TAUNET 8 - BUKUIT NE TILIL

Maranet

¹ Kiibwat anyun Kamuktaindet Noa, ak kiy age tugul ne sobei, ak tuga tugul che kimi koboto inendet eng’ melit: ak kiiyokyi Kamuktaindet usonet kousyi ng’ony, ak kiweeigei beek mutyo;

² ak kigerogis kong’ik che kutune beek che bo riret, ak keger tirisiokab kipsengwet, ak kegirinda ropta ne bunu kipsengwet komugul, si mata korobon;

³ ak kiweeigei beek eng’ ng’ony eng’ betusiechoto tugul: ak kingobata betusiek bogolu ak konom kong’ering’itu beek.

⁴ Ak kitebe melit tulonokab Ararat eng’ arawetab tisab, betutab taman ak tisab.

⁵ Kiweeigei beek mutyo kong’ering’itu kotugul kot koit arawetab taman, ak eng’ arawetab taman eng’ betut ne bo tai ne bo arawanato, kotook walisiekab tulonok.

⁶ Ak ye kingobata betusiek artamu, koyat Noa tirisietab melit ne kiga yai.

⁷ Kiimaanda chepkugit, kotirirenot kot kotenyo beek eng’ ng’ony.

⁸ Kiimaanda anyun cheptuget, si kobiit kogeer ngo kagong’ering’itu beek eng’ emet komugul;

⁹ ago kimanyor cheptuget ole namei, ak koweekyigei Noa eng’ melit, amu kita komi beek ng’ony komugul: ak koyogoito eunnyi, konam koib konyo ole mi eng’ melit.

¹⁰ Ak kita kotebi betusiek alak tisab; yeityo komanda cheptugonoto eng’ melit kogeny.

¹¹ Ak koweekyigei inendet cheptugonoto koskoleny; ogeero, kiibune kutinnyi sogot ne tuon ne bo emdit ne kisus: kinai Noa eng’ noto anyun kole, teng’oti beek.

¹² Kita kotebi betusiek alak tisab; yeityo komaanda cheptugonoto; ak mata koweekyigei inendet kogeny.

¹³ Kitenyo beek anyun eng’ ng’ony eng’ kenyitab bogol lo ak agenge eng’ arawet ne bo tai, betut ne bo tai ne bo arawanato; ak kiisto Noa tuguk che kiga kisiebe melit, ak kogeerot, ogeero, kagosai emet.

¹⁴ Kiyaam anyun ng’ony arawet ne bo aeng’ eng’ betut ne bo tiptem ak tisab ne bo arawanato.

¹⁵ King’alalji anyun Kamuktaindet Noa, kolenji,

¹⁶ Mande eng’ melit, inye ak osotiondeng’ung’, ak weriguk, ak osotikab weriguk.

¹⁷ Yatu komong’ kiy age tugul ne sobei ne mi koboten ne tinyei borto, taritik, ak tuga, ak kiy age tugul ne ichuutegei ng’ony; si kobiit koiiyo kochang’ait eng’ ng’ony, ak kotesogis eng’ ng’ony.

¹⁸ Kimanda anyun Noa, ak werikyik, ak osotiondennyi, ak osotikab werikyik:

¹⁹ kimanda anyun eng’ melit tiony age tugul, ak kiy age tugul ne ichuutegei, ak tarit age tugul, ak tugul che bendote ng’ony; ko u ortinwekwak.

²⁰ Kiteekyi Noa Jehovah kaptisisiet, kinam anyun eng’ tiony age tugul ne mie ak eng’ tarit age tugul ne mie, ak kogoito kagochinoik che kibeelei eng’ kaptisisiet.

²¹ Ak king’uuchi Jehovah anyinyindo ne bo nyamdutik; ak kole Jehovah eng’ muguleldanyi, Ma achube ng’ony kogeny agobo chi, amu yaachen kabwatutikab muguleldab chi koboch koming’in; ak ma abare kogeny agoi, tuguk tugul che soptos, ko u ye kiayai.

²² Kota komi ng’ony ko mabegu kolset ak kesisiet, kaititiet ak kiptoret, kemeut ak iwot, bet ak kemoi.