TITO 2 - BUKUIT NE TILIL

Atebet ne nyoljin chi ne bo Kristo, ak kit ne tonone

¹ Ago ng’alal inye agobo ng’alek che nyoljin konetisiet ne bo iman:

² si koripgei boisiek che kagoeegitu, koek che bo teegisto, che bou kabwatutikwak, che bo iman eng’ kayanet, eng’ chamnyet, eng’ muitaet:

³ ko u noto chebiosok che kagoeegitu, ingoek che teegot eng’ atebosiekwak, che ma kataamik, anan che rategei eng’ divaik che chang’, konetik che bo tuguk che miach;

⁴ si kobiit konet osotik che mengechen kocham manong’otaikwak, kocham lagokwak,

⁵ koek che bou kabwatutikwak, che tililen, che boisiei eng’ gorikwak, che taloen, che kase it manong’otaikwak, si ma kimwaitae ng’olyotab Jehovah kiy ne ya:

⁶ iteechi neranik agichek koek che bou kabwatutikwak;

⁷ ibartege inyendet eng’ tuguk tugul iegu kaborunet ne bo boisionik che miachen; eng’ konetisieng’ung’ ibarte atebet ne ma ng’emaksei,

⁸ ng’alek che bo iman, teegisto, che magimuchi kiruokyi; si kobiit kolilan inendet ne kirindoech, ko matinyei kiy ne ya ne mwaitaenech.

⁹ Ingogas it otwogik kiptainikwak, ak kobaibai ichek komie eng’ tuguk tugul; amaek che wolu kiy;

¹⁰ amaek che koen eun, ago kobarta kayanet tugul ne mie; si kobiit kogochi ichek telunatet konetisietab Jehovah ne Yetindennyo eng’ tuguk tugul.

Tuguk che igiili chi ne bo Kristo koboisiei

¹¹ Amu kigotook mieindab Jehovah, ne ipchin bik tugul yetunet.

¹² Inetech kole keesie oret ne matokyingei Jehovah, ak magutik che bo ng’ony, ak ketebi eng’ ng’omnatet ne litit, ak eng’ imanda, ak eng’ oret ne tokyingei Jehovah eng’ kenyisiechu;

¹³ kigeni kamang’unet ne iberurot, noto ko toogunetab torornatetab Jehovah nenyo ne o ne Yetindennyo Jesu Kristo;

¹⁴ ne kiigoitogei agobo achek, si kobiit kotiachech eng’ tengekto tugul, ak kotililjigei bik koek chechik, che lewenotin, che igiilegei eng’ boisionik che miach.

¹⁵ Mwa tuguchuto ak iteechi ak iger kong’ koboto bounatet tugul. Amat kosasin chi age tugul.