TAUNET 9 - BUKUIT NE TILIL

Maranet

¹ Ak kiiberur Kamuktaindet Noa ak werikyik, ak kolenji, Oiiye, otesage, ak onyi ng’ony kogeny.

² Ak koiyweak tiony age tugul ne bo ng’ony ak konyor tobotiet agobo okwek, agot tarit age tugul ne bo barak, ak tuguk tugul che bendoti eng’ ng’ony, ak njirenik tugul che bo nyanjet, kaginde eunekwok.

³ Egu amitwogikwok kiy age tugul ne sobei ne wendoti; kagonok tugul ko u ye kiga agonok ngwek alak tugul che nyalilen.

⁴ Ago moam banyek koboto sobondanyi; sobonoto ko korotikyik.

⁵ Amagenok iman korotikab sobonwekwok agobo sobondab chi; eng’ tiony age tugul amage korotichoto; ak eng’ chi, agot eng’ tupchetab chi age tugul, amage sobondab chi.

⁶ Ak ne tumdoi korotikab chi, kotumdoi chito chechik agine: amu kiyai Kamuktaindet chi eng’ itondanyi.

⁷ Oiiye anyun okwek; otesage; oiiye mising’ eng’ ng’ony, otesage eng’ oloto.

Noa ak ketitab sabibuk

⁸ Ak kilenji Kamuktaindet Noa, ak werikyik che kimi koboto inendet,

⁹ Ogeero, kaagimit, ane, kayomisennyu kobotok ak koboto iyoteng’wong’ ne biitu let;

¹⁰ ak koboto kiy age tugul ne sobei ne mi kobotok, tarit, tany ak tiony age tugul ne mi kobotok eng’ ng’ony; eng’ tugul che mandoi eng’ melit, agot tiony age tugul ne bo ng’ony.

¹¹ Ak agimit kayomisennyu kobotok, ale, ma kebarei kiwong’u eng’ beek che bo maranet kogeny, tugul che soptos; ak ma kobiitu kogeny maranet ne ng’emei ng’ony.

¹² Ak kimwa Kamuktaindet kole, Kaborunet ni, ne bo kayomiset ne kagiyomisge eng’ kwenunnyo ane, ak okwek ak kiy age tugul ne sobei ne mi kobotok ak ibinwek che bendi agoi koigeny.

¹³ Kande chemng’isiriet boldet, si koek kaborunet ne bo kayomiset ne mi kwenunnyo ak ng’ony.

¹⁴ Ak ye kaauure boldet ng’ony, kotook anyun eng’ yoto chemng’isiriet eng’ boldet,

¹⁵ abwat anyun kayomisennyu ne mi kwenunnyo ane, ak okwek ak kiy age tugul ne sobei ne tinyei borto; ak ma kobiitu beek kogeny che egu maranet ne iwong’u tugul che bo borwek.

¹⁶ Ak ye took anyun chemng’isiriet eng’ boldet, ageer, si kobiit abwat kayomiset ne tebyei agoi koigeny ne mi kwenutab Kamuktaindet ak kiy age tugul ne sobei ne bo bor, ne mi ng’ony.

¹⁷ Ak kilenji Kamuktaindet Noa, Kaborunet ni, ne bo kayomiset ne kaagimit eng’ kwenunnyo ane, ak tugul che bo borwek che mi ng’ony.

¹⁸ Ak werikab Noa che kimong’ eng’ melit, ko ki Sem, Ham, ak Japet: ak Ham ko kwandab Kanan.

¹⁹ Chuto somok ko ki werikab Noa: ak kiyom ng’ony komugul iyotenywa.

²⁰ Ak kitoi Noa koek kabatindet, ak kimin ketikab sabibuk eng’ mbar:

²¹ yeityo koee maiyek ak kobogit ak koteb ach ngor eng’ emainnyi.

²² Kigeer Ham, kwandab Kanan, kotebyei kwandanyi ach ngor, ak kimwachi tupchosiekyik aeng’ che kimi sang’.

²³ Ak kiinem Sem ak Japet sambut, komure tigigoikwak ichek tuwai ak kibee batai, ak kotuch ach ngorietab kwandanywa; ak kiituktochi batai, si mageer ach ngorietab kwandanywa.

²⁴ Ak kisob Noa eng’ bogitennyi, ak konai tuguk che kagoyachi werinnyi ne ming’in.

²⁵ Ak kile, Ingochubok Kanan; Koek otwogindetab otwogik che bo tupchosiekyik.

²⁶ Ak kile, Ingoberurok Sem eng’ Jehovah Kamuktaindennyu; Ak ingoek Kanan otwogindennyi.

²⁷ Ingobara Kamuktaindet Japet, Ak ingotebote emaisiekab Sem; Ak ingoek Kanan otwogindennyi.

²⁸ Ak kitar Noa kenyisiek bogol somok ak konom ye kingobata maranet.

²⁹ Ak betusiek tugul che bo Noa ko ki kenyisiek bogol sogol ak konom: si komee.