TAUNET 7 - BUKUIT NE TILIL

Maranet

¹ Kilenjin Jehovah Noa, Obwa melit, inye ak bikab gong’ung’ tugul; amu kaageerin ale i bo imanda eng’ tainnyu eng’ ibini.

² Ketu che bo tiong’ik alak tugul che miachen tisab tisab, kirgit ak ne kotoy; ak che bo tiong’ik che ma miachen aeng’, kirgit ak ne kotoy;

³ ak che bo taritik che bo barak agichek, tisab, kirgit ak ne kotoy: si kerib kosopcho iyotenywa eng’ ng’ony komugul.

⁴ Amu tomo betusiek tisabu, si ayokyi ropta ng’ony korobonji betusiek artam ak kemousiek artam; ak abar awong’u eng’ ng’ony komugul kiy age tugul ne sobei ne kiga ayai.

⁵ Ak kiyai Noa tugul ko u ye king’at Jehovah inendet.

⁶ Ak kiga kotar Noa kenyisiek bogol lo si kobiitu maranet eng’ ng’ony.

⁷ Kiba anyun Noa melit ak werikyik, ak kwondanyi, ak kwonyikab werikyik, koboto inendet, si kochililye beekab maranet.

⁸ Kiba anyun alak eng’ tiong’ik che miachen, ak che ma miachen, ak taritik, ak kiy age tugul ne ichuutegei ng’ony,

⁹ aeng’ aeng’, ole mi Noa eng’ melit, kirgit ak ne kotoy, ko u ye king’at Kamuktaindet Noa.

¹⁰ Ak kingobata betusiek tisabu, kobiit beekab maranet eng’ ng’ony.

¹¹ Eng’ kenyit ne kiite Noa kenyisiek bogol lo, arawet ne bo aeng’, betutab taman ak tisab ne bo arawet, eng’ betunoto anyun koyatogis kong’ik che kutune beek che bo riret ne o, ak koyatogis tirisiokab kipsengwetisiek.

¹² Ak kirobonji ng’ony betusiek artam ak kemousiek artam.

¹³ Kiba melit Noa eng’ betunoto, koboto Sem, Ham, ak Japet, werikab Noa, ak osotiotab Noa, ak osotik somok che bo werikyik;

¹⁴ icheget, ak tiony age tugul ko u kergeindanyi, ak tugul che kiyagi ko u kergeindanywa, ak kiy age tugul ne ichuutegei ng’ony ko u kergeindanyi, ak tarit age tugul ko u kergeindanyi, tarit age tugul ne tirireni.

¹⁵ Kiba melit ole mi Noa, alak tugul che bo borwek, aeng’ aeng’, che tinyei kabusetab sobondo.

¹⁶ Ak ichek che kiba, ko ki kirgit ak ne kotoy, tugul che tinyei borwek, ko u ye king’at Kamuktaindet inendet: ak kigerji Jehovah anyun Noa orit.

¹⁷ Ak kimarane beek ng’ony betusiek artam; kitesak beek, ak koganab melit kwo barak, kot kolooit eng’ ng’ony.

¹⁸ Kigimegitu beek, ak ko tesak mising’ eng’ ng’ony; ak kowendote melit beek barak.

¹⁹ Kigimegitu beek eng’ ng’ony mising’ kosiir; ak kituch tulonok che koen, che mi kureretab kipsengwet komugul.

²⁰ Kichang’it beek kot kotuch tulonok che itei kakwautik taman ak mut che bo eut.

²¹ Kibek tugul che bo borwek che kibendote ng’ony, taritik, ak tuga, ak tiong’ik, ak tiong’ik tugul che mengechen che uuoti eng’ ng’ony, ak chi age tugul.

²² Kibek tugul che tinyei eng’ serunekwak kabusetab tamirmiriet ne sobei, ak tugul che mi emet ne yaamat.

²³ Ak kigibar kiwong’ kiy age tugul ne kisobei, ne kimi ng’ony komugul, chi ak tany, agot ne ichuutegei, ak tarit age tugul ne bo barak; kigibar kiges eng’ ng’ony; Noa kityo ne king’et, koboto ichek che kimitei ak inendet eng’ melit.

²⁴ Ak kigimegitu beek eng’ ng’ony betusiek bogol ak konom.