1 Bb. 15 - Bible en langue Bulu

Abiyam njô bôt e Yuda

¹ Mbu awôm a muame, Yérôbôam, e mone Nébat a nga jôô, Abiyam a nga tebe njô bôt e Yuda.

² A nga jôô mimbu mila e Yérusalém. Nyia a mbe jôé na Maaka, ngone Absalom.

³ A nga tôñ abé ese ésaa wé a nga bo nye ôsu; a nleme wé ô mbe nkaban mfaʼa Nti, e Zambe wé, nselan a avale nleme David ésaa wé ô mbe.

⁴ Nti, e Zambe wé, a nga ve nye lambe e Yérusalém vʼamu David, éyoñ a nga ve nye monafam a ye ke ôsu a bi Yérusalém:

⁵ amu David a nga bo mam me ne zôsôô e mise me Nti, teke yale feñe ya mam mese a nga bendé nye nté ôse a nga vee, vengevenge vʼajô Urie mone Etiñ.

⁶ Bita bi nga boban e zañe Rôbôam a Yérôbôam melu mese yʼényiñe jé.

⁷ Mimboon mi Abiyam mivok, jam ese a nga bo, ye me nji bo ntilane kalate minkañete bejô bôte ya Yuda? Bita bi nga boban e zañe Abiyam a Yérôbôam.

⁸ Ane Abiyam baa bʼésaa be nga bômbô vôme wua; be nga jame nye e tisone David; mone wé Asa a nga jôô éjiane jé.

Asa njô bôte ya Yuda

⁹ Mbu mewôme baa Yérôbôam, njô bôte yʼIsraél a nga jôô, ñwô Asa, njô bôte ya Yuda a nga telébane njôô.

¹⁰ A nga jôô mimbu mewôm menyin a wua e Yérusalém. Nyia a mbe jôé na Maaka, ngone Absalom.

¹¹ Asa a nga bo mam me ne zôsôô e mise me Nti, aval ane David ésaa wé.

¹² A nga mane jiane bebo mfufub ébamba bese be nga too si jé, a vaa bengunemelane bese bʼésaa be nga bo.

¹³ A nga vaa fe nyia wé Maaka éto nyia njô bôt amu a nga bo ngunemelan é nʼôson asu akéra Asa a nga tyiʼi ôsone ngunemelane nyia te a diʼi wô e mbiʼili Sédroñ.

¹⁴ Ve bito ya bikôndôʼô yôp bi nji vas. Ve nlem Asa ô mbe ngumba mfaʼa Nti, nté ôse a nga vee.

¹⁵ A nga zuu biôme bise baa ésaa be nga telé étyi e Ndaa Nti: argent, or a biôm mebelan mevale mese.

¹⁶ Bita bi nga boban e zañe Asa a Baésa, njô bôte ya Israél, nté ôse be nga vee.

¹⁷ Baésa, njô bôte ya Israél, a nga bet a ke wosane Yuda, a yemete tisone Rama na a dibe Asa njô bôte ya Yuda zen .

¹⁸ A nga nyoñ argent a or bi nga liʼi akume ya Ndaa Nti, a di ya ndaa njô bôt; Njô bôt Asa a nga nyoñe bie, a ve bie bebo bisaé bé na be lôme bie Bén-Adad, e mona Tavrimôn, mona Eziôn, njô bôte ya Aram a nga too Damas a jôʼô na:

¹⁹ Elat é ne zañe bia wo, e zañ ésaa wom a ésoo, ajô te ma ve wo argent a or nyô. Ajô te tyamek élate mia Baésa, njô bôte ya Israél, nalé a ye bo te beta bet a zu wosane ma.

²⁰ Bén-Adad a nga vôʼôlô njô bôte Asa; a nga lôme bivete ya minsamba mewosane mié bi ke wosane bitisone ya Israél; nalé a nga bôé Iyôn, Dañ, Abél-Bét-Maaka, éfuse si ése ya Kinérôt, ô laté a si ése ya Néftali.

²¹ Eyoñe Baésa a nga wôʼô foé éte, a nji fe ke ôsu a yemete Rama, ve a nga tabe Tirsa.

²² Eyoñe te njô bôte Asa a nga bañete Yuda ase teke vaa môt; Ane be nga mane kee mekok a bilé ya e Rama Baésa a mbe a yemeteʼe. Njô bôt Asa a nga belane biôm bite asu ya yemete Géba ya Bényamin a Mispa.

²³ Mimboon Asa mivoʼo mise, ndañan ôse a nga dañ, jam ese a nga bo, bitison a nga lôñ, ye mam mete me nji bo ntilan e kalate minkañete bejô bôte ya Yuda, ô vaa jame da ve na, éyoñe melu mé ya nnôm, a nga nyoñ ôkone ya mebo?

²⁴ Asa ba bʼésaa bé be nga bômbô vôme wua, a baa bʼésaa be nga jambe e tisone David ésaa wé. Mone wé Yôsafat a nga jôô éjiane jé.

Nadab njô bôte ya Israél

²⁵ Nadab, e mona Yérôbôam a nga bo njô bôte ya Israél mbu baa ya Asa a nga jôô Yuda. A nga jôô Israél mimbu mibaé.

²⁶ A nga bo mam me nʼabé e mise me Nti; a nga tôñ e zen ésaa a vu abé a nga dutu Israél na a bo.

²⁷ Baésa, e mona Ahiya ya ndaa Isakar a nga bôndé feʼe ya wosane nye. Ane Baésa a nga bôé nye e Gibetone Befilisteñ, éyoñe Nadab a Israél ase be nga dili Gibeton bita.

²⁸ Baésa a nga wôé Nadab mbu lale Asa a nga jôô Yuda, ane a nga jôô éjiane jé.

²⁹ Nné ane a nga tebe njôô, a nga bibi ndaa Yérôbôam ése, a nga jiane bese teke liʼi Yérôbôam ve môte wua, avale Nti a nga jô anyu be mbo ésaé wé Ahiya ya Silô

³⁰ ajô abé Yérôbôam, di a nga bo a di a nga dutu Israél na a bo, a ve Nti ôlun nlem e Zambe Israél.

³¹ Mimboone Nadab mivok, jam ese a nga bo, ye e nji bo ntilan e kalate minkañete bejô bôte yʼIsraél?

³² Bita bi nga boban e zañe Asa a Baésa njô bôte yʼIsraél nté ôse be nga vee.

Baésa njô bôte ya Israél

³³ Mbu lale Asa a nga jôô Yuda, ñwô Baésa mona Ahiya a nga taté jôô Israél e Tirsa, tañe mimbu mewôm mebaé a minyin.

³⁴ A nga bo mam me nʼabé e mise me Nti; a nga wulu e zene Yérôbôam, a vu abé a nga dutu Israél na a bo.