TIENWOGIKAL 4 - BUKUIT NE TILIL

Saetab koskoleny ne bo chi ne baibai, ne mi kalyet

Bo Ne O eng’ Butik; eng’ kibugandinik che bo inoik. Tiendab kalosunet ne bo Daudi.

¹ Wolwa ye aguursei, ee Kamuktaindet ne bo imandanyu; Kiindea barautiet ye kiatinye nyalilda; Rirena, ak igaswa saennyu.

² Ee okwek, werikab bik, owale teegistanyu koek tewernatet kot kotianit? Ochame che manamegei ak kiy, ak ocheng’e lembechek?

³ Ago onai ni ole kigotabanjigei Jehovah chito ne bo iman: Kasei Jehovah ye aguure inendet.

⁴ Obotanse, amoyai tengek: Ong’alaljigei eng’ mugulelwekwok eng’ itok, ak osisye.

⁵ Ogoite tiseiywek che bo imanda, Ak omang’u Jehovah.

⁶ Mwaei che chang’ kole, Ng’o ne iboruech kiy ne mie? Ee Jehovah, tokyech lapkeiyetab togeng’ung’.

⁷ Kiinde muguleldanyu kagasetab ge, Kosiir ne kitinyei ichek ye kingotesak bekwak ak divaikwak.

⁸ Alyeldoi eng’ kalyet, ak kanuuchi: Amu inye Jehovah, inyege ne igona ameng’is eng’ kalyet.