TIENWOGIKAL 10 - BUKUIT NE TILIL

Kesom koruokyi Jehovah che yaachen

¹ Ee Jehovah, amu nee si itonone ole loo? Kalya si iung’ge eng’ betusiekab nyalilda?

² Isubi kiptengeginik che menot kibananok eng’ koromnatet; Ingonam ichek mestonok che kigobwat.

³ Amu ilosunegei kiptengekyot magetab muguleldanyi, Ak koberuri ne koi kong’, ak kosas Jehovah:

⁴ Len kiptengekyot eng’ menotennyi, Mamage kiy: Len eng’ kabwatutikyik tugul, Mami Kamuktaindet.

⁵ Mi nyalilda ortinwekyik kotugul; Mi barak kiruogutiguk, maityin kogeer: Ak sasei inendet bunikyik tugul.

⁶ Len eng’ muguleldanyi, Maistaa chi: Manyoru ane yaitiet eng’ ibinwek tugul.

⁷ Nyiitat kutinnyi chubisiet ak ng’alset ak sastaet: Mitei ng’elyeptanyi mastaet ak yaitiet.

⁸ Tebe ole ung’egei eng’ nganasok: Barei che matinyei ng’ogi eng’ komoswek che ung’otin: Sapchin konyekyik inendet ne nyerat.

⁹ Saptoi eng’ ole ung’at ko u ng’etundo eng’ kebenennyi: Sapchin kibananok: Namei kibananiat, ye ichuuti eng’ mestennyi.

¹⁰ Ribisi, ing’uruksei, Ak kobutyo che nyalildos amu chechik che kimen.

¹¹ Len eng’ muguleldanyi, Kogoutie Kamuktaindet: Unyei togennyi; mageerei agoi.

¹² Ng’eet, ee Jehovah; ee Kamuktaindet, namji barak eung’ung’: Ameutie kibananok.

¹³ Amu nee si kosas kiptengekyot Kamuktaindet, Ak kolen eng’ muguleldanyi, Memage kiy?

¹⁴ Koigeer inye; amu igeere mastaet ak tagisiet, si ibou eng’ eung’ung’: Tiienengei ne nyerat; Kiiegu toretindetab ne matinyei kwanda.

¹⁵ Iri eutab kiptengekyot; Ak icheng’ tengektab ne ya, kot koma komi.

¹⁶ Laitoriat Jehovah ne bo koigeny ak koigeny: Kigobetyo bororiosiek eng’ emennyi.

¹⁷ Kiigas inye, Jehovah, magetab che taloen: Ichobe mugulelwekwak, igochini itiguk kogas;

¹⁸ Si ibesiechi ne matinyei kwanda ak ne kisastae, Si mata komuiso kogeny chi ne bo ng’ony.