TIENWOGIKAL 7 - BUKUIT NE TILIL

Kesom keyaiywech imanda ye iimech che yaachen

Tiendo ne bo Daudi, ne kitienji Jehovah, agobo ng’alekab kus ne bo oretab Benjamin

¹ Ee Jehovah Kamuktaindennyu, inye ne amang’un: Sorua eng’ ichek tugul che onwa, ak ieta;

² Si magerer sobondanyu ko u ng’etundo, Si matonaton, ama mi chi ne sorua.

³ Ee Jehovah Kamuktaindennyu, ngo kiayai ni; Ngo mi tengek eunekyuk;

⁴ Ngo kiayaakyi yaitio ne kigimi tuwai eng’ kalyet; (Ee, kiasoru inendet ne ki bunyondennyu ne kima awekyi kiy:)

⁵ Ingoon bunyot sobondanyu, kot konam; Ee, ingotiekyi ng’ony sobondanyu, Ak konde temburiek teegistanyu.

⁶ Ng’eet, ee Jehovah, eng’ neregeguk, Tonon kirinde koromnatetab neregekab bunikyuk: Ng’eet amu ane; kiing’at kiruoget.

⁷ Ak ingoyiemin tuiyetab bororiosiek: Ak iweege barak ibou ichek.

⁸ Ibesiechin Jehovah bororiosiek: Iruokseiywa, ee Jehovah ko u imandanyu, ak ko u kagesunatennyu bo ge ne mita.

⁹ Ingowong’gei tengektab kiptengeginik, ago igimit ne bo imanda: Amu tiemei Kamuktaindet ne bo imanda mugulelwek ak soromok.

¹⁰ Mi long’ennyu eng’ Kamuktaindet, Ne soru che bo iman eng’ mugulelwek.

¹¹ Kamuktaindet ko kiruogindet ne bo imanda, Ee Kamuktaindet ne nerekyin kiptengeginik kotugul.

¹² Ngo masik chi, kolit rotwennyi bo chok; Kagoriich kwangennyi, ak kachob.

¹³ Kigochopchi karik che kibare; Yaei kipchabonikyik che bo mat.

¹⁴ Ogeero, kasei ng’wanindab tengekto ne machei kosich; Ee, kogomanach yaitiet, ak kosich lembeita.

¹⁵ Kogochob keringet, kot kobal, Ak kogobutyi keringonoto kobalei.

¹⁶ Weekyingei metinnyi yaitiennyi, Ak kobutyi baragutab metinnyi koromnatennyi.

¹⁷ Aweekyini Jehovah kongoi ko u imandanyi: Ak atienjini kalosunet kainetab Jehovah ne Toror Mising’.