TAUNET 49 - BUKUIT NE TILIL

Koberuri Jakobo werikying taman

¹ Ak kiiguur Jakobo werikyik, kolenji, Oyumgei tugul, si kobiit aboruok tuguk che tun bwanjinok eng’ betusiek che bo let.

² Oyumgei anyun si ogas, okwek, werikab Jakobo; Ogas Israel kwandang’wong’.

³ Inyendet Reuben ko i werinnyu ne bo tai, i kamugennyu, agoi taunetab kimnatennyu; Etunatet ne bo tororindo, ak etunatet ne bo kimnatet.

⁴ Iwasegei ko u beek, menyoru anyun etunatet; Amu kiiwe itogutab kwandang’ung’:

⁵ Tupcho Simeon ak Lawi; Karikab koromnatet rotokwak bo chok.

⁶ Ee, muguleldanyu, amat iwe kapkiruogenywa; Ee, teegistanyu, amonamge ak tuiyenywa: Amu kibar chi eng’ neregekwak, Ak kieb kwariatab eik eng’ kwetyinenywa.

⁷ Chubot nyiitatenywa, amu ki bichiien; Ak neregekwak, amu ki koromen: Apchee ichek eng’ Jakobo, Ak aiyeste ichek eng’ Israel.

⁸ Inyendet Juda ne tun ilosun tupchosieguk: Indoi eung’ung’ kaatitab buniguk; Ing’urukyinin werikab kwandang’ung’ eng’ taing’ung’.

⁹ Juda ko neranetab ng’etundo; Kaiwe werinnyu eng’ ole kaibarji tiondo: Kiing’uruk, koribis ko u ng’etundo, Ak ko u ng’etundo ne nyebuito; ng’o ne ing’eeti?

¹⁰ Maistoegei Juda siarit ne bo bounatet, Ak mabeti ne igoitoi ng’atutik eng’ iyotennyi, Agoi koit Silo; Ak kase it bik tugul inendet.

¹¹ Ratyin sigiriennyi ketitab sabibuk, Ak ratyin moitab sigiriennyi ketitab sabibuk ne mie kosiir; Kigomwete ngoroikyik kivaik che bo sabibuk: Ak komwete che tugegei biik che biriren che bo sabibuk:

¹² Ak kobiriritu konyekyik eng’ divaik, Ak leelagitu kelekyik eng’ chego.

¹³ Tun menyei Sebulun ngegutab nyanjet: Ak koek kamuung’etab melisiek: Egu kiwotennyi Sidon.

¹⁴ Sigiriet ne kim Isakar, Ne ribise kwemutab njorusiek che bo kechirek:

¹⁵ Ak kigeer ole kimuung’e kole mie; Ak kigeer emet kole kararan; Ak kiing’uruk si kolaiso, Ak koek otwogindet ne boisiei.

¹⁶ Iruokyin Dan bikyik, Amu oret agenge inendet eng’ Israel.

¹⁷ Egu Dan ndaret eng’ ole kibunei, Erenet eng’ oret, Ne susei kwarinikab mbartanyisiek, Si kobut kowee batai chito ne lanyei.

¹⁸ Kiagen yetuneng’ung’, ee Jehovah.

¹⁹ Igiichi luget Gad: Ago igiichi inendet ichek agoi konam kwariat.

²⁰ Ruriotin amitwogik che un bunu Aser, Ak ktun konu tuguk che iboiboi laitorinik.

²¹ Kenyelet ne kotoy Naptali ne kagiunda: Ne ng’alali ng’alek che miachen.

²² Josep ko temetab ketit ne yiei kot, Temet ne yiei kot ne mi ye negite kondab beek; Iwaktoi temenik kosiirei inatut.

²³ Kagogochi inendet ng’wanindo che mwoktoi kotiek, Ak kamwok ak kausaus:

²⁴ Ago tebye kwangennyi eng’ kimnatet, Ak kigimegitu eunekyik, Eng’ eunekab Inendet ne Kim ne bo Jakobo, (Mong’une oloto mestowot, inendet koita ne bo Israel),

²⁵ Agot eng’ Kamuktaindet ne bo kwandang’ung’, ne tun toretin, Ak eng’ Kamuktaindet ne tun iberurin, Eng’ berurwogik che bo barak kipsengwet, Ak berurwogik che mitune riret, Berurwogik che bo kinaik, ak che bo iyotet.

²⁶ Kigimegitu berurwogikab kwandang’ung’ kosiir berurwogikab aguiywogikyuk Agoi ole itei tulonok che bo koigeny: Tebe metitab Josep berurwogichoto, Ak eng’ metit barak ne bo inendet ne kigitabane tupchosiekyik.

²⁷ Benjamin ko suiyot ne tonisiei: Amei karon che bo loget, Ak kopchei koskoleny che kaluul.

²⁸ Chuto ltugul ko ortinwek ktaman ak aeng’ che bo Israel: ak chuto ko ng’alek che kimwachi kwandanywa koberuri; kiiberur chi tugul ko u ole teptoi berurtanyi.

²⁹ Ak kiitigon ichek kolenji, Negit kiyuma awa ole mi bikyuk; otuba koboto kwanisiekyuk eng’ kebenet ne mitei mbaretab Epron Hitindet,

³⁰ eng’ kebenonoto mitei mbaretab Makpela, ne tokyingei Mamre, eng’ emetab Kanan, ne kial Abraham koboto mbaranato eng’ Epron Hitindet, si koek oldab kererisiek:

³¹ kigitupchi yoto Abraham ak osotiondennyi Sara; ak kigitupchi yoto Isak ak Rebeka osotiondennyi agichek; ak kiatupchi Lea yoto agine:

³² kigiale werikab Het mbaranato ak kebenonoto, ne mi yoto.

³³ Ak ye kingo kagoges Jakobo kotigunutik che kiitigoni werikyik, kogetita kelyekyik koba itok, kiilil anyun ak kigiyum koboto bikyik.