TIENWOGIKAL 139 - BUKUIT NE TILIL

Ingen Jehovah tuguk tugul ak komi komoswek tugul

Bo Ne O eng’ Butik. Tiendab kalosunet ne bo Daudi.

¹ Ee Jehovah, kiisiacha, ak kiinaa.

² Ingen ye atebye ak ye ang’eete, Ingen kabwatutikyuk agot ngimi ole loo.

³ Isiachi korennyu ak ole arue, Ak ingen ortinwekyuk tugul.

⁴ Amu mami ng’olyo ng’elyeptannyu, Keero, ingen inye tugul, ee Jehovah.

⁵ Kiiyiema tai ak let, Ak kiigonoora eung’ung’.

⁶ Bo kwong’et ne o eng’ ane, ng’omnatet ne u noto; Toror, mamuchi aityi.

⁷ Awendoti ano aistoege Tamirmirieng’ung’? Anan amwechini ano ole memi?

⁸ Ngatogoste kipsengwet, imi oloto: Agot ngaite itogunnyu eng’ oldab che kigobek, keero, imi oloto.

⁹ Ngaib kebebaikab karon, Ak awe atebe tabanwekab nyanjet;

¹⁰ Kondoiywa eung’ung’ agot eng’ oloto, Ak nama eung’ung’ ne bo tai.

¹¹ Ngot amwa ale, tucha mesundeito iman, Ak ngale koek lapkeiyet ne yiema, kemout;

¹² Ko agot mesundeito, ko maung’enengei, Ago iluu kemout ko u bet: Kergei mesundeito ak lapkeiyet eng’ inye.

¹³ Amu inye ne kiiyai sobondanyu: Kiitucha eng’ moetab kamennyu.

¹⁴ Aweegun kongoi, amu kigiyaa eng’ oretab kaiyweisiet, ak eng’ kwong’utiet: Kwong’utik boisioniguk. Ak ingen sobondanyu ng’olyondonoto komie.

¹⁵ Maung’enenge bortanyu, Ye kigiyaa eng’ ung’ot, Ak ye kigimimia eng’ ng’omnatet eng’ ng’ony orit.

¹⁶ Kigeer konyeguk bortanyu kotom kosulda, Ak kigisirji bukuing’ung’ kebeberwekyuk tugul, Che kigiyaei betut age tugul, Ye kitom kobiit agot agenge eng’ ichek.

¹⁷ Kororon ne tia kabwatutiguk che iting’ena, ee Kamuktaindet! Eechen ne tia ichek tugul ko kagiyomo!

¹⁸ Nda aiiti ichek, ko chang’ kosiir ng’aniek: Ye agosu, ko ta ami koboten.

¹⁹ Iman, ibare kiptengeginik, ee Kamuktaindet: Oistoenage anyun, okwek bik che tumdoi korotik.

²⁰ Amu mwaei ichek tengekto agobo inye, Ak mwaei kaineng’ung’ buch buniguk.

²¹ Ee Jehovah, tos maweche ichek che wechin? Ak manerekyini ichek che ng’eetyinin?

²² Aweche ichek konyi: Aiiti ichek ale bunikyuk.

²³ Isiacha, ee Kamuktaindet, ak inai muguleldanyu: Tiema, ak inai kabwatutikyuk:

²⁴ Ak igeer ngo mi or age tugul ne bo tengek eng’ ane, Ak indoiywa eng’ oret ne bo koigeny.