nye. Obadiahu a nga yeme nye, ndʼa nga ku asu e butu si a jô na: Ye womiene le a Nti wom Elie?

⁸ A nga yalane nye na: Mamiene le! Kele jô Masa wôé na: Elie nyô!

⁹ Ane Obadiahu a nga jô na: Me boya abé vé ane wo kuane mbo ésaé wôé e mo mʼAkab na a wôé ma?

¹⁰ Ane Nti, e Zambe wôé a vee, te kʼayoñ nge éjôé masa wom Akab a ngenan te lôme na be jeñe wo. Eyoñe ba jô nye na: A nji bo va, éyoñe te a jô éjôé nge ayoñe te na é kane ngana na be nji ke yene wo.

¹¹ Eyoñe ji wo jô me na: Kele jô masa wôé na: Elie nyô!

¹² Vʼéyoñ ma ye kandane wo, Nsisime Nti wo ye kee wo vôm me ne te yem; a ma ma ye ke kate Akab foé ve nye aa ye ke koone wo, éyoñe te a ye wôé ma. Ve womien wo yeme na, mbo ésaé wôé a ko Nti woñ aso mongô.

¹³ Ye be nji kate wo jam me nga bo éyoñ Yézabél a nga wôé bekulu mejô be Nti? Me nga solé ntete ya bekulu mejô be Nti mewôm metane li, a mewôm metane li, e mimbase mekoʼo mibaé, me vaʼa be bidi a mendim.

¹⁴ Vʼéyoñe ji wo jô me na: Kele jô masa wôé na: Elie nyô! Ve a ye wôé ma!

¹⁵ Elie a nga jô na: Ane Nti a vee, Nyô a ne ngul ése, ma saane nye, den émiene nyô, ma ye yené be Akab.

¹⁶ Ane Obadiahu a nga ke tôbane Akab a kate nye foé; Nde Akab a nga ke tôbane Elie.

¹⁷ Eyoñ Akab a nga yen Elie, a nga jô na: Ye womiene le, a nyô a soo bidim Israél été?

¹⁸ Elie na: Sake ma ma soo bidim Israél été, ve wo a nda bôt ésoo, amu mi maneya ben mebendé me Nti a ô tôñeya Bebaal.

¹⁹ Eyoñe ji, sulaʼane ma Israél ase nkôle Karmel, a bekulu mejô be baal mintete minyin a mewôm metan, a ba bʼAkéra mintete minyin, mbe ba di e tawôlô Yézabél.

²⁰ Eyoñe te Akab a nga lôme be ke nyoñe bone bʼIsraél bese, a a nga sulane bekulu mejô e nkôle Karmel.

²¹ Elie a nga subu bôte bese bebé a jô na: Mia ye jem mi folaʼane mebo a kui éyoñ évé? Nge Nti Nye a ne Zambe, tôñane Nye! Nge baal , tôñane nye! Ve bôt be nji yalane nye toʼo vʼajô da.

²² Ane Elie a nga jô bôte na: Me liʼiya nkulu mejô Nti vʼétam, ve bekulu mejô be baal be ne mintete minyin a mewôm metan.

²³ Be zaʼa bia bone beyôm benyak bebaé; ba ye tobe wua, be baa nye mefus a bôé nye avise njaʼa yôp, ve teke futi nduan, ma fe ma ye bo avale da a mone nnôme nyaʼa mbok; ma ye beté nye avise njaʼa yôp, ve ma ye bo te futi nduan.

²⁴ Eyoñe te mia ye loone jôé zambe wônan a ma ma ye loone jôé Nti. E Zambe a ye yalan a nduan, nye a ne Zambe. Ane bôte bese be nga yalane na: Nkobô te ô ne mvaé!

²⁵ Elie a nga jô bekulu mejô be baal na: Tobane mone nnôme nyak a tataʼane bo ésaé amu mia mia dañ abui; loʼone jôé zambe wônan, ve te futane nduan.

²⁶ Be nga nyoñe mone nnôme nyaʼa a nga ve be, be mane bo ésaé a loone jôé baal ataté mametyé a kui zañe môs be jôʼô na: A baal yalaʼane bia! Ve teke tyiñ nge môt a yalan. Be nga jeme fefel ataʼa metunaʼa be nga bo.

