TAUNET 6 - BUKUIT NE TILIL

Ng’olyot agobo maranet

¹ Ak ye kingotoi kotesogis bik eng’ ng’ony, ak kigisikyi ichek tibik,

² kogeer anyun werikab Kamuktaindet tibikab bik kole kororon; ak kiimutygei tugul che kilewen koek kwonyikwak.

³ Ak kimwa Jehovah kole, Mabortos Tamirmiriennyu ak chi agoi, amu inendet ko borto: eng’ noto anyun, egu betusiekyik kenyisiek bogol ak tiptem.

⁴ Kimitei Nepilik ng’ony eng’ betusiechoto, ak kogeny ye kingobata noto, ye kingotuiyogei werikab Kamuktaindet ak tibikab bik, kosikyi ichek lagok: koek lagochoto bik che ki nyigonen, choto ki bo keny, murenik che ki toogunotin.

⁵ Ak kigeer Jehovah kole, O mising’ tengektab chi eng’ ng’ony, ak kole, kabwatutik tugul che bo muguleldanyi ko tengekto kityo betut age tugul.

⁶ Kiibwat Jehovah kole, kima ko ta mie, koyai chi eng’ ng’ony, ak kigas ng’wanindo eng’ muguleldanyi.

⁷ Ak kimwa Jehovah kole, Abere awong’u bik che kiatau ayai eng’ ng’ony komugul; kong’eete chi, ak tiony, ak ne ichuutegei, agoi tarit age tugul ne bo barak; kima ko ta mie ayai ichek.

⁸ Ago kichamak Noa eng’ taitab Jehovah.

⁹ Chu ko ortinwekab Noa. Ki chito ne bo imanda Noa, kiigesunotgei eng’ ibindanyi: kibendoti Noa ak Kamuktaindet.

¹⁰ Ak kisich Noa werik somok, Sem, Ham ak Japet.

¹¹ Ak kiga kong’emak ng’ony eng’ taitab Kamuktaindet, ak kiga konyi ng’ony koromnatet.

¹² Ak kigeer Kamuktaindet ng’ony, ogeero, kigong’emak; amu king’em bik tugul ortinwekwak eng’ ng’ony.

¹³ Kilenji Kamuktaindet Noa, Kagoit tainnyu kagesunetab borwek tugul; amu kanyi ng’ony koromnatet amu ichek; eng’ noto anyun, ang’eme ichek koboto ng’ony.

¹⁴ Yachigei melit ne bo ketikab taragonik; ak ipchei gorik che mengechen eng’ melit, ak imale manget orit ak sang’.

¹⁵ Ak iyai melit ko u ni: koindanyi ko kakwautik bogol somok che bo eut, ak tebeesindanyi ko kakwautik konom che bo eut, ak koindo ne bo tononennyi ko kakwautik sosom che bo eut.

¹⁶ Ak iyai ole bunu lapkeiyet eng’ melit, ak iyai koek tonon kakwautiet agenge ne bo eut; ak inde kurgennyi tabandab melit ak ipcheune melit somok, ne bo ng’ony, ak ne bo kwen, ak ne bo barak.

¹⁷ Ogeero, aipchini ane ng’ony maranet ne o ne bo beek, si ang’eme borwek tugul, age tugul ne tinyei kabusetab sobondo, eng’ kureretab kipsengwet; ak kome age tugul ne mi ng’ony.

¹⁸ Ago kaagimit kayomisennyu koboten: ak inyo melit, inye, ak weriguk, ak kwondong’ung’, ak kwonyikab weriguk.

¹⁹ Ak igetu alak eng’ tuguk tugul che soptos che bo borwek kobwa melit orit, aeng’ aeng’, che bo oret age tugul, si irib kosopcho koboten; lewen kirgit ak ne kotoy.

²⁰ Ak che bo taritik ko u kergeindanywa, ak che bo tuga ko u kergeindanywa, ak che bo alak tugul che ichuutegei che bo ng’ony ko u kergeindanywa, kobwanjin aeng’ aeng’ che bo oret age tugul, si irib kosopcho.

²¹ Ak iipchige amitwogik alak tugul che kiamei; iyumjige anyun, si koek amitwogiguk, ak chechuak.

²² Ak kiyai Noa ko u noto; ko u tugul che king’at Kamuktaindet inendet, kiyai anyun.