TIENWOGIKAL 2 - BUKUIT NE TILIL

Laitornatetab ne iilat ne bo Jehovah

¹ Amu nee si koyumgei bororiosiek ak koboldos, Ak kobwatoti bik tuguk che manamegei ak kiy?

² Tetegei laitorinikab ng’ony, Ak iruochi bounik che kagotuiyo, Agobo Jehovah ak nenyi, ne iilat, kole,

³ Ongeng’eti tugukwak che ratisie, Ak kewirte boroonikwak eng’ oldanyo.

⁴ Tun roriei inendet ne tebyei eng’ kipsengwetisiek: Ak kochot Kiptaiyat ichek.

⁵ Ak kong’alalji anyun eng’ neregekyik, Ak konyalil ichek eng’ neregekyik che ng’wonen:

⁶ Ago kande laitoriandennyu Tulwennyu ne tilil ne bo Sion.

⁷ Abartoi ng’atutiet: Kilenja Jehovah, I werinnyu; Kaasichin rani.

⁸ Soma, si agonin bororiosiek koek boroteng’ung’, Ak agonin tabanwekab ng’ony kobunjin.

⁹ Itue ichek siaritab karnet; Ak ituatui ichek ko u rokyetab cheptereniot.

¹⁰ Noto anyun ong’omegitu, laitorinichu: Onetge, okwek kiruogikab ng’ony.

¹¹ Oboisiechi Jehovah eng’ kaiyweisiet, Ak oboiboitu eng’ botanet.

¹² Oming’inityige werit si manerech, ak olusye eng’ oret, Amu negit kolalyo neregekyik. Iberurotin ichek tugul che imang’u inendet.