TAUNET 5 - BUKUIT NE TILIL

Bik che kibiitu let eng’ oretab Adam agoi Noa

¹ Ni ko bukuit ne bo oretab lagokab Adam. Eng’ betut ne kitoi Kamuktaindet koyai chito, kiyai Kamuktaindet ichek eng’ kergeindanyi:

² kitoi koyai muren ak tie; ak koberur, ak kotochi ichek kainet koguure Adam, eng’ betunoto ne kigitau keyai.

³ Ak kitar Adam kenyisiek bogol ak sosom, kosich werit eng’ kergeindanyi eng’ itondanyi; ak kiguure kainennyi Set:

⁴ ak betusiekab Adam ko ki kenyisiek bogol sisit ye kingo kagosich Set: ak kisich werik ak tibik.

⁵ Ak betusiek tugul che kitar Adam ko ki kenyisiek bogol sogol ak sosom; si komee.

⁶ Ak kitar Set kenyisiek bogol ak mut, kosich Enos;

⁷ ak kitar Set kenyisiek bogol sisit ak tisab ye kingo kagosich Enos, ak kisich werik ak tibik:

⁸ ak betusiek tugul che bo Set ko ki kenyisiek bogol sogol ak taman ak aeng’; si komee.

⁹ Kitar Enos kenyisiek tamanwogik sogol, kosich Kenan:

¹⁰ ak kitar Enos kenyisiek bogol sisiit ak taman ak mut ye kingo kagosich Kenan, ak kisich werik ak tibik:

¹¹ ak betusiek tugul che bo Enos ko ki kenyisiek bogol sogol ak mut; si komee.

¹² Kitar Kenan kenyisiek tamanwogik tisab, kosich Maalalel:

¹³ ak kitar Kenan kenyisiek bogol sisiit ak artam, ye kingo kagosich Maalalel, ak kisich werik ak tibik:

¹⁴ ak betusiek tugul che bo Kenan ko ki kenyisiek bogol sogol ak taman; si komee.

¹⁵ Kitar Maalalel kenyisiek tamanwogik lo ak mut, kosich Jaret:

¹⁶ ak kitar Maalalel kenyisiek bogol sisiit ak sosom ye kingo kagosich Jaret, ak kisich werik ak tibik:

¹⁷ ak betusiek tugul che bo Maalalel ko ki kenyisiek bogol sisiit ak tamanwogik sogol ak mut; si komee.

¹⁸ Kitar Jaret kenyisiek bogol ak tamanwogik lo ak aeng’, kosich Enok:

¹⁹ ak kitar Jaret kenyisiek bogol sisiit ye kingo kagosich Enok, ak kisich werik ak tibik:

²⁰ ak betusiek tugul che bo Jaret ko ki kenyisiek bogol sogol ak tamanwogik lo ak aeng’; si komee.

²¹ Kitar Enok kenyisiek tamanwogik lo ak mut, kosich Metusela:

²² ak kibendat Enok ak Kamuktaindet eng’ kenyisiek bogol somok ye kingo kagosich Metusela, ak kisich werik ak tibik:

²³ ak betusiek tugul che bo Enok ko ki kenyisiek bogol somok ak tamanwogik lo ak mut:

²⁴ ak kibendoti Enok ak Kamuktaindet; ak kimata kotook, amu kiimut Kamuktaindet.

²⁵ Kitar Metusela kenyisiek bogol ak tamanwogik sisiit ak tisab, kosich Lamek:

²⁶ ak kitar Metusela kenyisiek bogol tisab ak tamanwogik sisiit ak aeng’ ye kingo kagosich Lamek, ak kisich werik ak tibik:

²⁷ ak betusiek tugul che bo Metusela ko ki kenyisiek bogol sogol ak tamanwogik lo ak sogol; si komee.

²⁸ Kitar Lamek kenyisiek bogol ak tamanwogik sisiit ak aeng’, kosich werit.

²⁹ Ak kiguure kainennyi Noa, kole, Inendet ne igoigoech eng’ boisionikyok ak nyalilwogik che bo eunekyok, amu ng’ony ne kigochub Jehovah.

³⁰ Ak kitar Lamek kenyisiek bogol mut ak tamanwogik sogol ak mut ye kingo kagosich Noa, ak kisich werik ak tibik:

³¹ ak betusiek tugul che bo Lamek ko ki kenyisiek bogol tisab ak tamanwogik tisab ak tisab; si komee.

³² Ak ye kingo kagotar Noa kenyisiek bogol mut, kosich Sem, Ham ak Japet.