1 Bb. 14 - Bible en langue Bulu

Nga Yérôbôam a nkulu mejô Ahiya

¹ Melu mete, Abiya, e mone Yérôbôam, a nga kon.

² Ane Yérôbôam a nga jô ngale na: Wo ye kôlô si a jaé biôm avale ba ye bo te yeme wo na ô ne minga Yérôbôam wôna kelek e Silô. Ô lôô nkulu mejô Ahiya a ne wé; nye a nga jô ajô dame na, ma ye bo njô bôte ya ayoñe di.

³ Nyoñe belet awôm, biwôlé a ndeʼe wôé, kele nyiine be nye; a ye kate wo jam da ye kui be mon.

⁴ Ane nga Yérôbôam a nga bo nalé, a nga kôlô si a ke Silô, a nyiine ndaa Ahiya. Ahiya a mbe te fe nguleya yen, amu mise mé me nga beme vôme wua amu nnôm.

⁵ Nti a nga jô Ahiya na: Tame yene nga Yérôbôam, a zu yene wo ajô mone wé amu a kon. Wo ye kobô nye avale di a avale di. Eyoñ a ye so, a ye yené ane minga mfe.

⁶ Eyoñ Ahiya a nga wôʼô éduñe ya mebo mé, éyoñ a nga nyiine mbé , a nga jô na: Nyiʼin a nga Yérôbôam; amu jé mboone te? Wo kômbô yené ane minga mfe! Me ne nlômane be wo me bili foé ja ve nleme mintaé.

⁷ Kelek a jô Yérôbôam na: Avale di nde Nti, e Zambee Israél a jô na: Me nga bete wo ézezañe bôt, a telé wo évete ya bôte bam Israél,

⁸ me nga wôlé éjôé e nda bôte David a ve wo je. Ve ô nji ke bo ane mbo ésaé wom David, nye a nga baʼale mebendé mam a timbi a ma a nlem wé ôse na, a bo foʼo ve jam e ne zôsôô e mise mam.

⁹ O boya abé a dañe bôte bese be mbe wo ôsu, ô keya bo womiene bezambe befe a bengunemelan be ne mboon a ékpwembé é ne nyeman na me wôʼôlun, a ô wuaya ma e mvuse jôé.

¹⁰ Ajô te ma ye zuu bidim e nda bôte Yérôbôam; ma ye vaa befam e be Yérôbôam, jaʼana ba be ne alo, nge ba be ne fili Israél été; ma ye vose mvoñe bôte ya ndaa Yérôbôam ane ba vos akun ne meñ.

¹¹ Môt ase ya nda bôte Yérôbôam a ye wu tison, bemvu ba ye di nye; a môt ase yʼété a ye wu afan, anone ya yôp da ye di nye, amu Nti a kobôya.

¹² Mfaʼa wôé, kôlôʼô si a bulane nda jôé; éyoñe mebo môé ma ye tebe tison, mon a ye wu.

¹³ Israél ase a ye beʼe meyep asu dé, a ba ye jame nye, amu nye étam a ye jambe soñ e nda bôte Yérôbôam ése; amu e be nye étam, e nda bôte Yérôbôam ése, nye Nti, e Zambee Israél, a yeneya jam éziñ é ne mvaé.

¹⁴ Nti a ye telé Israél njô bôt, a ye vaa nda bôt Yérôbôam. Jame te da ye bobane den. Jia? Ke éyoñ ébiene ji!

¹⁵ Nti a ye bibi Israél; da ye kui be nye ane nkaé wo kebelane mendim. A ye vaa Israél e mbamba si a nga ve bʼésaa a a ye mialane nye ôsôé Efrate yat, amu be nga ba mekôn mʼazezambe map, a ve Nti ôlune nlem a mboone wop.

¹⁶ A ye kuan Israél amu minsem Yérôbôam a nga bo a amu minsem a nga tindi Israél na a bo.

¹⁷ Ane nga Yérôbôam a nga kôlô si a ke a kui Tirsa. Eyoñ a nga kui bebé anyiine mbé , nde monafam a nga wu.

¹⁸ Be nga jame nye soñ, a Israél ase a nga beʼe meyep asu dé, avale Nti a nga kobô nkulu mejô Ahiya mbo ésaé wé.

¹⁹ Mimboone mi Yérôbôam mivok: bita, njôan, mam mete mese me ne ntilane kalate mam bejô bôte yʼIsraél ba bo mbu ôse;

²⁰ Yérôbôam a nga jôô mimbu mewôm mebaé a mibaé, ane baa bʼésaa be nga bômbô vôme wua. Mone wé Nadab a nga jôô éjiane jé.

Rôbôam njô bôte ya Yuda

²¹ Rôbôam, e mona Solômon, a nga jôô e Yuda. Eyoñ a nga telébane njôô, a nga bili mimbu mewôm menyin a wua. A nga jôô mimbu awôm a zamgbwa e Yérusalém, tisone Nti a nga top e meyoñ mese yʼIsraél na a futi jôé dé. Nyia a mbe jôé na Naama, ngone Amonite.

²² Yuda a nga bo abé e mise me Nti a dutu nye a suñ aban a dañ abime bʼésaa be nga dutu nye na a suñe de.

²³ Avalʼane bʼésaa bap, be nga lôñe bito ya bikôndôʼô yôp asu mebelane map. Nalé fe be nga telé mekok a mekôn mʼazezambe e minkôle mise mi ne mbetane yôp, a e bilé bise bi ne nyumene si;

²⁴ bebo mfufub ébamba be nga too fe si Yuda melu mete, be nga bo aval ane mbia be mam mese meyoñe Nti a nga titan ôsu bone bʼIsraél be mbe.

²⁵ Mbu tane Rôbôam a nga jôô ñwô Sisak, njô bôte yʼEjipte a nga ke wosane Yérusalém.

²⁶ A nga nyoñ akume ya Ndaa Nti a akume ya ndaa njô bôt. A nga nyoñe foʼo biôme bise; a nga nyoñ toʼo bibene bi or Solômon a nga bo.

²⁷ Nde njô bôte Rôbôam a nga bo bibene bi mvot éjiane jap a kalane bie bivete bemate mbil bi mbe bi baʼaleʼe anyiine ya ndaa njô bôt.

²⁸ Eyoñ ése njô bôt a mbe a kelek e Ndaa Nti, bemate mbil be nga nyoñe bibene bite a zuu bie aba bemate mbil.

²⁹ Mimboon mi Rôbôam mivok, jam ese a nga bo, ye me nji bo ntilan e kalate minkañete bejô bôte ya Yuda?

³⁰ Bita bi mbe éyoñ ése e zañe Rôbôam a Yérôbôam.

³¹ Ane Rôbôam baa bʼésaa be nga bômbô vôme wua; ba bʼésaa be nga jambe e tisone David. A jôé nyia e mbe Naama, ngon Amonite. Mone wé Abiyam a nga jôô éjiane jé.