1 Bb. 12 - Bible en langue Bulu

Ejôé ja salé zañ: Rôbôam e Yuda, Yérôbôam Israél

¹ Ane Rôbôam a nga ke Sikem, amu Israél ase a nga zu Sikem na be telé nye njôô.

² Yérôbôam, e mone Nébat, a nga wôʼô jame te, valé a ngenan Ejipte, mfaʼa a nga tube njô bôte Solômon. Yérôbôam a nga too Ejipte.

³ Be nga lôme bôt be ke loone nye. Eyoñe te Yérôbôam a ékôane bôt ése yʼIsraél be nga suan a kobô Rôbôam avale di na:

⁴ Esoo a nga bo mbeʼe wongan adit; éyoñe ji, wo tame bo ngule bisaé ésoo a adite mbeʼe a nga titi bia bitule éveves, éyoñe te bia ye saane wo.

⁵ A nga yalane be na: Kelan a betaʼa zuane be ma den melu mela. Ane bôt be nga ke.

⁶ Ane njô bôte Rôbôam a nga sulan bemvendé be nga too fefel ésaa Solômon éyoñ a nga vee a sili be na: Mia lebe ma me yalane bôte bana aya?

⁷ Be nga yalane nye na: Nge môse ya den wo ye bo mbo ésaé ya bôte ba, nge wo saane be, nge wo yalane be a mbamba nlem , ba ye bo bebo bisaé bôé éyoñ ése.

⁸ Ve Rôbôam a nji nyoñe ngap e melebe bemvendé be nga ve nye. A nga nyoñe melebe ya ba baa be be be yaé be too bongô mbe baa be be be nga too.

⁹ A nga sili be na: Mia lebe ma me yalane bôte bana aya, éyoñ ba kobô avale di na: Boʼok e mbeʼe ésoo a nga titi bia bitule éveves?

¹⁰ E ba baa be be be nga yaé éyoñe ya bongô be nga kobô nye na: Wo ye yalane bôt ba te kobô wo avale nkobô di na: Ésoo a nga bo mbeʼe wongan adit, ve wo boʼo bia wô éveves, wo ye jô be na: Ngas ônyu jam é nʼanen a dañ angeteñ ésaa wom.

¹¹ Eyoñe ji, ésaa wom a nga titi mia mbeʼe ô nʼadite bitu ma ma ye dañe bo wô adit; ésaa wom a nga ve mia melep a minkasa, ve ma, ma ye lebe mia a alé.

¹² Eyoñe te Yérôbôam a bôte bese be nga zu be Rôbôam e môse lale, avale njô bôt a nga jô na: Betaʼa zuane be ma mvuse melu mela.

¹³ Nde njô bôt a nga yalane bôt mbia éyalan. A nji semé melep bemvendé be nga ve nye,

¹⁴ a nga kobô be, avalʼane bendôman be nga lebe nye na: Ésaa wom a nga bo mbeʼe wônan adit, ma ma ye dañe ve wô adit; ésaa wom a nga bôme mia a minkasa, ve ma ma ye bôme mia a alé.

¹⁵ Nalé njô bôt a nga bo te wôʼô bôt, amu nkôñelane ya mam ô nga so be Nti, nalé ate nkobô Nti a nga kobô Ahiya ya Silô na a kobô Yérôbôam, e mona Nébat, wo ye tôéban.

¹⁶ Eyoñ Israél ase a nga yene na njô bôt a nji vôʼôlô nye, nde bôt be nga yalane njô bôte na: Ngabe fé bia be David bi bili? Bi nji bi ngab éliʼi éziñ bia be mone Izayi! A Israél, bulaʼan e menda bindelé môé! A David, baʼaleʼe nda jôé éyoñe ji! Eyoñe te Israél a nga bulane menda bindelé mé.

¹⁷ Rôbôam a nga jôô bone bʼIsraél be nga too bitisone ya Yuda.

¹⁸ Eyoñe te njô bôte Rôbôam a nga lôm Adoram a nga jôô mame ya bisaé. Ve Israél ase a nga lume nye mekok : ane a nga wu. Rôbôam a nga nga bi ve ngule ya dañe vagoñe na a tup a ke Yérusalém.

¹⁹ Avale di nde Israél a nga bene ndaa David a kui môse wu.

²⁰ Eyoñ Israél ase a wôʼôya na Yérôbôam a bulaneya, be nga bañete nye ékôan, a telé nye njô ya Israél ase. Ayoñe Yuda étam nde e nga liʼi e tii a ndaa David.

²¹ Eyoñe Rôbôam a suaneya Yérusalém, a nga sulane ndaa Yuda a ayoñe Bényamin, bôte mewosan toyini ntet a mewôme muam na, be ke wosan Israél, nalé éjôé ja ye bulane be Rôbôam, mone Solômon.

²² Ve Zambe a nga kobô Semaéya, môta Zambe na:

²³ Kobôʼô Rôbôam, mone Solômon, njô bôte ya Yuda, a nda bôte Yuda ése, a nyô Bényamin, a bôte bevoʼo bese ya ayoñ a

²⁴ jô be na: Avale di nde Nti a kobô na: Mia ye bo te bet, a mia ye bo te wosane bobenyoñ, bone bʼIsraél! Môt ase ya be mia a bulaʼane nda jé, amu jame te da so be ma. Ane be nga bo nkobô Nti mewôk a bulan avalʼane nkobô Nti ô mbe.

Yérôbôam njôô ya Israél, nkañane bone benyaʼa be or

²⁵ Yérôbôam a nga lôñe Sikem e minkôle mi Efrayim yôp a tabe été; akôlô ya valé nde a nga lôñe Penuél.

²⁶ Ane Yérôbôam a nga jô e nleme wé été na: Éyoñe ji éjôé é ne beta bulane ndaa David,

²⁷ nge bôte bana ba ke Yérusalém a tyiʼi biôm e ndaa Nti. Nleme ya bôte ba wo ye beta bulane be masa wop, be Rôbôam, njô bôte ya Yuda, ba ye wôé ma a bulane be Rôbôam, njô bôte ya Yuda.

²⁸ Eyoñ a maneya nyoñe melep , njô bôt a nga bo bone benyaʼa be or bebaé a jô bôte na: Mi juʼuya ke Yérusalém! A Israél, bezambe be nga soo wo Ejipte mbe ba.

²⁹ A nga telé wua e Bétél a nyô mbok e Dañ.

³⁰ Eyoñe te é mbe éyoñ ya bo abé . Bôt be nga ke be wua ya bone benyak a kui Dañ.

³¹ Ane Yérôbôam a nga telé ngume nda e bito ya bikôndôʼô yôp a betuni a nga nyoñe be bôte bese be too te bôte ya bone be Lévi.

³² Yérôbôam a nga telé abôk e ngone muam é too melu awôm a metan, e too fe ane abôk be nga bo be jemek e Yuda, ane a nga bet ataʼa metunaʼa. Avale te nde a nga bo e Bétél, a tyiʼik bone benyak a nga bo biôm. A nga telé betuni asu bito ya bikôndôʼô yôp, bi a nga bo.

³³ A nga ke e ataʼa metunaʼa a nga bo Bétél môs awôm a tane ya ngone muam, ngon émien a nga top a ôsimesane vié. A nga bo abôk asu bone bʼIsraél a ke ataʼa metunaʼa na a diʼi mimbon mi ne mbamba menyum.