1 Bb. 10 - Bible en langue Bulu

Njô bôta minga ya Saba a ke Yérusalém

¹ Njô bôta minga ya Saba a nga wôʼôtan ñwumane Solômon a nga wum mfaʼa duma Nti, nde a nga zu veʼele nye a mesoé me ba.

² A nga suan e Yérusalém a beta nsamba: bekamel be beʼe bityitaʼa, or abui a mekoʼo me nʼédima. Nde a nga zu be Solômon a kate nye mam mese me mbe nye nlem .

³ Solômon a nga yeʼele nye jam ese a nga sili, a teke jam éziñ e mbe nsolan be njô bôt, nde a nga bo te yeʼele nye.

⁴ Ane njô bôta minga ya Saba a nga yene feʼe Solômon, nda a nga lôñ,

⁵ bidi ya tawôlô wé, étabaʼa bebo bisaé bé, bisaé a mengômesan me bôt be nga saane nye, biwôlô bi bôt bia kalane nye élaé , a bityiʼa bi ne ngumba a nga ve ndaa Nti:

⁶ nde a nga bi ébuʼanyu a mo a jô njô bôte na: E ne bebela, e jam me nga wôk e si jam ajô ya mejô môé a feʼe jôé!

⁷ Me nji buni mejô mete te naa me zu a yen a mise mam. Tame yen, be nji kate ma, jaʼane vʼéfase ya mam me yeneya. Feʼe jôé a mefoʼo môé bia dañe ñwumane me nga wôʼôtane be wo.

⁸ Mvom a bôte bôé, mvom a bebo bisaé bôé be tele wo ôsu éyoñ ése a wôʼô feʼe jôé!

⁹ Ebotan a Nti, e Zambe wôé, Nyô a nga yene wo mvaé, a toé wo éto njôane ya Israél! Amu Nti a nyeʼe Israél éyoñ ése, nde a nga telé wo njô bôte na ô tyiʼi mejô zôsôô .

¹⁰ A nga ve njô bôte betalañ be or ntet a mewôm mebaé, étua abui bityitaʼa a mekoʼo me nʼédima. Aval abui bityitaʼa te e nji tame yené e funaʼane di njô bôta minga ya Saba a nga ve Solômon.

¹¹ Besitima be Iram be nga soo or, ôfir, mbe fe be nga soo abui bilé bi Santal a mekoʼo me nʼédima Ôfir.

¹² Njô bôt a nga belane bilé bi Santal mfaʼa ya bo nkaʼalé asu minsamba beyia bia. Avale bilé bi Santal bite e nji beta so a bi nji beta yené a kui môse ya den.

¹³ Njô bôte Solômon a nga ve njô bôta minga ya Saba jôm ése a nga kômbô, jôm ése a nga sili, a ve fe nye biôm bia yiane njô bôt ane Solômon. Ndʼa nga bulan a ke si jé, émien a bebo bisaé bé.

Akume Solômon

¹⁴ Or a nga bo a soʼo Solômon mbu ôse a mbe betalañ mintete misaman, mewôm mesaman a besaman,

¹⁵ te lañe nyô bekuan abom be nga zuu nye, a nyô bisaé bekuane biôm, a nyô bejô bôte bese ya mfulane meyoñ a bejôô ya si éte.

¹⁶ Njô bôte Solômon a nga kôme biben bi or a ne mbiban mintete mibaé; a nga belan ében ése yʼété besikel be or mintete misaman,

¹⁷ a bone biben bi or a ne mbiban mintete mila, jia ése yʼété a nga belan bemine be or belaa; njô bôt a nga naane bie e nda ya afane Libañ.

¹⁸ Njô bôt a nga bo beta éto njôane mimbañ a dube je a or a ne mfuban .

¹⁹ Eto njôane te é nga bili abet da ke été metelé mebo mesaman, éfase ya yôp é mbe njiñelete mfaʼa ya mvus; éto é nga bili vôm ba beté mo bifas bibaé; ngbwengbwem ébaé é tele e fefele mo.

²⁰ Bengbwengbwem awôm a bebaé be nga tele e bifas bibaé ya ôbet. Teke éjôé éfe é nga tame bi avale jôme te.

²¹ Biôm bise njô bôte Solômon a nga belane bie asu menyu bi mbe mboon a or, a biôme mebelan bise ya nda ya afane Libañ bi mbe mboon a or a ne mfuban . Teke jôm é mbe mboon a argent; melu me Solômon, be nji kobô kobô ajô argent.

²² Amu njô bôt a nga bili e mañ, besitima ya Tarsis a ba be Iram; besitima ya Tarsis be nga so mimbu milale mise, be soʼo or, argent, mimbañ, bekoé a anon e ne anen.

²³ Njô bôte Solômon a mbe éwôlô a dañe bejô bôte bese ya si nyô mfaʼa ya akum a fek.

²⁴ Bôte bese be nga jeñe na be tôbane Solômon a wôʼô feʼe jé Zambe a nga futi nye nlem .

²⁵ Môt ase a nga zuu mveane wé: biôm bi ne mboon a argent, bi bi ne mboon a or, mengômesan, menga, bityitaʼa, bikabela a bemulé. Nalé a nga boban mbu ôse.

²⁶ Solômon a nga tôkan bevagoñ a bebebe bikabela; a nga bili bevagoñ toyini a mintete minyin, bewulu bikabela toyini awôm a ébaé, a nga kee bie e bitison be nga baʼale biôm mewosan e Yérusalém, e fefele njô bôt.

²⁷ Njô bôt a nga bo na argent a yené Yérusalém fe vʼane mekok , a bilé bi Sédre bi mbe abui, vʼane besikomor be ne Séféla.

²⁸ Be nga soo bikabela bi Solômon Ejipte; nsamba bekuan abom be njô bôt ô mbe ô kele nyoñe bie minsamba minsamba, be vaʼa ngume tañ;

²⁹ vagoñ wua a mbe a soʼok Ejipte a besikel be argent ntet a mewôm metan. Be mbe fe be soʼo bie asu bejô bôte ya Behétieñ; a bejô bôte ya Siri.