TIENWOGIKAL 141 - BUKUIT NE TILIL

Sat kenamge ak Jehovah

Tiendab kalosunet ne bo Daudi.

¹ Kaaguurin Jehovah; chogu nyonja: Epchi it kutinnyu, ye aguurin.

² Ingotogosta saennyu ko u nyamdutik eng’ taing’ung’; Ingoigei eunekyuk che anamjini barak, korosiot ne bo koskoleny.

³ Nde ribindet kutinnyu, ee Jehovah; Rib kurgetab kutinnyu.

⁴ Ametokyi muguleldanyu kiy age tugul ne ya, Koboisie boisionikab tengekto Koboto bik che yaei tengekto: Amechamwa aam tugukwak che anyiny.

⁵ Ingobira ne bo iman, si koek noto ne mie; Ak ingogera kong’, kogergeit anyun noto ak mwaita ne mi metinnyu; Amat koesio metinnyu: Amu mametoi asa agot eng’ kwenutab tengekwogikwak.

⁶ Kigitoorta kiruogikwak kong’irtae ruandet, Kogas anyun ng’alekyuk; amu anyinyen.

⁷ Ko u ye ibati chito ng’onyut ak kogereri, Ko u noto iseeroksei kowekyok eng’ kutitab kererit.

⁸ Amu inyalin konyekyuk, ee Jehovah Kiptaiyat: Amang’un inye; amegochi sobondanyu kobanan.

⁹ Riba si manama mestet ne kiriich ichek agobo ane, Ak mestonokab yaikab yaitio.

¹⁰ Ingobutyi kiptengeginik mestonokwak, Ye achilili.