TIENWOGIKAL 92 - BUKUIT NE TILIL

Kilosu Jehovah amu ripsennyi

Tiendab kalosunet, Tiendo ne bo betutab sabato.

¹ Kit ne mie ko keweekyi kongoi Jehovah, Ak ketienji kaineng’ung’ eng’ kalosunoik, ee inye Ne Toror Mising’:

² Kibarta chamnyeng’ung’ ne tala karon, Ak imandang’ung’ lagatut age tugul,

³ Eng’ kibugandet ne tinyei inoik taman, ak kibugandet age; Koboto ketubet ne cheei mising’.

⁴ Amu kiibaibaa, ee Jehovah, eng’ boisieng’ung’: Agasige eng’ boisionikab euneguk.

⁵ Eechen ne tia boisioniguk, ee Jehovah! Matinyei ole bochin kabwatutiguk.

⁶ Maingen chito ne u tiony; Amaiguitos ne berber;

⁷ Ye kaeegitu kiptengeginik ko u suswek, Ak ye kanyor berurto yaikab tengekto; Ko si keng’em agoi koigeny:

⁸ Ago inye, ee Jehovah, imi barak agoi koigeny.

⁹ Amu, keero, ee Jehovah, buniguk, Amu, keero, lustos buniguk. Kiyestooti yaikab tengekto tugul.

¹⁰ Ago kiitoror kuinennyu ko u kuinetab soet: Kagiilena mwaita ne kararan.

¹¹ Kogogeer konyekyuk agichek magennyu eng’ bunikyuk, Ak kogogas itikyuk magennyu eng’ yaikab yaitio che setyina.

¹² Sobei ne bo imanda ko u tiret: Bitei ko u tarakwetab Lebanon.

¹³ Icheget che kigiminji gotab Jehovah Koeegitu eng’ seremusiekab gotab Kamuktaindennyo.

¹⁴ Ta koiitos agot ko kagoosegitu; Tuonitu amu beek che eei, ak kotunendos:

¹⁵ Si kobiit kobarta kole bo iman Jehovah; Inendet ruandennyu, ama mi kiy ne ma bo iman eng’ inendet.