TITO 3 - BUKUIT NE TILIL

Atebet ne nyoljin ne bo Kristo, ak kit ne tonone

¹ Ibwatyi ichek koming’injigei bounik, ak bounatosiek, kogas it, kochobogis eng’ boisiet age tugul ne mie,

² amat komwa kiy ne ya agobo chi age tugul, amat koek bich che bo boriot, ingoek che taloen, koborjin bik tugul mutyonet tugul.

³ Amu kigi berberen agachek keny, kima kegase it, kigiberberech, keote magutik che terotin ak ureriosiek, ketebye eng’ yaitiet ak ng’etkong’, kigi che kiwechei ak kewechege.

⁴ Ago ye kingotook talasietab Jehovah Yetindennyo, ak chamnyennyi ne chamei bik,

⁵ kosoruech, ma eng’ boisionikab imanda che kigiyai acheget, ago ko u ole teptoi rirenennyi bo ge, eng’ kaunetab siget ne leel ak kaleelitetab Tamirmiriet ne Tilil,

⁶ ne kirong’wech eng’ aiyebindo, eng’ Jesu Kristo Yetindennyo;

⁷ si, ye kagiityech imanda eng’ mieindanyi, keyaech keegu che namei tuguk ko u kamang’unetab sobondab koigeny.

⁸ Bo iman ng’olyondoni, ak amache imwa tuguchuto eng’ kimnatet, si kobwat ichek che kigoyan Jehovah, koyai kotugul boisionik che miach. Miachen tuguchuto ak kotoreti bik:

⁹ ago istoege teebutik che berber, ak tetutikab ibinwek che kigosiirto, ak suriosiek, ak boriosiek agobo Ng’atutiet; amu matinyei borot ak ko buch.

¹⁰ Esie chito ne ibu toiyet ye kagitigon ne bo tai ak ne bo aeng’;

¹¹ ingen ile chito ne u noto ko kigomasta, ak koyaei tengekto, ko kagoruokyigei.

¹² Ye tun kayogu Artema, anan Tukiko, igiilge inyo eng’ Nikopoli ole ami; amu koabegechi atebe oloto eng’ betusiekab kaititiet.

¹³ Igiilge imonorsechi eng’ bandanywa Sena ng’omotiotab ng’atutik ak Apolo, si mararta kiy eng’ ichek.

¹⁴ Ak ingonetgei bikyok agichek koyai boisionik che miachen kotugul, agobo tuguk che makyingei, si maek che mayiei logoek.

¹⁵ Igatin tugul che kemi tugul. Igat ichek che chamech eng’ kayanet. Ingoteb mieindo kobotok okwek tugul.