TIENWOGIKAL 5 - BUKUIT NE TILIL

Kesa koribech Jehovah eng’ bunik

Bo Ne O eng’ Butik; eng’ ndurerusiek. Tiendab Kalosunet ne bo Daudi

¹ Epchi it ng’alekyuk, ee Jehovah, Ruchi kabwatutikyuk.

² Kas ye atwegu arire, Laitoriandennyu ak ko Kamuktaindennyu: Amu inye ne asae.

³ Ee Jehovah, igase kutinnyu karon; Ak atetun saennyu karon, ak ageni.

⁴ Amu ma i Kamuktaindet ne ibaibaitune yaitio: Ama tebe oldang’ung’ yaitio.

⁵ Matonondos eng’ taing’ung’ menotik: Iweche tugul che yaei tengekto.

⁶ Ing’eme che mwaei lembechek: Wechei Jehovah chitab korotik ak ng’alindet.

⁷ Ago ane, anyone gong’ung’ eng’ chang’indab rireng’ung’ bo ge: Eng’ kaiyweisieng’ung’ agutunyi atokyinige hekalung’ung’ ne tilil.

⁸ Ee Jehovah, indoiywa eng’ imandang’ung’ amu che sapchina; Ilitit oreng’ung’ eng’ tainnyu.

⁹ Amu mami lititindo eng’ kutuswekwak; Tengek kityo mugulelwekwak: Kererit ne yatat mokwekwak; Lasei bich eng’ ng’elyebwekwak.

¹⁰ Iityi ichek tengekto, ee Kamuktaindet; Ingobutyo eng’ kiruogutikwak: On ichek eng’ chang’indab bistoenywa; Amu kiingeleljin.

¹¹ Ago ingoboiboitu ichek tugul che imang’un, Ingotienso eng’ boiboindo ichek agoi, amu iribe ichek: Ingoboiboitu agichek eng’ inye che chamei kaineng’ung’.

¹² Amu iberuri inye chitab imanda; Ee Jehovah, iyieme inendet chamnyeng’ung’ ko u eng’ torgochet.