1 Bb. 13 - Bible en langue Bulu

Ataʼa metunaʼa ya Bétél da yoʼoban, Yérôbôam a nyoñe melep

¹ Môta Zambe a nga kui Bétél a soʼo Yuda, éyoñe Yérôbôam a nga telé ataʼa metunaʼa na a diʼi mimbon mi ne mbamba menyum, avalʼane nkobô Nti ô mbe.

² Nde a nga kobô ataʼa metunaʼa mejô me nʼabé, ane nkobô Nti ô mbe, a jô na: A ataʼa metunaʼa! A ataʼa metunaʼa! Avale di Nti a jô na: Tame yen, monafam a ye bialé nda David; jôé dé da ye bo Yôzias; a ye tyiʼi betuni ya bito ya bikôndôʼô yôp e be wo yôp, mbe ba diʼi mimbon mi ne mbamba menyum e be wo yôp, a ba ye diʼi bivese bi bôt e be wo yôp.

³ Amôs ôte ôbien, a nga ve ndem a jô na: Ndeme ya na Nti a kobôya nje nyô: ataʼa metunaʼa da ye salé zañ, a asup e nʼété yôp da ye mialan.

⁴ Eyoñe njô bôte Yérôbôam a nga wôʼô mbia mejô môta Zambe a nga kobô ataʼa metunaʼa ya Bétél nde a nga samese wo ataʼa metunaʼa yôp a jô na: Biane nye! Ane wo Yérôbôam a mbe a sameseʼe môta Zambe ô nga yemele, a nji fe bo ngule ya bulane wô mvus.

⁵ Ane ataʼa metunaʼa e nga salé, asup e nga too été yôp ve mane mialan, avale ndeme môta Zambe a nga ve e mbe, avale nkobô Nti ô mbe.

⁶ Ane njô bôt a nga nyoñe nkobô a jô môta Zambe na: Yeʼelaʼane Nti, e Zambe wôé, yeʼelaʼane nye ajô dam, nalé ma ye bo ngule ya bulane wo mvus. Ane môta Zambe a nga yeʼelane Nti, a njô bôt a nga bo nguleya dutu wo wé, wô ve bulan ane ô mbe.

⁷ Nde njô bôt a nga jô môta Zambe na: Zaʼa bi nyiine nda ô di, a ma ye ve wo jôm.

⁸ Môta Zambe a nga yalane njô bôte na: Toʼo wo ve ma éfase ya nda jôé, maa ye ke nyiine nda jôé. Maa ye ke di bidi nge nyu mendim.

⁹ Amu atiñ e nga vebane be ma nkobô Nti été na: Wo ye bo te di bidi nge nyu mendim, a wo ye bo te bulan e zen ô nga so.

¹⁰ A nga tyii zene fe teke bulan e zen a nga suane je Bétél.

Ngbwengbwem ja wôé nkulu mejô

¹¹ Nnôme nkulu mejô ô nga too Bétél. Wua ya bone bé a nga zu kañete nye mam mese môta Zambe a nga bo e Bétél môs ôte, a mejô a nga kobô njô bôt. Eyoñe bon be maneya kate ésaa wop nkañete te,

¹² a nga jô be na: A te ke zene fé? Bon be nga yene zene môta Zambe a nga so Yuda a nga ke:

¹³ ndʼa nga jô bone na: Futaʼane ma éto éjakase yôp. Ane be nga futi nye éto éjakase yôp, nde a nga tabe été yôp.

¹⁴ A nga tôñe môta Zambe a koone nye a too élé térébeñte si. A nga jô nye na: Ye wo ô ne môta Zambe a nga so Yuda? Nye na: Ma le!

¹⁵ A nga jô nye na: Bia wo zaʼa bi ke nda bi di.

¹⁶ Ve a nga yalane na: Bia wo bi se nguleya bulan a me se nguleya nyiine nda jôé. Maa ye ke di bidi, nge nyu mendim bia wo vôm ate;

¹⁷ amu e ne ma njôban, nkobô Nti été na: Wo ye bo te di bidi nge nyu mendim, a wo ye bo te bulane zen ô nga tyii éyoñ ô nga ke.

¹⁸ A nga jô nye na: Ma fe me ne nkulu mejô ane wo; Engele a te kobô ma mejô mete me soʼo be Nti na: Bulaʼane nye nda jôé, a jaʼa bidi a nyu mendim. A nga laane nye minsos.

¹⁹ Ane baa môta Zambe be nga bulan; a nga di bidi e nda jé a nyu fe mendim.

²⁰ Be ngenan be too tawôlô, ane ajô Nti é nga zu be nkulu mejô a nga bulane nye mvus.

²¹ A a nga yôtane môta Zambe a nga so Yuda na: Avale di Nti a kobô na: Amu ô nga bo abendé Nti melo a bo te baʼale abendé Nti, e Zambe wôé a nga ve wo,

²² amu ô nga bulan a di bidi a nyu mendim e vôm a nga jô wo na: Wo ye bo te di bidi nge nyu mendim, ajô te mbime wôé wo ye bo te nyiine soñ bʼésoo.

²³ Eyoñ a maneya di bidi a nyu mendim, a nga futi éto éjakase yôp asu nkulu mejô a nga soo nye,

²⁴ nde a nga ke; ane ngbwengbwem é nga bi nye zen a wôé nye. Mbime wé ô nga wuabane zene yôp. Ngbwengbwem é nga tele fe fefele mbim;

²⁵ bôt be nga lôt be nga yene mbim ô bôô zene yôp a ngbwengbwem é tele e fefele mbim; be nga kañete jame te éyoñ be nga kui e tisone nnôme nkulu mejô ô nga too.

²⁶ Nkulu mejô a nga bulane nye mvuse zen , a nga wôʼô jame te a jô na: E môta Zambe a nga bo abendé Nti melo nye le; Nti a te ve nye ngbwengbwem é nyabe nye a wôé nye, avale nkobô Nti a nga kobô nye ô mbe.

²⁷ Wôna a nga kobô bone bé a jô na: Futaʼane ma éto éjakase yôp. Ane be nga futi je.

²⁸ Nde a nga ke a koone mbim ô bôô zene yôp, éjakas a ngbwengbweme ki be tele fefele mbim. Ngbwengbwem é nji ke di mbim nge nyab éjakas.

²⁹ Ane nkulu mejô a nga bete mbime môta Zambe, ve beté wô éjakase yôp a kee wô. Ane nnôme nkulu mejô ô nga bulane tison asu meyep a njamane mbim.

³⁰ A nga jam e mbime wé soñ, a be nga yône nye be jôʼô na: Eéé! A mojañ!

³¹ Eyoñ a maneya jame nye, a nga jô bone na: Éyoñe ma ye wu, mia ye jame ma e soñe môta Zambe, mia ye bôôé bivese biam e fefel émbié.

³² Amu e ne foʼo bebela na: Nkobô bidim a nga kobô ataʼa metunaʼa ya Bétél a menda bito ya bikôndôʼô yôp mese me ne bitisone ya Samari, a jôé Nti, wo ye foʼo tôéban.

³³ Eyoñe jame te e maneya, Yérôbôam a nji bulane mvus e mbia zene wé. A nga beta telé betuni asu bito ya bikôndôʼô yôp, mbe a nga nyoñ e be bôte bese; ba bese be nga kômbô, a nga telé be betuni ya bito ya bikôndôʼô yôp.

³⁴ Jame te é nga dutu nda Yérôbôame na é bo abé; ajô te é nga man jaabane si nyô.