²⁷ E zañe môs Elie a nga kpweʼele be a jô na: Tukaʼa yônane ngu, ke a ne zambe : a bili abui dulu; éko éziñe na a ne momo, a bili abui dulu, éko éziñe na a ne ôyo, da sili na a vee.

²⁸ Be nga dañe yôtane ngu, a avalʼane éyeme jap é mbe, be nga tene nyô a mefa a mekoñ, metyi ve yiane nyô.

²⁹ Eyoñe zañe môs é lôteya, be nga kulu mejô a kui awolo ya mimvean. Ve teke tyiñ nge môt a yalan, nge mboone jam éziñ.

³⁰ Elie a nga jô bôte bese na: Subaʼane ma bebé! Ane bôte bese be nga subu nye bebé. A nga beta kôm ataʼa metunaʼa Nti nde e nga mane tyamban;

³¹ a nga nyoñe mekoʼo awôm a mebaé avalʼane meyoñ me bone be Yakob me né, Nye Nti a nga kobô na: Jôé dôé da ye bo Yakob.

³² Elie a nga beta lôñ ataʼa metunaʼa asu jôé Nti a mekoʼo mete; a nga faʼa ébé mbômaʼan a ataʼa metunaʼa é too ngule ya nyoñe lita mewôm mela;

³³ Nde a nga taʼa njaʼa, a mane ba mone nnôme nyak a beté nye été yôp.

³⁴ A nga jô na: Sôʼane minlônga mendim minyin e mvean ô ne ngumba yôp a e njaʼa yôp! A nga jô na: Éyoñ éfe jia! Ane be nga sôé éyoñe baa; nye na: Éyoñe lale! Be nga sôé éyoñe lale.

³⁵ Mendim me nga mialan mbômaʼan a ataʼa metunaʼa, a jalé toʼo na ébé.

³⁶ Awolo ya mimvean, nkulu mejô Elie a nga subu bebé a jô na: A Nti, e Zamba Abraham, Izak a Israél, boʼo be be yem e môse wu na wo ô ne Zambe Israél, na me ne mbo ésaé wôé, a na ma bo mam mese ma, a ngule ya mejô môé.

³⁷ Yalaʼane ma, a Nti, Yalaʼane ma: e bôte ba be yeme na wo Nti ô ne Zambe, a na, wo wo dutu minleme ya bôte bôé be wo.

³⁸ Ane nduane Nti é nga so yôp a mine mvean ô ne ngumba, njaʼa, mekok , mbuluk, a mane fe vili mendim me nga too ébé.

³⁹ Eyoñe bôt be nga yene jame di, bese be nga ku mesu me butu si a jô na: Nti nye a ne Zambe; Nti nye a ne Zambe!

⁴⁰ Elie a nga jô be na: Biane bekulu mejô be baal ! Wua a boʼo te tup! Be nga bi be. Elie a nga siliki be mbiʼili Kison a mane tyiʼi be tyiñ .

⁴¹ Elie a nga jô Akab na: Betek, ô di a nyu! Amu e ndume ya beta mveñ wo duñ.

⁴² Ane Akab a nga bete na a di a nyu, wôna Elie ki a nga bet abôbône nkôle Karmel, a nga kute meboñe si asu e too nye e zañe mebé.

⁴³ A nga jô mbo ésaé wé na: Betek a fombô mfaʼa ya mañ! A nga bet a fombô a jô na: Me nji yene jôm! Elie a nga jô nye biyoñe zamgbwale na: Bulaʼan!

⁴⁴ Eyoñe zamgbwale mbo ésaé a nga jô nye na: Me lôô mone nkut anen ane mvutan akule wo, a betek mfaʼa ya mañ. Elie a nga yalane na: Betek a jô Akab na: Dañe vagoñe yôp, ô sis, mveñ é za dili wo.

⁴⁵ Yôp e nga dañe dañe vin amu minkut, a évuñulu, a beta mveñ a nga noñ. Akab a nga bete vagoñe wé a ke Yizrél.

⁴⁶ Wo Nti ô nga too bʼElie, a nga tiñeti ases angeteñ a mate Akab ôsu a kui Yizrél.