TAUNET 50 - BUKUIT NE TILIL

Tubetab Jakoboa-k kalilatetab Josep

¹ Kiing’uruk anyun Josep kotokyigei togetab kwandanyi, ak kirirji, ak kong’utut.

² Ak king’at Josep otwogikyik chepkerichinik konde kerichek mustab kwandanyi: ak kiinde chepkerichinichoto kerichek mustab Israel.

³ Ak kiigesgei betusiek artamu agobo inendet: amu tenitu choto betusiek che kicham kinde kerichek: ak kirirji Misrik inendet betusiek tamanwogik tisab.

⁴ Ak kingo kagobata betusiek che bo rirek, kong’alalji Josep bikab gotab Parao, kolenji, Ngo kianyoru chamet eng’ taing’wong’, ko kaigai omwachi Parao kogas komie eng’ itikyik, olenji,

⁵ Kimakwa baba ayosio, ak kile, Keero, kamei: tupcha kererinnyu ne kiachopchige eng’ emetab Kanan. Ara anyun, kaigai igona atogosta awa atub baba, si aweeige.

⁶ Ak kilenji Parao, Ui togoste, itub kwandang’ung’, ko u ye kimagun kwandang’ung’ iyosie.

⁷ Akiktogosta anyun Josep kwo kotub kwandanyiu: ak kitogosta koboto inendet otwogik tugul che bo Parao, ak boisiekab gonnyi, ak boisiek tugul che bo emetab Misri,

⁸ ak kotab Josep komugul, ak ktupchosiekyik, ak bikab gotab kwandanyi: kobata lagokwak, ak kechirekwak ak tuga, che king’et eng’ emetab Gosen.

⁹ Ak kiba koboto inendet karisiek ak bik che lanyei mbartanyisiek: ki bik che chang’ kot.

¹⁰ Ak kiit ruanyut kne kiborse ne bo Atad, ne mitei Jordan bitonin, ak kiiteiyo eng’ oloto eng’ rirek che ng’wonen che bichiien: ak king’at kerirji kwandanyi betusiekd tisab.

¹¹ Ak ye kingogeer che menyei emototo, Kanaik, rirek eng’ ruanyutab Atak, kole, Eechen rirechu eng’ Misrik: kigiguure anyun yoto Abel-Misraim, ne mitei Jordan bitonin.

¹² Ak kiyachi werikyik ko u ye kiga ng’at inendet ichek:

¹³ amu kisut werikyik kwo emetab Kanan, ak kitupchi kebenet ne mi mbaretab Makpela, ne kial Abraham koboto mbaret eng’ Epron Hitindet ne tokyingei Mamre, kobunji inendet, si koek oldab kererisiek.

¹⁴ Ak kingo kagotub Josep kwandanyi, koweektagei kwo Misri, koboto tupchosiekyik, ak ktugul che kiga kotogosta koboto inendet, ye kibendid kotubei kwandanyi.

¹⁵ Ak ye kingogeer werik che ktupcho ak Josep kole kagome kwandanywa, kole, Abere, imuchi kowechech Josep, ak kogeerwech yaitiet tugul ne kiga kiyachi inendet.

¹⁶ Ak kiiyokto chito kwo oldab Josep, kolenji, King’at kwandang’ung’ ye kitomo kome, kole,

¹⁷ Omwachi Josep olenji, Kaigai inyochi kaat tupchosieguk amu bistoenywa, ak tengektanywa, amu kiyaun yaitiet: ara anyun, kisain kele, Nyoiywech kaat achek otwogikab Kamuktaindet ne bo kwandang’ung’. Ak kirir Josep ye king’aleljin icheget inendet.

¹⁸ Kiba anyun werjoto tupcho agichek kobutyi ng’ony eng’ tainnyi; ak kolenji, Keero, achek ko ki otwogiguk.

¹⁹ Ak kilenji Josep, Amoiywei: tos ageerege Kamuktaindet?

²⁰ Okwek, ko kiolen kioyaiywa ne ya; ago kiyai Kamuktaindet komieit, si kosulda ko u rani, si kesor bik che chang’.

²¹ Amata oiywei anyun nguno: abaok, koboto lagokwok. Ak kiigaigai ichek, ak kong’alalji eng’ talasiet.

²² Ak kimeny Josep Misri, inendet ak bikab gotab kwandanyi: ak kitar Josep kenyisiek bogol ak taman.

²³ Ak kigeer Josep lagokab Epraim agoi ibinda ne bo somok: ak kigigu lagokab Makir weritab Manase eng’ kutung’oikab Josep.

²⁴ Ak kilenji Josep tupchosiekyik, Negit ame: ago rutochinok iman Kamuktaindet, ak komaandak otogoste eng’ emoni obe emet ne kiiyosiechi Abraham, ak Isak, ak Jakobo.

²⁵ Ak kimach Josep kayosiet eng’ lagokab Israel, kole, Rutochinok iman Kamuktaindet, ak oib kowekyuk kotogosta koba eng’ oli,

²⁶ Kime kanyun Josep, ne kiga kotar kenyisiek bogol ak taman: ak kiinde kerichek mustanyi, ak kiinde moinget eng’ oloto bo Misri.