TITO 1 - BUKUIT NE TILIL

Kagatet

¹ Paulo, otwogindetab Jehovah, ak ne kiyoktoi ne bo Jesu Kristo, ko u kayanetab che kigilewen che bo Jehovah, ak naetab imanit ne namegei ak kaiyweet ne kiywei Jehovah,

² eng’ kamang’unet ne bo sobondab koigeny, ne kiiyomis Jehovah, ne maimuchi kolembechan, koboch kenyisiek che bo koigeny;

³ ago king’any ng’olyondennyi eng’ betusiekyik eng’ amdaet, ne kigiyanwa ko u ng’atutietab Jehovah Yetindennyo:

⁴ asirjini Tito, lakwennyu ne bo iman eng’ kayanet ne kiyamdoi: Ingoteb koboten mieindo ak kalyet che bunu Jehovah Kwanda ak Kristo Jesu Yetindennyo.

Keleweni boisiek

⁵ Kiabagakten eng’ Krete amu ng’olyondoni, si kobiit ichob tuguk che ki rartootin, ak inde boisiek nganaset age tugul, ko u ye kiang’atin;

⁶ ngot komi chi age tugul ne matinyei lelut, ne manong’otiotab osotiot agenge, ne tinyei lagok che iyanotin, che magimwaitae yaitio, anan che magase it.

⁷ Amu kanyolji ribindetab kaniset koek chi ne matinyei lelut, inendet ne ribindetab boisietab Jehovah; ma ne isubi magennyi, ne ma sib konerechi, ne ma kimaiya, ne mabirisiei, ne ma ting’e keiyandit magornatetab tewernatet;

⁸ ago ne taachei toek, ne chamei che miachen, ne bou kabwatutikyik, ne bo imanda, ne tilil, ne ribegei;

⁹ ne namei ng’olyot ne kiyani ko u ole teptoi konetisiet, si komuch koteechi eng’ konetisiet ne bo iman, ak koterter kiptiyotinik.

Konetik che ma bo iman

¹⁰ Amu mi bik che chang’ che magase it, ng’ololikab ng’alek che bo buch ak kenik, mising’ ko ichek che bo kamuratanet,

¹¹ che kanyol keger kutuswekwak; che itarng’anyi go komugul, koneti tuguk che kama konyolu amu magornatetab tewernatet.

¹² Kile age eng’ ichek, ne maotionywa, Kiplembechonik Kretik kotugul, tiong’ik che yaachen, kipkeinik che choriren.

¹³ Bo iman baornatanito. Ker kong’ anyun eng’ kimnatet amu noto, si kobiit koek che bo iman eng’ kayanet,

¹⁴ ama epchin it atindonikab Yahudik, ak ng’atutikab bik che istoegei imanit.

¹⁵ Tililen tuguk tugul eng’ ichek che tililen: ago mami kiy ne tilil eng’ icheget che muruonen che maiyanotin; ago muruonen nautikwak ak kabwatutikwak.

¹⁶ Mwaei kole ingen Jehovah; ago esioi inendet eng’ boisionikwak, kigoek che kiwechei, ak che magase it, ama tilei kiy eng’ boisiet age tugul ne mie.