1 Bb. 17 - Bible en langue Bulu

Nkulu mejô Elie a kate ajô mfum

¹ Elie mone Tisbite, wua ya bôt be nga too e Galad, a nga jô Akab na: Ane Nti a vee, Zambe ya Israél, Nyô ma Saane nye, melok nge mveñ bia ye bo te bo mimbu, vengevenge ve ma ma sili bie.

² Ajô Nti e nga zu be Elie na:

³ Kôlôʼô va ô ke mfaʼa jôp da tôô, a sobô mfôm ôtôñe Kérit ô ne Yordan mfaʼa jôp da tôô.

⁴ Eyoñe te wo ye bo nguleya nyu mendime yʼôtôñ a me bendéya bimgbwañ na, bi ve wo bidi wé.

⁵ Ane a nga ke a bo avale Nti a nga kobô nye; a nga ke tabe mbiʼili ôtôñe Kérit ô ne Yordan, mfaʼa jôp da tôô.

⁶ Bimgbwañ bi mbe bi vaʼa nye belet a tit mametyé, belet a tit mamengôʼé; a mbe a nyaʼa mendime ya ôtôñ.

⁷ Eyoñe melu me lôteya, ane ôtôñe ô nga vele, amu mveñ é nji ke fe noñ.

⁸ Ane ajô Nti e nga zu be nye na:

⁹ Kôlôʼô si ô ke Sarépta ya Sidoñ, wo ye tabe wé; me bendéya nkuse minga wé na ô ve wo bidi.

¹⁰ Ane a nga kôlô si a ke Sarépta a suan anyiine tison. Nkuse minga ô nga too valé ô kôʼane njaʼa. A nga loone wô a jô na: Ma yeʼelane wo na, ô ke jeñe ma ayôme mendime ndek me nyu!

¹¹ Ane a nga ke jeñe me. A nga beta loone nye a jô nye na: Ma yeʼelane wo na: Kele jeñe ma éfuse belet e wo wôé été!

¹² Minga a nga yalane na: Ane Nti, e Zambe wôé a vee! Me nji bi jôm é too nkôman, me bili ve doé avut e vieʼe été, a ôyôme mbon e ndek; éyoñ me maneya toʼé bifuse bi njaʼa, ma ye bulane ke yame biôme bite asu dam a mone wom; bia ye di bie, mvus éte bia ye wu.

¹³ Elie a nga jô nye na: Te ko woñ; bulaʼan a bo jam wo te jô; ve da tatéʼé yame ma mon éwôlé a biôm ô bili éyoñe te wo zu ve ma je; wo ye suʼulane yam asu dôé a nyômon.

¹⁴ Amu avale di nde Nti, Zambe ya Israél a jô na: Vieʼe avut wo ye bo te bo ékôkoé, Ndeʼe mbon ja ye bo te vele, akekui môse Nti a ye noo mveñe si nyô.

¹⁵ Ane a nga ke, a bo aval Elie a nga jô; a nga di, émien, Elie a nda bôte jé melu melu.

¹⁶ Vieʼe avut ô nji bo ékôkoé, a ndeʼe mbon é nji vele, avale Nti a nga kobô anyu bʼElie.

¹⁷ Eyoñe mam mete me maneya, mona nkuse minga, mmie ndaa, a nga kon. Ôkone wé ô mbe étua ngul abui, teke fe nguleya kuli mvebe.

¹⁸ Ane a nga jô Elie na: Bia wo bi ne za ajôô, a môta Zambe? Ye ô nga zu be ma a bo me na me simesan abé me nga bo, a wôé fe ma mon?

¹⁹ Elie a nga yalane nye na: Keʼe ma mone wôé! Ane a nga nyoñe nye e mo me minga, ve beʼe nye a kee nye étune nda ya yôp, vôm a nga too, a bôôé nye énoñe jé.

²⁰ Nde a nga yeʼelane Nti a jô na: A Nti, e Zambe wom, ye wo yi abé e be nkuse minga me zuya bo ntabe nda jé, éyoñe wo kañese na mone wé a wu?

²¹ Nde Elie a nga butubu mongô yôp biyoñ bilaa a jôʼô na: A Nti, e Zambe wom, kañeseʼe na mvebe mongô nyô ô beta zu be nye.

²² Ane Nti a nga wôʼô tyiñ Elie, ane mvebe mongô ô nga beta zu be nye, ane a nga nyiñ.

²³ Ane Elie a nga nyoñe mongô a sise nye nda si a soʼo étune ya yôp, a kee nye nyia; Elie na: Yenek! Nyô mon a nyiñeya.

²⁴ Minga a nga jô Elie na: Yaa, éyoñe ji me yemeya na, ô ne môta Zambe a na, ajô Nti e ne foʼo wo anyu.